[1] Ayiwa Solomani ye Matigi ka so jɔli daminɛ Jerusalɛm, Morija kulu kan, Matigi y'i jira a fa Dawuda la yɔrɔ min na. Dawuda tun ye labɛnni kɛ Jebus Ornan ka gendekɛnɛ min na, o yɔrɔ yɛrɛ don.
[2] A ye so jɔli daminɛ a ka masaya san naaninan kalo filanan tile filanan la.
[3] Solomani ye Ala ka so min jɔ, o cogo filɛ nin ye. A janya tun ye nɔnkɔnɲɛ biwɔɔrɔ ye ka kɛɲɛ ni sumani cogo kɔrɔ ye. A bonya tun ye nɔnkɔnɲɛ mugan ye.
[4] Soɲɛ fɛ gwa janya tun ye nɔnkɔnɲɛ mugan ye ka kɛɲɛ ni so yɛrɛ ye. So jɔ kundama tun ye nɔnkɔnɲɛ kɛmɛ ni mugan ye. Solomani ye sanu da so kɔnɔna yɔrɔw bɛɛ kan.
[5] A ye bonba kɔnɔna yɔrɔw bɛɛ datugu ni sipere jiriw ye ka sanu da o yɔrɔw bɛɛ kan, ka ntamaro sun jaw ni nɛgɛ jɔlɔkɔ jaw ɲɛgɛn a yɔrɔw bɛɛ kan.
[6] A ye so kɔnɔna masiri ni kabakurunw sɔngɔ gɛlɛnw ye. A sanu tun ye Parvaim sanu ye.
[7] A ye sanu da so sanfɛlaw ni a cɛtigɛ jiriw ni a dakunw ni a kogow ani a konw yɔrɔw bɛɛ kan, ka serubɛn bisigiw ɲɛgɛn ka so kogo masiri.
[8] Solomani ye yɔrɔ senuma senuma jɔ. O janya ni a bonya bɛɛ tun ka kan. O janya tun ye nɔnkɔnɲɛ mugan ye, a bonya tun ye nɔnkɔnɲɛ mugan ye. A ye sanu yɛrɛwolo min da a yɔrɔw bɛɛ kan, o tun ye sanu talan kɛmɛ wɔɔrɔ ye.
[9] A pɔntiw fana tun ye sanu ye, olu bɛɛ kelen-kelen tun ye sikle biduuru ye. A ye sanfɛ bon fana yɔrɔw bɛɛ datugu ni sanu ye.
[10] A ye serubɛn bisigi fila dila ni nɛgɛ yeelelen ye yɔrɔ senuma senuma kɔnɔ ka u yɔrɔw bɛɛ datugu ni sanu ye.
[11] Serubɛnw kamanfura bɛɛ kelen-kelen janya tun ye nɔnkɔnɲɛ duuru ye. O serubɛnw kamanfuraw sɛɛnɛlen kɛra nɔnkɔnɲɛ mugan ye. Kelen kaman tun sera kogo fan kelen ma, kelen kaman sera kogo fan dɔ ma, u kamanfura fila ye ɲɔgɔn bɛn so cɛmancɛ la. Serubɛnw jɔlen tun bɛ u senw kan ka u ɲɛ sin so kɔnɔna ma.
[14] Solomani ye cɛtigɛ fini dila ni gese bagalen ni lomaasa gese ni gese bilen ani lenfu gese ye ka serubɛnw jaw dila a la.
[15] A ye samasen fila jɔ soɲɛfɛla la. Olu bɛɛ jɔ kundama tun ye nɔnkɔnɲɛ bisaba ni duuru ye. U kunna birilanw tun ye nɔnkɔnɲɛ duuru ye,
[16] ka sanu jɔlɔkɔ kɛ ka u lamini i ko bonba sanu jɔlɔkɔ ka gerenatiden bisigi kɛmɛ dila ka olu kɛ o jɔlɔkɔw la.
[17] A ye o samasenw jɔ Alabatosoba ɲɛ fɛ, dɔ tun bɛ kinin fɛ, dɔ tun bɛ numan fɛ. A ye kinin yanfan ta tɔgɔ da ko Jakin ka numan yanfan ta tɔgɔ da ko Boaz.