[1] Roboam ka masaya sabatira ka barika sɔrɔ tuma min na, a banna Matigi ka sariya ma. Israɛl bɔnsɔn bɛɛ tugura a nɔ fɛ.
[2] Masakɛ Roboam ka masaya san duurunan la, Misira masakɛ Sisak taara Jerusalɛm kɛlɛ, sabu a kɔnɔ mɔgɔw tun ye ko jugu kɛ Matigi ɲɛ kɔrɔ.
[3] Wotoro waa kelen ni kɛmɛ fila ani sotigiw waa biwɔɔrɔ tun bɛ Misira masakɛ fɛ ani kɛlɛkɛ cɛ dama dɔnbali ka bɔ Libikaw ni Suki siya ani Etiopikaw la, u nana a fɛ ka bɔ Misira jamana la.
[4] A ye Juda bɔnsɔn ka dugu barikamaw minɛ fo ka taa se Jerusalɛm.
[5] O tuma la kira Semaɛja taara masakɛ Roboam ni Juda bɔnsɔn kuntigiw sɛgɛrɛ, u lajɛlen tun bɛ Jerusalɛm Sisak kosɔn. A y'a fɔ u ye ko: «Matigi ko: ‹Aw ye ne bila, ne fana na aw bila ka aw don masakɛ Sisak bolo.›»
[6] O tuma la Israɛl bɔnsɔn kuntigiw ni masakɛ ye u yɛrɛw majigin k'a fɔ ko: «Matigi tilennen don.»
[7] Matigi y'a ye ko u majiginna minkɛ, Matigi ka kuma sera Semaɛja ma ko: «U y'u yɛrɛw majigin, o kosɔn ne tɛna u halaki ka u ban. Ne na u tila sɔɔni, ne ka dimiya tɛna bi Jerusalɛm kan Sisak bolo.
[8] O bɛɛ n'a ta u na baara kɛ a ye walisa u ka ne ka baara ani jamana wɛrɛ masakɛw ka baara cogo dɔn ka u bɔɲɔgɔn na.»
[9] Misira masakɛ Sisak taara Jerusalɛm kama ka Matigi ka so kɔnɔ nafolo ani masakɛ ka so kɔnɔ nafolo bɛɛ minɛ. Masakɛ Solomani tun ye sanu nɛgɛ bɛnnan minw dila, a ye olu fana minɛ.
[10] Roboam ye nsiranɛgɛ nɛgɛ bɛnnanw dila ka u bila olu nɔ na. A ye olu di masaya so dakɔlɔsibaaw ma.
[11] Ni masakɛ tun bɛ taa Matigi ka so kɔnɔ tuma o tuma, kɔlɔsibaaw tun bɛ taa ni o nɛgɛ bɛnnanw ye, o kɔ, ka kɔsegin ka u bila u mara so kɔnɔ.
[12] Kabini Roboam y'a yɛrɛ majigin, Matigi ka dimiya madara, a ma a halaki k'a ban. Koɲuman dɔw yera Juda bɔnsɔn cɛma.
[13] Ayiwa Roboam barika bonyara Jerusalɛm. A ka masaya sinsinna ka ta'a fɛ. Roboam si tun ye san binaani ni kelen ye a sigi tuma la masaya la. A ye san tan ni wolonwula kɛ masaya la Jerusalɛm, o ye Matigi ka duguɲɛnatɔmɔlen ye Israɛl bɔnsɔn bɛɛ cɛma ka kɛ a sigi yɔrɔ ye. Roboam ba tɔgɔ ko Nama ka bɔ Amɔn bɔnsɔn na.
[14] Roboam ye ko jugu kɛ, k'a masɔrɔ a dusukun tun tɛ Matigi ɲini.
[15] Roboam ka ko kɛlen daminɛw ni a labanw bɛɛ sɛbɛnnen bɛ kira Semaɛja ka kitabu ni yelikɛla Ido ka buruju kitabu kɔnɔ. Kɛlɛ tun bɛ Roboam ni Jeroboam cɛ tuma bɛɛ.
[16] Roboam sunɔgɔra a bɛnbaw fɛ. A su donna Dawuda ka dugu kɔnɔ. A denkɛ Abija sigira masaya la a nɔ na.