[1] O kɔ, Solomani ko: «Matigi ko a na sigi dibiba la.
[2] «Ala, ne ye so jɔ i ye, k'a kɛ i sigi so ye. I na sigi a kɔnɔ badaa.»
[3] Masakɛ y'i yɛlɛma Israɛl bonsɔn jama fan fɛ ka dubaw kɛ u ye. Israɛl bɔnsɔn jama bɛɛ wulila k'u jɔ.
[4] Solomani y'a fɔ ko: «Matigi, Israɛl bɔnsɔn ka Ala ka tanu, o min kumana ne fa Dawuda fɛ ka a ka layidu talen dafa, ko,
[5] kabini a ye a ka mɔgɔw labɔ Misira jamana la don min na, a ma dugu siɲɛnatɔmɔ Israɛl bɔnsɔn si cɛma ko so ka jɔ yen ka kɛ a batoli so ye. Ko a ma cɛ siɲɛnatɔmɔ k'a kɛ a ka mɔgɔw Israɛl bɔnsɔn kuntigi ye.
[6] Nka a ye Jerusalɛmɲɛnatɔmɔ walisa a tɔgɔ ka wele yen, ka Dawudaɲɛnatɔmɔ walisa o ka a ka mɔgɔw Israɛl bɔnsɔn mara.
[7] «O bɛɛ n'a ta, ne fa Dawuda tun b'a fɛ ka so jɔ Matigi, Israɛl bɔnsɔn ka Ala ye
[8] nka Matigi y'a fɔ ne fa Dawuda ye ko ni a b'a fɛ ka batoli so jɔ ale ye, o miirili ka ɲi,
[9] nka a tɛna o so jɔ. A na denkɛ min bange, o de na so jɔ ale ye.
[10] «Ayiwa Matigi ye a ka kuma fɔlen dafa. Ne wulila ne fa Dawuda nɔ na ka sigi Israɛl bɔnsɔn ka masasigilan kan. Matigi tun ye min fɔ, ne ye o so jɔ Matigi, Israɛl bɔnsɔn ka Ala ye.
[11] Matigi tun ye layidu min ta Israɛl bɔnsɔn ye, ne ye o layidu wagande sigi o so kɔnɔ.»
[12] O kɔ, masakɛ Solomani ye i jɔ Matigi ka saraka bɔlanɲɛ fɛ Israɛl bɔnsɔn jama bɛɛ ɲɛ kɔrɔ k'a bolow kɔrɔta,
[13] k'a masɔrɔ Solomani tun ye nsiranɛgɛ banbeba jɔ dukɛnɛ cɛmancɛ la. O banbe janya tun ye nɔnkɔnɲɛ duuru ye, a bonya tun ye nɔnkɔnɲɛ duuru ye, a jɔ kundama tun ye nɔnkɔnɲɛ saba ye. A yɛlɛnna o kan ka i ɲɔngiri Israɛl bɔnsɔn jama bɛɛ ɲɛ kɔrɔ k'a bolo kɔrɔta san fɛ
[14] k'a fɔ ko: «Matigi, Israɛl ka Ala, i bɔɲɔgɔnko Ala wɛrɛ si tɛ sankolo la wala dugukolo kan. I ye kantigi ye i ka layidu kow la i ka jɔnw ye. Minw bɛ taama i ɲɛ kɔrɔ ni u dusukun bɛɛ ye, i ka ɲumaya ka bon olu ta fan fɛ.
[15] Ayiwa i tun ye layidu min ta i ka jɔnkɛ, ne fa Dawuda ye, i ye o dafa. I da tun ye min fɔ, i bolo ye o dafa bi.
[16] Ayiwa sisan, Matigi, Israɛl bɔnsɔn ka Ala, i tun ye layidu min ta i ka jɔnkɛ, ne fa Dawuda ye ko ni a denw taamana ni tilennenya ye i ɲɛ kɔrɔ ka i ka sariya mara i ko a yɛrɛ y'a kɛ cogo min na, bɔnsɔn tɛna dɛsɛ a la ka sigi a nɔ na Israɛl bɔnsɔn ka masasigilan kan.
