[1] Musa ye Israɛl mɔgɔw bɛɛ wele k'a fɔ u ye ko: «Israɛl, ne bɛ sariya sigilenw ni ci minw fɔ aw ye bi, a' ye olu lamɛn. Aw ka u kalan ka aw janto u la ka u kɛ.
[2] Matigi an ka Ala ye layidu ta an ye k'an to Hɔrɛb.
[3] Matigi ma o layidu ta an bɛnbaw ye, fɔ an yɛrɛw, an minw bɛɛ ɲɛnama bɛ yan bi.
[4] Matigi kumana aw fɛ kulu kanɲɛda niɲɛda, k'a kan bɔ tasuma cɛmancɛ la.
[5] O tuma la ne jɔlen tun bɛ Matigi ni aw cɛ, ka Matigi ka kuma fɔ aw ye, katuguni aw siranna tasuma kosɔn, aw ma yɛlɛn kulu kan. «Matigi ko:
[6] ‹Ne ye Matigi i ka Ala ye, o min ye i labɔ Misira jamana jɔnya so la.
[7] ‹I kana bato fɛn wɛrɛ si kɛ i fɛ ne kɔ.
[8] ‹I kana ja dɛsɛnen si dila i yɛrɛ ye, wala fɛn si bisigi, sankolola fɛn wo, dugukolo kan fɛn wo, dugukolo jukɔrɔ ji la fɛn wo.
[9] ‹I kana i biri u kɔrɔ, i kana baara kɛ u ye, katuguni ne, Matigi i ka Ala, ne ye Ala keleyama ye. Ne bɛ faw ka tilenbaliya hakɛ bɔ u denw la fo ka taa se ne koniyabaa bɔnsɔn yɛlɛma ko sabanan ni a naaninan ma.
[10] Nka ne bɛ ne ka makari jira ne kanubaaw ni ne ka ci marabaaw la fo ka taa se u bɔnsɔn waa caman ma.
[11] ‹I kana Matigi i ka Ala tɔgɔ fɔ fuu, k'a masɔrɔ min bɛ Matigi tɔgɔ fɔ fuu, Matigi tɛna o tigi jalakibali to.
[12] ‹I hakili to lafiɲɛ don na k'a saniya, i ko Matigi i ka Ala y'a fɔ i ye cogo min na.
[13] I ka baara kɛ tile wɔɔrɔ kɔnɔ ka i ka baara bɛɛ kɛ.
[14] Nka tile wolonwulanan ye Matigi i ka Ala ka lafiɲɛ don ye. I kana baara si kɛ o don na, i ni i denkɛ ni i denmuso ni i ka jɔnkɛ ni i ka jɔnmuso ni i ka misi ni i ka fali, ni i ka baganw bɛɛ, ni i ka siginfɛ min bɛ i ka yɔrɔ la, walisa i ka jɔnkɛ ni i ka jɔnmuso ka lafiya i ko i yɛrɛ.
[15] I hakili to a la ko i tun bɛ jɔnya la Misira jamana la, ko Matigi i ka Ala ye i labɔ yen ni a barika ni a ka sebaaya ye. O de y'a to Matigi i ka Ala y'a fɔ i ye ko i ka lafiɲɛ don mara.
[16] ‹I ka i fa ni i ba bonya, i ko Matigi i ka Ala y'a fɔ i ye cogo min na, walisa Matigi i ka Ala bɛ jamana min di i ma, i si tilew ka caya o kɔnɔ, i ka hɛrɛ sɔrɔ o jamana la.
[17] ‹I kana mɔgɔ faga.
[18] ‹I kana jatɔya kɛ.
[19] ‹I kana sonyali kɛ.
[20] ‹I kana nkalon da i mɔgɔɲɔgɔn na.
[21] ‹Iɲɛ kana bɔ i mɔgɔɲɔgɔn muso fɛ. I ɲɛ kana bɔ i mɔgɔɲɔgɔn ka so fɛ, wala a ka foro, wala a ka jɔnkɛ, wala a ka jɔnmuso, wala a ka misi, wala a ka fali fɛ. I ɲɛ kana bɔ i mɔgɔɲɔgɔn ka fɛn si fɛ.›
[22] «Matigi ye o kuma welewele da aw ka jama bɛɛ ɲɛ na k'a to kulu kan, k'a kan bɔ tasuma ni sanfin ani bugun finman cɛmancɛ la, a ma foyi fara o kan. A ye u sɛbɛn kabakurun walaha fila kan ka u di ne ma.
[23] «Aw ye o kan mɛn ka bɔ dibi la tuma min na, ka tasuma manalen to kulu fan bɛɛ la, aw siyaw kuntigiw ni aw ka cɛkɔrɔbaw bɛɛ gɛrɛla ne la
[24] k'a fɔ ko: ‹A filɛ, Matigi an ka Ala ye a nɔɔrɔ ni a bonyaba jira an na, an ye a kan mɛn ka bɔ tasuma cɛmancɛ la. An y'a ye bi ko Ala bɛ kuma mɔgɔw fɛ, ko u ɲɛnama bɛ to.
[25] Sisan mun y'a to an ka sa? Sabu nin tasumaba na an jeni ka an ban pewu. Ni an tora ka Matigi an ka Ala kan mɛn, an na sa.
[26] Hadamaden jumɛn delila ka Ala ɲɛnama kan mɛn ka bɔ tasuma cɛmancɛ la i ko an y'a mɛn cogo min na, ni o tigi ɲɛnama tora?
[27] Ko ne yɛrɛ ka gɛrɛ Matigi an ka Ala la ka a ka kuma bɛɛ mɛn. Ko Matigi aw ka Ala bɛ min fɔ, ne ka o bɛɛ lase aw ma. Ko aw na o kumaw mɛn ka u kɛ.›
[28] «Aw ye kuma minw fɔ ne ye, Matigi ye olu mɛn. Matigi y'a fɔ ne ye ko: ‹Nin mɔgɔw ye kuma minw fɔ ne ye, a ye olu mɛn, ko aw ye min fɔ, o bɛɛ bɛnna.
[29] N'a tun y'a sɔrɔ ko dusu kelen tun bɛ u la ka siran ne ɲɛ ka ne ka ci fɔlenw bɛɛ mara tuma bɛɛ, walisa u ni u bɔnsɔn ka to hɛrɛ la badaa, o tun ka ɲi.
[30] Taa a fɔ u ye ko u ka kɔsegin u ka finisow la.
[31] E kɔni ka to ne fɛ yan. I na u kalan ci fɔlenw ni sariya sigilenw ni ko latigɛlen minw na, ne na olu bɛɛ fɔ i ye, walisa ne bɛ jamana min di u ma k'a kɛ u ta ye, u ka olu kɛ ka u to o jamana kɔnɔ.›
[32] «Ayiwa Matigi aw ka Ala ye min fɔ aw ye, aw ka aw janto o la ka o kɛ. Aw kana fara ka taa kininfɛ wala numanfɛ.
[33] Matigi aw ka Ala ye sira min jira aw la, aw ka o bɛɛ taama, walisa aw ɲɛnama ka to, aw ka hɛrɛ sɔrɔ, walisa jamana min bɛna kɛ aw ta ye, aw ka tile caman sɔrɔ o kɔnɔ.