[1] «Ni i ye i sigiɲɔgɔn ka misi wala a ka saga tununnen ye, i kana i yɛrɛ kɛ i n'a fɔ i m'a ye, nka i ka a lasegin i sigiɲɔgɔn ma.
[2] Ni i sigiɲɔgɔn yɔrɔ ka jan i la, wala n'i tɛ bagantigi dɔn, i ka taa ni a ye i ka so k'a mara yen fo i sigiɲɔgɔn ka a ɲini tuma min na. O tuma la i k'a di a ma.
[3] «I ka o kɛ a ka fali ko la, i ka o kɛ a ka fini ko la. I sigiɲɔgɔn ka fɛn o fɛn tununna, n'i y'a ye, i ka o kɛ olu sifa bɛɛ ko la. I kana i yɛrɛ kɛ i n'a fɔ i ma u ye.
[4] N'i ye i sigiɲɔgɔn ka fali wala a ka ntura bilen ye sira kan, i kana a kɛ i n'a fɔ i m'a ye, nka i k'a dɛmɛ ka o lawuli.
[5] «Muso kana cɛ fini don, cɛ fana kana muso fini don, mɔgɔ o mɔgɔ bɛ o kɛ, o ko man di Matigi i ka Ala ye fewu.
[6] «Ni i ye kɔnɔɲaa ye sira da la, jiri la wala duguma, ni kɔnɔ fanw wala kɔnɔ denw b'a la k'a sɔrɔ kɔnɔ ba birilen bɛ denw wala fanw kan, i kana kɔnɔ ba ni a denw taɲɔgɔn fɛ.
[7] I bɛ se ka denw ta nka i ka kɔnɔ ba bila ka taa, walisa i ka to hɛrɛ la ka si tile caman sɔrɔ.
[8] «Ni i ye so kura jɔ, i ka a kan kun lamini ni kogo ye walisa mɔgɔ kana bi ka bɔ a san fɛ, o kana kɛ i nɔ ye ka hakɛ lase i ka so ma.
[9] «I kana danni fɛn sifa fila dan i ka rezɛn nakɔtu la, walisa i kana na bɔnɛ i ka suman ni i ka rezɛn mɔ sɔrɔlen fila bɛɛ la.
[10] «I kana ntura ni fali siriɲɔgɔn na ka sɛnɛ kɛ n'u ye.
[11] «Fini min dilara ni sagasi ni lenfu kolonsolen ye, i kana o don.
[12] «I ka bunsan kɛ i ka fini donta seleke naani la.
[13] «Ni cɛ dɔ ye muso furu ka don a fɛ, o kɔ, ni a ko ma diya a ye fewu,
[14] ni a ye muso maloya kow fɔ a ma k'a tɔgɔ tiɲɛn ko a y'o muso furu tuma min na, a m'o sɔrɔ so,
[15] o tuma la denmuso fa ni a ba ka a ka dali fini ta ka taa a jira dugu cɛkɔrɔbaw la dugu donda la.
[16] Muso fa k'a fɔ dugu cɛkɔrɔbaw ye ko ne ye ne denmuso furu nin cɛ ma, nka a ko man di a ye fewu.
[17] A ye maloya kow fɔ a ma ko a ma ne denmuso sɔrɔ so. O bɛɛ n'a ta ne denmuso ka dali fini filɛ nin ye. U ka o dali fini fɛnsɛ duguma cɛkɔrɔbaw ɲɛ kɔrɔ.
[18] O tuma la dugu cɛkɔrɔbaw ka o cɛ minɛ k'a gosi,
[19] k'a ɲangi, a ka warijɛ kɛmɛ di denmuso fa ma, sabu a ye Israɛl bɔnsɔn npogotigi dɔ tɔgɔ tiɲɛn. O muso ka to a fɛ, a tɛ se k'a furu sa a si tile bɛɛ la.
[20] Nka ni o ko ye tiɲɛ ye, ni o denmuso ma sɔrɔ so,
[21] o tuma la u ka o denmuso bɔ k'a jɔ a fa ka so da la. O dugu cɛw k'a bon ni kabakurunw ye k'a faga, sabu a ye maloya ko kɛ Israɛl cɛma, ka kakalaya kɛ a fa ka so kɔnɔ. O cogo la i na o ko jugu ban i cɛma.
[22] «Ni cɛ dɔ dalen yera muso furulen fɛ, u fila bɛɛ ka faga, cɛ min dara muso fɛ ani o muso fana. O cogo la i na ko jugu ban Israɛl cɛma.
[23] «Ni npogotigi dɔ maminɛna cɛ dɔ fɛ, ni cɛ dɔ wɛrɛ y'a ye dugu kɔnɔ ka da a fɛ,
[24] aw ka taa ni u fila bɛɛ ye dugu donda la ka u bon ni kabakurunw ye ka u faga. O denmuso ka faga sabu a ma kulo k'a to dugu kɔnɔ. Cɛ ka faga sabu a ye a sigiɲɔgɔn muso tiɲɛn. O cogo la i na o ko jugu ban i cɛma.
[25] Nka ni cɛ ye npogotigi maminɛlen ye kungo la ka a karaba ka da a fɛ, cɛ min dara a fɛ, o kelenpe ka faga.
[26] I kana foyi kɛ denmuso la. Fagali sababu si t'a la o jurumu ko la. O ko kɛra i n'a fɔ cɛ wulila a cɛɲɔgɔn kama k'a faga,
[27] katuguni cɛ ye npogotigi maminɛlen ye kungo la, a kulola nka mɔgɔ si tun tɛ yen k'a tila.
[28] «Ni cɛ ye npogotigi maminɛbali ye ka a minɛ ka da a fɛ, ni u yera,
[29] cɛ min dara a fɛ, o ka warijɛ biduuru di denmuso fa ma. Denmuso ka kɛ a muso ye sabu a y'a tiɲɛn. A tɛ se ka a furu sa a si tile bɛɛ la.
[30] «Cɛ kana a fa muso ta, a kana a fa maloya.