<Jimar 13

[1] Xudan Mûsar'a xeberda got:

[2] «Xwer'a meriva bişîne ku ce'sûsîya e'rdê Kenanê bikin, k'îjanî ku ez didime zar'êd Îsraêl. Ji her qebîleke bavêd wan merivekî bişîne, awa gotî ji serwêrê nava wanda».

[3] Hingê Mûsa ew anegorî gotina Xudan ji ber'îya Paranê şandin. Ew h'emû meriv serwêrê zar'êd Îsraêl bûn.

[4] Ev in navêd wan: Ji qebîla R'ûbên Şamûayê kur'ê Zak'ûr bû.

[5] Ji qebîla Şimh'ûn Şafatê kur'ê H'orî bû.

[6] Ji qebîla Cihûda K'alêbê kur'ê Yifûneh bû.

[7] Ji qebîla Îsaxar Îgalê kur'ê Ûsiv bû.

[8] Ji qebîla Efrayîm Hoşêyayê kur'ê Nûn bû.

[9] Ji qebîla Binyamîn Paltîyê kur'ê R'afû bû.

[10] Ji qebîla Zebûlon Gaddîyêlê kur'ê Sodî bû.

[11] Ji qebîla Minaşe (qebîleke ji Ûsiv) Gaddîyê kur'ê Sûsî bû.

[12] Ji qebîla Dan E'mîyêlê kur'ê Gimallî bû.

[13] Ji qebîla Aşêr Sit'ûrê kur'ê Mixayîl bû.

[14] Ji qebîla Neftelî Nah'bîyê kur'ê Vofsî bû.

[15] Ji qebîla Gad Geyûêlê kur'ê Maxî bû.

[16] Ev in navêd wan merivêd ku Mûsa şandin ce'sûsîya e'rdê bikin. Mûsa navê Hoşêyayê kur'ê Nûn danî Yêşû .

[17] Mûsa ew şandin ku ce'sûsîya e'rdê Kenanê bikin û gote wan: «R'abin her'ine Necefê û h'eta e'rdê ç'îya-banîya hilk'işin.

[18] Binihêr'in e'rd çawa ye. Merivêd li wî e'rdî dijîn qewat in yan sist in, p'ir' in yan hindik in?

[19] E'rdê ku ew lê ne çawa ye, qenc e yan xirab e? Bajarêd ew lê dijîn vekirî ne yan sûrkirî ne?

[20] E'rd çawa ye, xweyî deremet e yan bê ber e, bax hene yan t'unene? Serxwe bin û ji berê wî e'rdî bînin». (Ev we'dê tirîyêd pêşin bû.)

[21] Û ew r'abûn ce'sûsîya wî e'rdî kirin, ji ber'îya Sînê girtî h'eta R'ih'ovê li Libo-Hamatê.

[22] Ew r'abûn hilk'işîyane Necefê û gihîştine Hêbronê û li wir Axîman, Şêşay û T'almay, zar'êd enaqîya diman. (Hêbron h'eft sala berî Zoyana misirîya hatibû çêkirinê).

[23] Ew gihîştine newala Eşk'olê û li wir wana gûşîkî tirîyê ç'iqilva çinîn darek navr'a kirin û du merîya ew hildan, usa jî çend h'inar û hêjîr hildan.

[24] Navê wî cîyî danîn newala Eşk'ol , bona gûşîyê li wir zar'êd Îsraêl çinîn.

[25] Pey çil r'ojîr'a ew ji ce'sûsîya wî e'rdî veger'îyan.

[26] Ew hatin û çûne li cem Mûsa, Harûn û te'mamîya civîna zar'êd Îsraêl li ber'îya Paran, Qadêşê. Wan û t'emamîya civînêr'a xeber anîn û berêd wî e'rdî nîşanî wan kirin.

[27] Mûsar'a salix kirin û gotin: «Em çûne wî e'rdê ku te em şandinê, bi r'astî şîr û hingiv jê dik'işe, evana jî berê wî ne.

[28] Lê miletê li wî e'rdî dijî, qewat e, bajar jî bi sûrêd gelekî mezin in, usa jî me zar'êd enaqîya li wir dîtin.

[29] Amalêkî li Necefê dijîn, h'îtî, yebûsî û emorî li ser ç'îya-banîya dijîn, kenanî jî devê be'rê û k'êleka Ûrdunê dijîn».

[30] Lê K'alêb cime't li ber Mûsa da ker'kirinê û got: «R'abin em hevraz her'in û wî bikine milk'ê xwe, çimkî emê e'se wî zeftî xwe kin».

[31] Lê merivêd ku t'evî wî hevraz çûbûn digotin: «Em nikarin hevraz her'in miqabilî wan, çimkî ew ji me qewattir in».

[32] Wana cab-sawêd xirab bela dikirin nava zar'êd Îsraêl bona e'rdê ce'sûsî kirî, digotin: «E'rdê ku eme çûbûnê wekî ce'sûsîya wê bikin, ew e'rd binelîyêd xwe h'ûfî xwe dike û h'emû merivêd ku me li ser wê dîtin merivne bejin-bilind in.

[33] Li wir me e'save dîtin (zar'êd enaqîya p'areke ji e'sava bûn) û em li ber ç'e'vêd xwe mîna kulîya bûn usa jî li ber ç'e'vêd wan bûn».