[1] Musa ni Israɛl cɛkɔrɔbaw y'a fɔ mɔgɔw ye k'a gɛlɛya ko: «Ne bɛ ci minw fɔ aw ye bi, aw ka olu bɛɛ mara.
[2] Matigi i ka Ala bɛ jamana min di i ma ni aw ye Jurdɛn ba tigɛ ka don yen tuma min na, i ka kabakurunbaw sogolon ka u mun ni laso ye.
[3] Ni i ye ba tigɛ ka don o jamana la, i ka nin sariya kumaw bɛɛ sɛbɛn o kabakurunw kan. Matigi i ka Ala bɛ o jamana di i ma, a falen bɛ nɔnɔ ni di la fo ka woyo, i ko Matigi i bɛnbaw ka Ala y'a fɔ i ye cogo min na.
[4] Jurdɛn ba tigɛlen kɔ aw fɛ, aw ka o kabakurunw sogolon Ebal kulu kan ka u mun ni laso ye i ko ne y'a fɔ aw ye bi cogo min na.
[5] I ka saraka bɔlan jɔ Matigi i ka Ala ye yen ni kabakurunw ye. I kana nɛgɛma fɛn si kɛ k'a dɛsɛ.
[6] I ka Matigi i ka Ala ka saraka bɔlan jɔ ni kabakurun dɛsɛbaliw ye, ka saraka jenitaw lase o saraka bɔlan kan Matigi i ka Ala ye.
[7] I ka nisɔndiya sarakaw faga ka dumuni kɛ yen ka ɲagali Matigi i ka Ala ɲɛ kɔrɔ.
[8] I ka nin sariya kumaw bɛɛ sɛbɛn o kabakurunw kan ka u jɛya.»
[9] O kɔ, Musa ni sarakalasebaaw Levitew kumana Israɛl bɛɛ fɛ ko: «Israɛl, i tulo majɔ ka lamɛnni kɛ. I kɛra Matigi i ka Ala ka siya ye bi.
[10] I ka Matigi i ka Ala kan minɛ. Ne bɛ a ka ciw ni a ka sariya sigilen minw fɔ i ye bi, i ka olu mara ka u kɛ.»
[11] O donw yɛrɛ la Musa y'a fɔ mɔgɔw ye k'a gɛlɛya ko:
[12] «Jurdɛn ba tigɛlen kɔ aw fɛ, siya minw na u jɔ Garizim kulu kan ka dubaw kɛ mɔgɔw ye, olu filɛ ninw ye: Simeɔn ni Levi ni Juda ni Isakar ni Yusufu ani Benjamɛn.
[13] Siya minw na u jɔ Ebal kulu kan ka dangali kɛ, olu filɛ ninw ye: Rubɛn ni Gad ni Asɛr ni Zabulɔn ni Dan ani Nefitali.
[14] Levitew ka pɛrɛn k'a fɔ Israɛl bɛɛ ye ko:
[15] ‹Ja dɛsɛnen ni nɛgɛ yeelelen ja minw haramulen bɛ Matigi fɛ, olu ye numu bolo baara nɔ ye. Mɔgɔ min ye olu dila ka u jɔ yɔrɔ dogolen na, o tigi dangalen bɛ.› «Mɔgɔw bɛɛ ka u jaabi k'a fɔ ko: ‹Amiina.›
[16] ‹Mɔgɔ min bɛ a fa wala a ba mafiɲɛya, o dangalen bɛ.› Mɔgɔw bɛɛ k'a fɔ ko: ‹Amiina.›
[17] ‹Mɔgɔ min bɛ a sigiɲɔgɔn ka dugukolo dancɛ yɛlɛma, o dangalen bɛ.› Mɔgɔw bɛɛ k'a fɔ ko: ‹Amiina.›
[18] ‹Mɔgɔ min bɛ fiyentɔ lafili k'a bɔ sira la, o dangalen bɛ.› Mɔgɔw bɛɛ k'a fɔ ko: ‹Amiina.›
[19] ‹Mɔgɔ min bɛ siginfɛ ni falatɔ ni muso cɛ salen ka kiri tiɲɛn, o dangalen bɛ.› Mɔgɔw bɛɛ k'a fɔ ko: ‹Amiina.›
[20] ‹Mɔgɔ min dara a fa muso fɛ, o dangalen bɛ, sabu a ye a fa maloya.› Mɔgɔw bɛɛ k'a fɔ ko: ‹Amiina.›
[21] ‹Mɔgɔ min dara bagan sifa o sifa fɛ, o dangalen bɛ.› Mɔgɔw bɛɛ k'a fɔ ko: ‹Amiina.›
[22] ‹Mɔgɔ min dara a fa denmuso wala a ba denmuso fɛ, o dangalen bɛ.› Mɔgɔw bɛɛ k'a fɔ ko: ‹Amiina.›
[23] ‹Mɔgɔ min dara a muso bangeba fɛ, o dangalen bɛ.› Mɔgɔw bɛɛ k'a fɔ ko: ‹Amiina.›
[24] ‹Mɔgɔ min bɛ a mɔgɔɲɔgɔn faga dogo la, o dangalen bɛ.› Mɔgɔw bɛɛ k'a fɔ ko: ‹Amiina.›
[25] ‹Mɔgɔ min bɛ mɔgɔ jalakibali fagali sara minɛ, o dangalen bɛ.› Mɔgɔw bɛɛ k'a fɔ ko: ‹Amiina.›
[26] ‹Mɔgɔ min tɛ nin sariya kumaw bɛɛ mara ka u taama, o dangalen bɛ.› Mɔgɔw bɛɛ k'a fɔ ko: ‹Amiina.›»