[1] Jeroboam ka masaya san tan ni seginnan la, Abija kɛra Juda bɔnsɔn ka masakɛ ye.
[2] A ye san saba kɛ masaya la Jerusalɛm. A ba tun ye Uriɛl denmuso ye ka bɔ Gibea, o tɔgɔ ko Mikaja. Kɛlɛ tun bɛ Abija ni Jeroboam cɛ.
[3] Abija taara kɛlɛ la ni kɛlɛkɛ cɛ farinɲɛnatɔmɔlen waa kɛmɛ naani ye. Jeroboam ye kɛlɛ labɛn a kama ni cɛ farinɲɛnatɔmɔlen waa kɛmɛ segin ye.
[4] Abija ye i jɔ Zemaraim kulu kan, o tun ye Efrayim bɔnsɔn ka kulu dɔ ye, ka pɛrɛn ko: «Jeroboam ani Israɛl bɔnsɔn bɛɛ, aw ka ne lamɛn.
[5] Aw m'a dɔn ko Matigi, Israɛl ka Ala ye masaya di Dawuda ni a bɔnsɔn ma Israɛl bɔnsɔn kun na ka kɛ layidu wulibali ye badaa wa?
[6] Nka Nebat denkɛ Jeroboam, Dawuda denkɛ Solomani ka baaraden wulila a matigi kama
[7] ni mɔgɔ kunntan sɔnkolonw ye ka wuli Solomani denkɛ Roboam kama. Roboam tun ye denmisɛn ye, a ja tun man gɛlɛn, a ma se ka jɔ u ɲɛ.
[8] Matigi ka masaya min bɛ Dawuda bɔnsɔnw bolo, sisan aw wulila ko aw bɛ o kɛlɛ. Jamaba bɛ aw bolo. Jeroboam ye sanu misiden bisigi minw dila, olu fana bɛ aw bolo ka kɛ aw ka bato fɛnw ye.
[9] Yala aw ma Matigi ka sarakalasebaaw, Aron denkɛw ni Levitew gɛn wa? Aw ma sarakalasebaaw sigi i ko jamana wɛrɛ bɛ sarakalasebaaw sigi cogo min na wa? Ni mɔgɔ o mɔgɔ nana ni ntura kelen ni sagajigi wolonwula ye ka u kɛ saraka ye a yɛrɛ bilali ko kama sarakalasebaaya la, o bɛ sigi ka kɛ bato fɛnw ka sarakalasebaa ye.
[10] «Nka an kɔni, Matigi ye an ka Ala ye, an ma ban a la fewu. Sarakalasebaa minw bɛ Matigi ka baara la, olu ye Aron bɔnsɔnw ye.
[11] An bɛ saraka jenitaw bɔ Matigi ye ka wusulan suma dumanw lase don o don sɔgɔma ni wula fɛ. Ala ka buuru bɛ bila tabali senuma kan, an bɛ sanu fitinɛ mana don o don wula da fɛ, k'a masɔrɔ an bɛ Matigi, an ka Ala ka ci fɔlenw mara, nka aw ye olu bila.
[12] A y'a filɛ, Ala ni a ka sarakalasebaaw bɛ an fɛ ka an ɲɛ minɛ. Buru fyɛtaw fana bɛ an bolo ka olu fyɛ aw kama. Israɛl bɔnsɔn, aw kana Matigi aw bɛnbaw ka Ala kɛlɛ, k'a masɔrɔ aw tɛna se sɔrɔ.»
[13] O tuma la Jeroboam ye a ka kɛlɛkɛ cɛ dɔw bila u juguw kɔ fɛ. Jeroboam ka mɔgɔw tun bɛ u ɲɛ fɛ ani mɔgɔ dogolenw tun bɛ u kɔ fɛ.
[14] Juda bɔnsɔn ye u kɔ filɛ, u y'a ye ko kɛlɛ bɛ u kɔ ni u ɲɛ fɛ. U kasira Matigi nɔ fɛ, sarakalasebaaw ye buru fyɛ.
[15] Juda bɔnsɔn ka kɛlɛkɛ cɛw ye kulokan bɔ. Ka o pɛrɛnkan to senna, Ala ye Jeroboam ni Israɛl bɔnsɔn bɛɛ gosi Abija ni Juda bɔnsɔnɲɛ.
[16] Israɛl bɔnsɔn bolila Juda bɔnsɔnɲɛ. Ala ye u don Juda bɔnsɔn bolo.
[17] Abija ni a fɛ mɔgɔw ye se sɔrɔ ka fagaliba kɛ. Israɛl bɔnsɔn na kɛlɛkɛ cɛ waa kɛmɛ duuru fagara.
[18] Israɛl bɔnsɔn majiginna o waati la k'a sɔrɔ Juda bɔnsɔn tun bɛ se sɔrɔ, sabu Juda bɔnsɔn jigi tun bɛ Matigi, u bɛnbaw ka Ala kan.
[19] Abija ye Jeroboam nɔgɛn k'a ka dugu dɔw minɛ. Olu tun ye Bɛtɛl ni a lamini duguw ani Jesana ni a lamini duguw ani Efiron ni a lamini duguw ye.
[20] Jeroboam ma barika sɔrɔ ka se sɔrɔ Abija kan. Matigi y'a gosi, a sara.
[21] Nka Abija tun bɛ barika sɔrɔ ka ta'a fɛ. A ye muso tan ni naani furu ka denkɛ mugan ni fila ani denmuso tan ni wɔɔrɔ sɔrɔ.
[22] Abija ka ko tɔw ani a ka siraw ni a ka kumaw, olu bɛɛ sɛbɛnnen bɛ kira Ido ka hakili jigin kitabu kɔnɔ.
[23] O kɔ, Abija sunɔgɔra a bɛnbaw fɛ. A su donna Dawuda ka dugu kɔnɔ. A denkɛ Asa sigira masaya la a nɔ na.