[1] «Sankolow, aw ka aw tulo majɔ, ne bɛ kuma. Dugukolo, i ka ne da la kumaw lamɛn.
[2] Ne ka kalan ka jigin i ko sanji, ne ka kumaw ka toni i ko ngomi, i ko sanji musumusu bɛ na bin nugu kan cogo min na, i ko sanji kunbaw bɛ na nakɔɲugu kan cogo min na.
[3] K'a masɔrɔ ne bɛ Matigi tɔgɔ welewele da. Aw ka an ka Ala bonya!
[4] «Ala de ye farakurun ye, a ka kɛwalew dafalen bɛ, a ka siraw tilennen don. Ala ye kantigi ye, tilenbaliya si t'a la. Tiɲɛtigi don, a tilennen bɛ.
[5] «Ni u ye u yɛrɛw tiɲɛn, o tɛ ale nɔ ye. O maloya ye a denw ta ye. O waati mɔgɔw ye nkalontigɛla lafililenw ye.
[6] «E siya nalonma, hakilintan, aw bɛ o kɛ Matigi la wa? Ale tɛ i fa ni i dabaa ye wa? A ye i dila ka i jɔ.
[7] «I hakili jigin don tɛmɛnnenw la, i ka miiri san tɛmɛnnen kɔrɔw ko la. I fa ɲininka, a na i kalan o la, ani i ka mɔgɔ kɔrɔbaw, olu na a fɔ i ye.
[8] Kɔrɔtalenba ye siyaw ciyɛn di u ma, ka Hadamadenw fara ka bɔɲɔgɔn na tuma min na, a ye siyaw danw sigi, ka kɛɲɛ ni Israɛl bɔnsɔnw danw ye.
[9] K'a masɔrɔ Matigi niyɔrɔ ye a ka mɔgɔw ye, Yakuba ye a ta ye, a ka ciyɛn don.
[10] «A y'a sɔrɔ kungokolon jintan kɔnɔ, kungokolon lankolonba kɔnɔ waraw gɔrɔntɔkan cɛma. A ye a lamini ka a janto a la, a y'a kɔlɔsi i ko a yɛrɛɲɛkisɛ.
[11] A kɛra i ko bɔn min bɛ a ɲaa yɛrɛkɛ, ka a kamanfuraw lamaga a denw kun na, ka a kamanw sɛɛnɛ u kɔrɔ ka u ta, ka u ta a kamanfuraw kan.
[12] «Matigi kelenpe ye a ka mɔgɔw ɲɛ minɛ. Siya wɛrɛ ka bato fɛn si tun tɛ a fɛ yen.
[13] «A ye a layɛlɛn jamanaw san fɛ. Israɛl ye foro la suman dun. Matigi ye di nɔɔnɔ di a ma ka bɔ farakolo la, a k'a min, ani tulu min bɛ bɔ farakolo gɛlɛnma la,
[14] ani misiw nare ni sagaw nɔnɔ, ani sagadenw kɛn, ani Basan sagajigi ni bakɔrɔw, ani alikama muguɲuman. I ye rezɛn joli min, diwɛn kɔni.
[15] «Israɛl bonyara, a ye tanni kɛ. Ɔwɔ, i bonyara, i tɔlɔla, i fara. O tuma la a ye a dabaa Ala bila. A ye a kisili farakurun mafiɲɛya.
[16] U ye siya wɛrɛw ka bato fɛnw keleya don a la, u ka ko haramulenw ye a dimin.
[17] Jinɛ minw tɛ Ala ye, u tun tɛ bato fɛn minw dɔn, ni bato fɛn kuraw bɔlen don, aw bɛnbaw ma siran minw ɲɛ, u ye olu sɔn.
[18] Farakurun min ye i bange, i ye o bila, Ala min ye i da, i ɲinɛna o kɔ.
[19] «Matigi ye u ye, a diminna u kɔrɔ, katuguni a denkɛw ni a denmusow ye a dusu kasi.
[20] A ko: ‹Ne na neɲɛda dogo u la, ne na u laban ko filɛ, katuguni nin siya ka jugu, den kanntanw don.
[21] Fɛn min tɛ Ala ye, u ye o keleya don ne la. U ye ne dusu kasi ni u ka bato fɛn fufafuw ye. Siya min tɛ siya sɛbɛ ye, ne fana na o keleya don u la. Ne na u dusu kasi ni siya hakilintan dɔ ye.
[22] K'a masɔrɔ ne ka dimiya tasuma manana, a na jenili kɛ fo ka se lahara dan ma. A na dugukolo ni a kan fɛnw jeni, a na kuluw jusigilanw jeni.
[23] Ne na ko jugu sifa bɛɛ lase u ma, ka ne ka biɲɛw bon u ma.
[24] U na fasa kɔngɔ fɛ, ka u barika ban farigwan ni fiɲɛbana fɛ. Ne ye wara farinmaw ci u cɛma, ani sa bagamaw.
[25] Npan na u faga kɛnɛma, siran kobaw na u faga so kɔnɔ. Saya na mɔgɔ bɛɛ sɔrɔ, cɛkɔrɔbaw ni sinminnaw na halaki.
[26] Ne tun y'a fɔ ko ne na u halaki ka u nɔ ban ka bɔ mɔgɔw cɛma.
[27] Ne siranna u juguw kana na nenili kɛ, u la ɲinibaaw kana na lafili. Olu kan'a fɔ ko: «An yɛrɛw bolo barika tun ka bon, Matigi ma foyi kɛ.» ›
[28] «Nin siya ye siya lafililen de ye, hakilintanw don.
