Jimar 27
[1] Qîzêd Silofh'adê H'êferê kur'ê Gîle'dê Maxîrê kur'ê Minaşeyê ji malbeta Minaşeyê kur'ê Ûsiv hatin. Ev bûn navêd wan: Mah'la, Noha, H'ogla, Mîlk'a û T'îrsa.
[2] Evana li ber Mûsa, Êlazarê k'ahîn, serwêra û temamîya civînê li ber derê Konê Civînê sekinîn û gotin:
[3] «Bavê me ber'îyêda mir, lê ew ne nava wê k'omêda bû, k'îjan ku miqabilî Xudan civîya bûn, awa gotî civîna Qorax. Lê bona gunê xwe mir û kur'êd wî t'unebûn.
[4] Çima navê bavê me ji nava malbeta wî gere bê hildanê, wekî kur'êd wî t'unene? Ji nava birayêd bavê me, milk' bide me».
[5] Mûsa şixulê wan danî li ber Xudan.
[6] Xudan Mûsar'a xeberda û got:
[7] «Qîzêd Silofh'ad r'ast dibêjin. Milk' bide wan ji nava birayêd bavê wanda ku war bin, awa gotî warê bavê wan derbazî ser wan ke.
[8] Û zar'êd Îsraêlr'a xeber de, bêje: Gava yek bimire û kur'ê wî t'une be, hingê warê wî bira derbazî qîza wî be.
[9] Lê heger qîz jî t'une, hingê warê wî bidine birayêd wî.
[10] Lê heger bira jî t'unene, hingê warê wî bidine apêd wî.
[11] Lê heger ap jî t'unene, hingê warê wî bidine pismamê wîyî nêzîk ji malbeta wî ku ew lê war be. Bira ev bona zar'êd Îsraêl bibe qeyde-qanûna heqîyê, çawa ku Xudan e'mirî Mûsa kir».
[12] Xudan gote Mûsa: «Hilk'işe li ser vî ç'îyayê hanî ji ç'îya-banîyêd Abarîm û dîna xwe bide wî e'rdê ku ezê bidime zar'êd Îsraêl.
[13] Û gava wî bibînî, hingê tê jî her'î bigihîjî cime'ta xwe, mîna Harûnê birê xwe.
[14] Çimkî we ber'îya Sînêda guhdarîya min nekir, dema qalme-qalma civînê, ser avê we pîrozîya min li ber ç'e'vêd wan ne da k'ifşê». (Eva avêd Mêrîbahê ne li Qadêşê ber'îya Sînda).
[15] Mûsa Xudanr'a xeberda û got:
[16] «Bira Xudan Xwedêyê r'uh'ê her bedenî li ser vê civînêr'a merivekî k'ifş ke,
[17] wekî r'êberîyê wan bike û ç'e'vê wî ser k'etin û derk'etina wan be, ku civîna Xudan nebe mîna pezê bê şivan».
[18] Xudan gote Mûsa: «Xwer'a Yêşûyê kur'ê Nûn, merivê ku R'uh'ê min têda ye, hilde. Destê xwe dayne li ser wî,
[19] wî li ber Êlazarê k'ahîn û li ber t'emamîya civînê bide sekinandin û li ber ç'e'vêd wan wî k'ifş ke.
[20] Ji serwêrîya xwe bide wî ku t'emamîya civîna zar'êd Îsraêl guh bide wî.
[21] Ew gere li ber Êlazarê k'ahîn bisekine. Êlazarê bona wî qirara Ûrîm li ber Xudan bipirse. Anegorî wê qirarê ew gere derk'evin û anegorî wê ew gere bên, ew û t'emamîya zar'êd Îsraêl awa gotî t'emamîya civînê».
[22] Û Çawa ku Xudan e'mir li Mûsa kiribû, ewî usa jî kir. Ewî Yêşû hilda û ew li ber Êlazarê k'ahîn û t'emamîya civînê da sekinandinê.
[23] Mûsa destêd xwe danîne li ser wî û ew k'ifş kir, çawa ku Xudan pê Mûsa gotibû.