[1] Ala ka cɛ Musa ye duba minw kɛ Israɛl bɔnsɔn ye sani a ka sa, o filɛ ninw ye.
[2] A ko: «Matigi nana ka bɔ Sinayi, a wulila ka bɔ Seir ka taa u yɔrɔ. A manamanana k'a to Paran kulu kan. A nana ka bɔ senuma dama dɔnbaliw cɛma. A ye a ka sariya tasumama di u ma ni a kinin bolo ye.
[3] Ɔwɔ, a bɛ a ka mɔgɔw kanu, a ka senumaw bɛɛ bɛ a bolo. U ye u jɔ a sen kɔrɔ, u ye a ka kuma sɔrɔ.
[4] Musa ye sariya di an ma, o ye Yakuba ka jama ciyɛn ye.
[5] Matigi kɛra Israɛl ka masakɛ ye, mɔgɔw kuntigiw ni Israɛl siyaw bɛɛ ye u lajɛ tuma min na.
[6] «Rubɛnɲɛnama ka to, a kana sa fewu. A ka cɛw ka jiidi.»
[7] A ye min fɔ Juda ta fan fɛ, o filɛ: «Matigi, i tulo majɔ Juda kan na, ka kɔsegin a ka mɔgɔw cɛma. A bolow barika ka bonya, i ka kɛ a dɛmɛbaa ye a juguw kama.»
[8] Levi ta fan fɛ a ko: «Tumim ni urim kalifara mɔgɔ senuma ma, i ye o min kɔrɔbɔ ka i to Masa, i ye a kɛlɛ Mɛriba jiw yɔrɔ la.
[9] Levi y'a fɔ a fa ni a ba ta fan fɛ ko a ma u ye. A ma a balimaw jate. A ma a yɛrɛ denw dɔn. K'a masɔrɔ u ye i ka kuma mara ka i ka layidu kɔlɔsi.
[10] U na Yakuba kalan i ka ko latigɛlen na, ka Israɛl kalan i ka sariya la. U bɛ wusulan suma duman wusu i nun kɔrɔ, ka saraka jenitaw lase i ka saraka bɔlan kan.
[11] Matigi, i ka duba a fanga ye, ka sɔn a bolo ka kɛtaw ma. I ka a juguw ni a koniyabaaw solow kari, walisa olu kana wuli tun.»
[12] Benjamɛn ta fan fɛ, a ko: «Matigi ka kanulen don, a lakanalen na sigi a ka Ala kɛrɛ fɛ. Matigi na biri a kunna ka a kɔlɔsi tuma bɛɛ. A na sigi Matigi kamanw jukɔrɔ.»
[13] Yusufu ta fan fɛ, a ko: «A ka jamana ye duba sɔrɔ Matigi fɛ, ani sankolola nili fɛn fisamaw, o ye ngomi ye ani ji dunba minw bɛ dugukolo jukɔrɔ,
[14] ani tile bɛ nafa fisama minw bɔ, ani nafa fisama minw bɛ sɔrɔ kalo o kalo,
[15] ani kulu kɔrɔlen la fɛnɲumanɲumanw ani tintin banbaliw la fɛn fisamaw,
[16] ani dugukolo ni a kan fɛn fisamaw. Nin min y'i jira jirini cɛma, o ka duba ka da Yusufu kan, duba ka da a balimaw kuntigi kan.
[17] A barika ka bon i ko ntura barika. A biɲɛkolow bɛ i ko sigi biɲɛkolow. Kelen ye Efrayim den dama dɔnbaliw ye, kelen ye Manase den waa caman caman ye. A na siyaw bɛɛ tuu ni u ye, fo ka taa se dugukolo dan na.»
[18] Zabulɔn ta fan fɛ, a ko: «Zabulɔn, i ka ɲagali i ka taama kow la. Isakar, i fana ka ɲagali ka i to i ka finisow kɔnɔ.
[19] U na siyaw wele ka taa kulu kan, u na tilennenya sarakaw faga yen. K'a masɔrɔ u na balo ni kɔgɔji la fɛn caman caman ye, ani nafolo min dogolen bɛ cɛncɛn na.»
[20] Gad ta fan fɛ, a ko: «Min bɛ Gad dan yɔrɔ bonya, o ye dubaden ye. Gad dalen bɛ i ko waraba muso, a bɛ bolokala ni kuncɛ farafara.
[21] A ye jamana fɛn fɔlɔɲɛnatɔmɔ a yɛrɛ ye, k'a masɔrɔ kuntigi niyɔrɔ maralen tun bɛ yen. A ye jamaɲɛ minɛ. A ye Matigi ka tilennenya kow ɲɛnabɔ, ka a ka ko fɔlenw kɛ Israɛl ye.»
[22] Dan ta fan fɛ, a ko: «Dan ye waraba kamalen ye, a bɛ pan ka bɔ Basan.»
[23] Nefitali ta fan fɛ, a ko: «Nefitali, i wasaraɲumaya la, ka fa Matigi ka dubaw la. I ka tilebi yanfan ni worodugu yanfan minɛ ka kɛ i ta ye.»
[24] Asɛr ta fan fɛ, a ko: «Asɛr ka duba sɔrɔ Israɛl bɔnsɔn cɛma, a ko ka diya a balimaw ye. A ka a sen su tulu la.
[25] I ka dala kon sɔgɔlanw na kɛ nɛgɛfin ni nsiranɛgɛ ye. I fanga ni i si tilew na dama kɛɲɛ.
[26] Israɛl ka Ala bɔɲɔgɔnko si tɛ. A yɛlɛnna sankabaw kan ka na i dɛmɛ. A ni a danbe yɛlɛnna sankolow kan ka na.
[27] Ala banbali ye i dogo yɔrɔ ye. Bolo banbaliw bɛ i kɔrɔ. A ye i juguw gɛn ka bɔ i ɲɛ. A ko: ‹I ka halakili kɛ.›
[28] Israɛl lakanalen bɛ i sigi. Yakuba ka ji boyiw bɛ a dan na, sɛnɛ suman ni diwɛn jamana la. Ɔwɔ, sankolo bɛ a sɔn ni ngomi ye.
[29] Israɛl, i ye dubaden ye. Jɔn bɛ i ko e? I ye siya kisilen ye Matigi fɛ. Ale de ye i ka nɛgɛ bɛnnan ye ka i dɛmɛ, ani npan min na kɛ i nɔɔrɔ ye. I juguw na majigin i ɲɛ kɔrɔ, e kɔni, i na u ka yɔrɔ kɔrɔtalenw cɔngɔ i sen kɔrɔ.»