[1] Musa yɛlɛnna ka bɔ Moab jɛkɛnɛw la ka taa Nebɔ kulu kan Pisiga kulu kuncɛ la Jeriko kuntilenna la. Matigi ye Galad jamana bɛɛ jira a la fo ka taa se Dan jamana ma,
[2] ani Nefitali bɛɛ ani Efrayim ni Manase jamana ani Juda jamana bɛɛ fo ka taa se tilebi yanfan kɔgɔji ma,
[3] ani worodugu yanfan dafɛla ani Jeriko jɛkɛnɛw, ntamaro sunw dugu fo ka taa se Zoar.
[4] Matigi y'a fɔ a ye ko: «Ne tun ye ne kali ka layidu ta Ibrahima ni Isaka ani Yakuba ye jamana min ko la, ko ne na a di u bɔnsɔn ma, ne y'a to i ka o jamana ye i ɲɛw la, nka i tɛna don a la fewu.»
[5] Matigi ka jɔnkɛ Musa sara Moab jamana la yen, ka kɛɲɛ ni Matigi ka kuma fɔlen ye.
[6] Matigi ye a su don Moab jamana jɛkɛnɛ la Bɛt-Peɔr kuntilenna la, nka mɔgɔ si tɛ a kaburu yɔrɔ dɔn halibi.
[7] Musa si tun ye san kɛmɛ ni mugan ye a sa tuma la. A ɲɛ ma lafin, fɛn ma bɔ a farikolo barika la.
[8] Israɛl bɔnsɔn ye Musa su kasi tile bisaba kɔnɔ Moab jɛkɛnɛw la. O tuma la Musa sanga ni a su kasi donw tɛmɛnna.
[9] Nun denkɛ Josue fara hakilitigiya la, katuguni Musa tun ye a bolo da a kan. Israɛl bɔnsɔn ye a kan minɛ. Matigi tun ye min fɔ Musa da la, u ye o bɛɛ kɛ.
[10] Musa bɔɲɔgɔnko kira si ma wuli Israɛl cɛma, Matigi ye a dɔnɲɛda niɲɛda.
[11] Matigi ye a ci ka taamashyɛnw ni kabakow kɛ Misira jamana kɔnɔ Faraon ni a ka jɔnw ni a ka jamana bɛɛ ɲɛ na,
[12] ani Musa ye kobaw ni siran koba minw kɛ ni bolo barikama ye Israɛl bɛɛ ɲɛ na, kira si ma o bɔɲɔgɔnko kɛ.