[1] «I ka Abib kalo kɔlɔsi ka Tɛmɛnkan seli kɛ Matigi i ka Ala ye sabu Matigi i ka Ala ye i labɔ Misira jamana la su fɛ Abib kalo la.
[2] Matigi na yɔrɔ min ɲɛnatɔmɔ ka a tɔgɔ da o kan, i ka Tɛmɛnkan saraka faga Matigi i ka Ala ye yen, ka bɔ bagan kunbaw ni bagan misɛnw la.
[3] I kana o saraka sogo ni buuru fununnen si dunɲɔgɔn fɛ, nka i ka a ni buuru fununbali dun tile wolonwula kɔnɔ. O ye dumuni tɔɔrɔma ye, walisa i bɔra Misira jamana la tɛliya la don min na, i hakili ka to o la i si tilew bɛɛ la.
[4] Buurufunun fɛn si kana ye i ka jamana yɔrɔ si la tile wolonwula kɔnɔ. I bɛ saraka minw faga a tile fɔlɔ wula da fɛ, o sogo tɔ si kana si.
[5] Matigi i ka Ala bɛ dugu minw di i ma, i kana Tɛmɛnkan saraka faga o si kɔnɔ,
[6] nka Matigi i ka Ala na yɔrɔ min ɲɛnatɔmɔ ka a tɔgɔ da o kan, i ka Tɛmɛnkan saraka faga yen wula da fɛ tile bi tuma la, ka kɛɲɛ ni i bɔ waati ye Misira jamana la.
[7] I ka a sogo tobi k'a dun Matigi i ka Ala ka yɔrɔɲɛnatɔmɔlen na. O dugusajɛ i ka kɔsegin ka taa so.
[8] I ka buuru fununbali dun tile wɔɔrɔ kɔnɔ. Tile wolonwulanan don, jamalajɛ senuma ka kɛ Matigi i ka Ala ye. I kana baara si kɛ o don na.
[9] «I ka dɔgɔkun wolonwula jate. I ye wɔlɔsɔ don i ka suman kantaw la tuma min na, i ka o dɔgɔkun wolonwula jateli daminɛ o tuma la.
[10] O kɔ, i ka diyaɲe nili fɛnw bɔ ka dɔgɔkunw seli kɛ Matigi i ka Ala ye. I ka nili kɛ ka kɛɲɛ ni Matigi i ka Ala ka duba dalen ye i kan.
[11] Matigi i ka Ala na yɔrɔ min ɲɛnatɔmɔ ka a tɔgɔ da o kan, i ka ɲagali Matigi i ka Ala ɲɛ kɔrɔ yen, i ni i denkɛ ni i denmuso ni i ka jɔnkɛ ni i ka jɔnmuso ni Levite min bɛ i ka dugu kɔnɔ ani siginfɛ ni falatɔ ani muso cɛ salen minw bɛ i cɛma.
[12] I hakili ka to a la ko i tun ye jɔn ye Misira jamana la. I ka nin sariya sigilenw mara ka u kɛ.
[13] «Ni i ye i ka gendekɛnɛ la suman lasagon ka i ka rezɛn ji bɔ yɔrɔ diwɛn ladon tuma min na, i ka gwakɔrɔsigi seli kɛ tile wolonwula kɔnɔ.
[14] I ka ɲagali o seli la, i ni i denkɛ ni i denmuso ni i ka jɔnkɛ ni i ka jɔnmuso ni Levite ni siginfɛ ni falatɔ ani muso cɛ salen minw bɛ i ka dugu kɔnɔ.
[15] I ka o seli kɛ tile wolonwula kɔnɔ Matigi i ka Ala ye Matigi ka yɔrɔɲɛnatɔmɔlen na. I ka ɲagali katuguni Matigi i ka Ala dubara i ye i ka fɛn sɔrɔlenw bɛɛ ani i bolo baaraw bɛɛ la.
[16] «I ka cɛw bɛɛ ka taa u jira Matigi i ka Ala ɲɛ kɔrɔ a ka yɔrɔɲɛnatɔmɔlen na siɲɛ saba san o san, buuru fununbali seli ni dɔgɔkunw seli ani gwakɔrɔsigi seli fɛ. U bolo lankolon kana taa Matigi ɲɛ kɔrɔ.
[17] U bɛɛ kelen-kelen se ko ye min ye, u ka o di ka kɛɲɛ ni Matigi i ka Ala ka duba dalenw ye u kan.
[18] «Matigi i ka Ala bɛ dugu min di i ma, i ka kiritigɛlaw ni kuntigiw sigi olu bɛɛ kɔnɔ ka kɛɲɛ ni i ka siyaw ye, u ka kiri tigɛ mɔgɔw kan ni tilennenya ye.
[19] I kana kiri ko yɛlɛma, i kana mɔgɔ bɔ mɔgɔ la, i kana surɔ fɛn minɛ k'a masɔrɔ surɔ fɛn bɛ hakilitigiw ɲɛw fiyen ka mɔgɔ tilennenw ka kuma jɛngɛ.
[20] I ka tugu tilennenya dɔrɔn na, walisa i ɲɛnama ka to ani Matigi i ka Ala bɛ jamana min di i ma, o ka kɛ i ta ye.
[21] «I bɛ saraka bɔlan min jɔ Matigi i ka Ala ye, i kana jiri si kɛ Astarte boli ye o kɛrɛ fɛ.
[22] I kana boli samasen jɔ fana, o ko man di Matigi i ka Ala ye fewu.