[1] Juda bɔnsɔn ka masakɛ Josafat kɔseginna hɛrɛ la a ka masaya so kɔnɔ Jerusalɛm.
[2] Nka Hanani denkɛ yelikɛla Jehu bɔra ka taa masakɛ Josafat kunbɛn k'a fɔ a ye ko: «Yala an ka kan ka mɔgɔ juguw dɛmɛ wa? E bɛ Matigi koniyabaaw kanu wa? I taama cogo jugu kosɔn, Matigi diminna i kɔrɔ.
[3] O bɛɛ n'a ta, a ye cogoyaɲuman dɔ ye i la sabu i ye Astarte boliw tiɲɛn ka bɔ jamana kɔnɔ ka i sɛbɛ don Ala ɲinili la.»
[4] Josafat sigira Jerusalɛm. O kɔ, a taara bɔ a ka jamana mɔgɔw ye ko kura k'a daminɛ Beɛr-Seba fo ka taa se Efrayim kulu ma ka mɔgɔw lasegin Matigi, u bɛnbaw ka Ala ma.
[5] A ye kiritigɛlaw sigi Juda jamana dugubaw bɛɛ kelen-kelen kɔnɔ,
[6] k'a fɔ kiritigɛlaw ye ko: «A' ye aw yɛrɛw kɔlɔsi aw ka kɛtaw la, k'a masɔrɔ aw tɛ kiri tigɛ mɔgɔ tɔgɔ la fɔ Matigi tɔgɔ la. Matigi na kɛ aw fɛ aw ka kiri tigɛ waati la.
[7] O de kosɔn aw ka siran Matigi ɲɛ ka aw yɛrɛw kɔlɔsi aw ka kɛtaw bɛɛ la, k'a masɔrɔ tilenbaliya si tɛ Matigi, an ka Ala la, a tɛ mɔgɔ bɔ mɔgɔ la, a tɛ surɔ fɛn minɛ.»
[8] Josafat ye Levite dɔw ni sarakalasebaa dɔw ani Israɛl bɔnsɔn kuntigi dɔw fana sigi Jerusalɛm walisa u ka tilennenya sira taama Matigi ɲɛ kɔrɔ ka kiri kow ɲɛnabɔ dugu kɔnɔ mɔgɔw niɲɔgɔn cɛ.
[9] A ye nin ci fɔ mɔgɔw ye ko: «Aw ka kiri tigɛ ni Matigi ɲɛsiran ni tilennenya bɛɛ ni dusukun jɛlen ye.
[10] Aw balima minw sigilen bɛ u ka duguw kɔnɔ, ni olu nana aw sɛgɛrɛ ni kiri kow ye, a kɛra mɔgɔ fagali ye wo, a kɛra sariya tiɲɛnni ko ye wo wala ci fɔlen wala ko latigɛlen wala ci dilen, aw ka olu jɛya u ma walisa u kana jalaki Matigi ɲɛ kɔrɔ. Matigi ka dimiya kana wuli aw ni aw balimaw kama. Aw ka o baara kɛ ten walisa aw ka kɛ jalakibaliw ye.
[11] Sarakalasebaa kuntigi Amaria na kɛ aw kuntigi ye Matigi ka kow la. Isumaɛl denkɛ Zebadia, Juda bɔnsɔn kuntigi na kɛ aw kuntigi ye masakɛ ka kow la. Levitew na kɛ o kow sɛbɛnbaaw ye. A' ye aw ja gɛlɛya ka o kow kɛ. Matigi ka kɛ mɔgɔɲumanw fɛ.»