[1] «Ni cɛ ye muso furu, ni o ko ma diya a ye sabu a ye ko bɛnbali dɔ sɔrɔ o la, o tuma la a ka furusa sɛbɛn dila a ye k'a don a bolo k'a bila ka bɔ a ka so.
[2] A bɔlen kɔ a ka so, ni a taara kɛ cɛ wɛrɛ muso ye,
[3] ni a ko ma diya cɛ filanan ye, ni o cɛ ye furusa sɛbɛn dila a ye k'a don a bolo k'a bila ka bɔ a ka so, wala ni a cɛ filanan sara,
[4] o tuma la cɛ min fɔlɔ y'a bila, o tɛ se ka a furu ko kura, a nɔgɔlen don o ye, k'a masɔrɔ o ye ko haramulen ye Matigi fɛ. Matigi i ka Ala ye jamana min di i ma ciyɛn ye, i kana jurumu kɛ o kɔnɔ.
[5] «Cɛ furu kɛlen kura kana taa sɔrɔdasiya la, a kana bila baara si la. A fɛrɛlen ka to so ka san kelen kɛ walisa a ye muso min furu, a ka o nisɔndiya.
[6] «Mɔgɔ si kana wugu wala a den minɛ juru kun kɔrɔ, katuguni o bɛ i n'a fɔ o tigi bɛ mɔgɔ ni minɛ juru kun kɔrɔ.
[7] «Ni mɔgɔ dɔ yera a sigiɲɔgɔn Israɛl bɔnsɔn dɔ sonyali la ko a b'a kɛ jɔn ye wala a b'a feere, o nson ka faga. O cogo la i ka o ko jugu ban i cɛma.
[8] «Ni kuna bɔra mɔgɔ dɔ la, sarakalasebaaw Levitew bɛ aw dege cogo min na, i ka o kɔlɔsi ka o bɛɛ kɛ. Ne ye ci minw fɔ u ye, aw ka aw janto olu la ka u kɛ.
[9] Matigi i ka Ala ye min kɛ Mariyama la, ka aw to sira la aw bɔlen kɔ Misira jamana la, o kana bɔ aw kɔnɔ.
[10] «Ni i ye fɛn dɔ juru don i sigiɲɔgɔn la, fɛn min bɛ bila o juru kun kɔrɔ, i kana don a ka so kɔnɔ ka o minɛ.
[11] I ka to kɛnɛma. I ye o fɛn juru don mɔgɔ min na, o yɛrɛ ka taa ni o kun kɔrɔ fɛn ye kɛnɛma k'a di i ma.
[12] Ni faantan ye a ka dulɔki bila fɛn dɔ kun kɔrɔ, a ka dulɔki kana si i bolo,
[13] nka i k'a kɔsegin a ma tile bi tuma la walisa a k'a da a yɛrɛ ka dulɔki la ka dubaw kɛ i ye. O na jate tilennenya ye i ye Matigi i ka Ala ɲɛ kɔrɔ.
[14] «I kana i fanga digi baaraden sarata faantan kɔlibaatɔ la, ni a kɛra i sigiɲɔgɔn ye wala siginfɛ min bɛ i ka dugu dɔ kɔnɔ.
[15] I ka a ka sara di a ma tile bi da fɛ, tile kana bi k'a sara to i bolo, sabu faantan don, a bɛ a jigi da o sara kan. A kana na kasi Matigi nɔ fɛ i kama, o na kɛ jurumu ye i la.
[16] «Faw kana faga u denw ka jurumu kɛlenw kosɔn. Denw kana faga u faw ka jurumu kɛlenw kosɔn. Mɔgɔ bɛɛ kelen-kelen ka faga a yɛrɛ ka jurumu kɛlenw kosɔn.
[17] «I kana siginfɛ wala falatɔ ka kiri tiɲɛn. I kana muso cɛ salen ka fini minɛ juru kun kɔrɔ.
[18] I hakili to a la ko i yɛrɛ tun ye jɔn ye Misira jamana la, ko Matigi i ka Ala ye i kunmabɔ ka bɔ yen. O de y'a to ne bɛ nin ciw fɔ i ye ko i ka u kɛ.
[19] «Ni i bɛ i ka foro suman tigɛ, n'i ɲinɛna kansiri dɔ kɔ, i kana kɔsegin ka taa o ta. O ka kɛ siginfɛ ni falatɔ ani muso cɛ salen ta ye, walisa Matigi i ka Ala ka duba i ye i bolo baara bɛɛ la.
[20] Ni i bɛ olive sun gosi, i kana a gosi siɲɛ fila, a tɔ na kɛ siginfɛ ni falatɔ ni muso cɛ salen ta ye.
[21] Ni i bɛ i ka rezɛn mɔ kari, i kana segin k'a nɔɔrɔ ɲini. O na kɛ siginfɛ ni falatɔ ni muso cɛ salen ta ye.
[22] I hakili to a la ko i tun ye jɔn ye Misira jamana la. O de y'a to ne bɛ nin ciw fɔ i ye ko i ka u kɛ.