[17] Ayiwa sisan, Matigi, Israɛl bɔnsɔn ka Ala, i ye kuma min fɔ i ka jɔnkɛ Dawuda ye, i ka o dafa.
[18] «Nka sɛbɛ la, Ala na sigi mɔgɔw cɛma dugukolo kan cogo di? Sankolo ni sankolow bɛɛ kunna sankolo tɛ se i kɔrɔ. Ne ka so jɔlen dun na se i kɔrɔ cogo di?
[19] O bɛɛ n'a ta, Matigi, ne ka Ala, i ka i ɲɛ majigin ka i ka jɔnkɛ ka delili ni a ka deliliba lamɛn. I ka sɔn ka i ka jɔnkɛ kasikan ni a ka delili lamɛn i ɲɛ kɔrɔ bi.
[20] I ka i ɲɛ yɛlɛ ka nin so ni nin yɔrɔ senuma filɛ su ni tile. I y'a fɔ ko i na i yɛrɛ jira nin yɔrɔ la. Ni i ka jɔnkɛ ye delili kɛ k'a ɲɛ sin nin yɔrɔ ma, i ka o delili jaabi.
[21] I ka jɔnkɛ bɛ delili min kɛ ani i ka mɔgɔw Israɛl bɔnsɔn bɛ deliliba minw kɛ ka u ɲɛ sin nin yɔrɔ ma, i ka olu jaabi. Ɔwɔ, i ka u lamɛn ka i to i sigi yɔrɔ la sankolo la ka yafa u ma.
[22] «Ni mɔgɔ dɔ ye ko jugu kɛ a mɔgɔɲɔgɔn na, ni an ye o wajibiya k'a kali, ni o nana a kali i ka saraka bɔlan kɔrɔ nin so kɔnɔ,
[23] e ka i ka jɔnkɛ lamɛn ka i to sankolo la ka i ka jɔnkɛ ka kiri tigɛ ka jalakitigi jalaki, ka o jalaki bi a yɛrɛ kan ka jo di jotigi ma.
[24] «Ni i ka mɔgɔw Israɛl bɔnsɔn tiɲɛnna u juguw fɛ u ka ko jugu kɛlen kosɔn i la, ni u seginna i ma ka i tɔgɔ bonya, ni u nana i deli nin so kɔnɔ ni deliliw ni delilibaw ye,
[25] o tuma la ka i to sankolo la, i ka Israɛl bɔnsɔn ka jurumu kɛlen yafa u ma. E ye jamana min di u bɛnbaw ma, i ka u lasegin o kɔnɔ katuguni i ka mɔgɔw don.
[26] «Ni sankolo datugura fo sanji tɛ na u ka jurumu kɛlenw kosɔn i la, ni u nana delili kɛ nin yɔrɔ la ka nɔɔrɔ da i tɔgɔ kan, ni u yɛlɛmana ka fara u ka jurumuw la k'a masɔrɔ i ye u tɔɔrɔ,
[27] o tuma la, ka i to sankolo la, i ka i ka jɔnw ni i ka mɔgɔw Israɛl bɔnsɔn ka jurumuw yafa u ma. U ka kan ka siraɲuman min taama, i ka o jira u la ka sanji lana nin dugukolo kan, i ye o min di ka kɛ i ka mɔgɔw Israɛl bɔnsɔn ciyɛn ye.
[28] «Ni kɔngɔba wala fiɲɛbana donna jamana kɔnɔ walaɲɔ diro wala ja wala ntɔnw wala ntumuw, ni Israɛl bɔnsɔn juguw nana Israɛl bɔnsɔn ka dugu dɔw minɛ, ni tɔɔrɔ wala bana sifa o sifa ye u sɔrɔ,
[29] ni mɔgɔ kelen wala i ka mɔgɔw Israɛl bɔnsɔn bɛɛ nana i deli ni deliliw ni delilibaw ye, ni Israɛl bɔnsɔn bɛɛ ye u ka fililiw ni u ka tɔɔrɔw dɔn ka u bolow sin nin so ma,
[30] o tuma la, ka i to i sigi yɔrɔ la sankolo la, i ka yafa u ma ka u bɛɛ kelen-kelen sara ka kɛɲɛ ni u ka kɛwalew ye katuguni e bɛ mɔgɔ dusukun dɔn. E kelenpe bɛ Hadamadenw bɛɛ dusukunw dɔn.