[29] Ni hakili tun bɛ u fɛ, u tun na faamuli kɛ. Ko min tun na se u ma, u tun na miiri o la.
[30] Ni u ka farakurun tun ma u feere, ni Matigi tun ma u bila, mɔgɔ kelen tun bɛ se ka mɔgɔ waa kelen gɛn cogo di, mɔgɔ fila tun bɛ se ka mɔgɔ waa tan gɛn cogo di?
[31] K'a masɔrɔ hali an juguw b'a fɔ ko, u ka ala tɛ Israɛl ka Ala bɔ,
[32] katuguni u ka rezɛn sun ye Sodɔmɛ ta bɔɲɔgɔnko ye, u ka sɛnɛ kɛ yɔrɔ ye Gomɔrɛ taɲɔgɔn ye. Baga bɛ u ka rezɛn mɔ la. U ka rezɛn tusuuw ka kuna.
[33] U ka diwɛn ye sa baga ye, fɔnfɔnnin baga yɛrɛ don.
[34] «O maralen tɛ ne fɛ wa? A da tugulen tɛ ne ka nafolo mara yɔrɔw kɔnɔ wa?
[35] Ne de ye hakɛ bɔbaa ni sarali kɛbaa ye, ni u sen talonna tuma min na. K'a masɔrɔ u halaki don surunyara, u ka bɔnɛ bɛ tɛliya ka na.
[36] Katuguni Matigi na a ka mɔgɔw ka kiri tigɛ, a na hinɛ a ka jɔnw la, ni a y'a ye ko u barika dɛsɛra tuma min na, ko dɛmɛbaa si tɛ u fɛ, jigi sɛmɛ yɔrɔ si tɛ u la.
[37] O tuma la a na a ka mɔgɔw ɲininka ko: ‹Aw ka bato fɛnw bɛ mini? Aw ye farakurun kɛ aw dogo yɔrɔ ye,
[38] o bato fɛn minw ye aw ka sarakaw kɛn dun ani aw ka saraka bɔntaw diwɛn min, olu bɛ min? Olu ka wuli ka aw dɛmɛ sa, ka kɛ aw dogo yɔrɔ ye.›
[39] «Aw yɛrɛw k'a dɔn sisan ko ne, ne ye Ala yɛrɛ de ye, ko ala wɛrɛ si tɛ ne kɔ. Ne bɛ saya kɛ, ne bɛ ɲɛnamaya di. Ne bɛ joginni kɛ, ne bɛ kɛnɛyali kɛ. Mɔgɔ si tɛ se ka fɛn tila ka bɔ ne bolo.
[40] Ɔwɔ, ne bɛ ne bolo kɔrɔta san fɛ k'a fɔ ko: ‹Neɲɛnama bɛ to badaa.›
[41] Ni ne ye ne ka npan manamanatɔ da diya, ni ne bolo ye kiri ko daminɛ, ne na ne hakɛ bɔ ne juguw la ka ne koniyabaaw sara.
[42] Ne ka npan na sogo dun. Ne na ne ka biɲɛw lamin joli la fo ka u ɲɛnamini, mɔgɔ joginnenw ni mɔgɔ cɛlenw ani juguw kuntigiw kunkolow joli kɔni.
[43] «Siyaw, a' ye Matigi ka mɔgɔw tanuli dɔnkili da, k'a masɔrɔ Matigi na a ka jɔnw joli hakɛ bɔ, ka a mɔnɛ bɔ a juguw la, ka jamana ni a ka mɔgɔw ka jurumu kafari.»
[44] Musa nana ni Nun denkɛ Josue ye ka o dɔnkili kumaw fɔ Israɛl jama bɛɛ ye.
[45] Musa tilara o kumaw bɛɛ fɔli la Israɛl bɛɛ ɲɛ na tuma min na,
[46] a y'a fɔ u ye ko: «Ne ye ci minw fɔ aw ye bi, aw ka olu mara aw dusukun na, ka aw denw kalan u la, walisa u ka nin sariya kumaw bɛɛ mara ka u kɛ.
[47] K'a masɔrɔ o tɛ fɛn fufafu ye aw ye, aw ka ɲɛnamaya de don. Aw bɛ Jurdɛn ba tigɛ ka don jamana min kɔnɔ ka kɛ aw ta ye, o n'a to aw ka si caman sɔrɔ o kɔnɔ.»
[48] O don yɛrɛ la, Matigi y'a fɔ Musa ye ko:
[49] «I ka yɛlɛn ka taa Abarim kuluw yɔrɔ la, Nebɔ kulu kuncɛ la Moab jamana la, Jeriko kuntilenna la. Ne bɛna Kanan jamana min di Israɛl bɔnsɔn ma ka kɛ a ta ye, i ka o filɛ.
[50] I bɛ yɛlɛn ka taa kulu min kan, i na sa yen, i na kafo i ka mɔgɔw kan, i ko i kɔrɔkɛ Aron sara Hor kulu kan ka kafo a ka mɔgɔw kan cogo min na.
[51] K'a masɔrɔ aw ye ne hakɛ ta Israɛl bɔnsɔn cɛma Mɛriba jiw yɔrɔ la, o ye Kadɛs ye Sen kungokolon kɔnɔ. Aw ma ne saniya Israɛl bɔnsɔn cɛma.
[52] Ne bɛna jamana min di Israɛl bɔnsɔn ma, i na o ye i ɲɛ la, nka i tɛna don a kɔnɔ fewu.»