[31] I ka o kɛ walisa u ka siran i ɲɛ ka taama i ka siraw fɛ u ka waatiw bɛɛ la nin jamana kɔnɔ, i ye o min di an bɛnbaw ma.
[32] «Jamana wɛrɛ mɔgɔ min tɛ i ka siya Israɛl bɔnsɔn dɔ ye, ni o ye i tɔgɔba ko mɛn ani i bolo ka sebaayaba, ni o nana ka bɔ jamana jan na, ni o nana delili kɛ nin so kɔnɔ,
[33] o tuma la, ka i to i sigi yɔrɔ la sankolo la, o dunan bɛ fɛn minw deli i fɛ, i ka olu kɛ a ye, o cogo la dugukolo kan mɔgɔw bɛɛ na i tɔgɔ dɔn ka siran i ɲɛ i ko i ka siya Israɛl bɛ siran i ɲɛ cogo min na. Ne ye nin so min jɔ, u n'a dɔn ko i tɔgɔ dara o kan.
[34] «Ni Israɛl bɔnsɔn taara u juguw kɛlɛ u kɛrɛ fɛ wala u lamini na, ni u ye i tɔgɔ wele ka u ɲɛ sin nin dugu ani ne ka nin so jɔlen ma i ye,
[35] o tuma la, ka i to sankolo la, i ka i ka mɔgɔw ka deliliw ni u ka delilibaw jaabi ka u dɛmɛ.
[36] «Ni u ye jurumu kɛ i la k'a masɔrɔ mɔgɔ si jurumu kɛbali tɛ, ni i diminna u kɔrɔ ka u don u juguw bolo, ni u juguw ye u cɛ ka taa u kɛ jɔnw ye jamana jan dɔ la wala jamana surun dɔ la,
[37] ni u kɛra jɔnw ye o jamana kɔnɔ, ni u kɔseginna i ma u yɛrɛma ka yɛlɛma ka i deli ni delilibaw ye o dugukolo kan k'a fɔ ko u ye jurumu ni tilenbaliya kow kɛ, ko u ye ko jugu kɛ,
[38] ni u kɔseginna e ma ni u dusukun bɛɛ ani u hakili bɛɛ ye ka u to o dugukolo kan o jɔnya so kɔnɔ, ni u ye i deli ka i deli, i ye jamana min di u bɛnbaw ma, ni u ye i deli ka u ɲɛ sinnen to o ma, ani i ye dugu min ɲɛnatɔmɔ ani ne ye so min jɔ i ye,
[39] o tuma la, ka i to i sigi yɔrɔ la sankolo la, i ka u ka deliliw jaabi. I ka mɔgɔw, Israɛl bɔnsɔn, ye ko jugu min kɛ i la, i ka o yafa u ma.
[40] «Ayiwa sisan, ne ka Ala, delili min bɛ kɛ nin yɔrɔ la, i ka i ɲɛ dayɛlɛ ka i tulo majɔ ka o delili lamɛn.
[41] Sisan, Matigi Ala, i ka wuli ka na i sigi i ka so kɔnɔ, e ni layidu wagande, i ka sebaaya bɛ o min na. Matigi Ala, i ka i ka sarakalasebaaw masiri ni kisili ye, e ka kanulenw ka ɲagali i ka hɛrɛba kosɔn.
[42] Matigi Ala, i kana i ka munlen ka delili fili kɔ fɛ. I hakili to i ka nɛɛma kɛlen na i ka jɔnkɛ Dawuda ye.»