[1] «Ne bɛ ci minw fɔ aw ye bi, aw ka olu mara ka u kɛ, walisa aw ɲɛnama ka to ka jiidi, walisa Matigi y'i kali aw bɛnbaw ye jamana min ko la, aw ka don yen ka a tigiya minɛ.
[2] «Matigi i ka Ala ye i ɲɛ minɛ sira min fɛ san binaani kɔnɔ kungokolon kɔnɔ, i hakili to o bɛɛ la. O kɛra walisa ka i majigin ka i kɔrɔbɔ ka i kɔnɔna ko dɔn, k'a filɛ yala ni i bɛ sɔn ka a ka ci fɔlenw mara wala ni i tɛ sɔn.
[3] A y'i majigin, ka a to kɔngɔ ka i minɛ. A ye i balo manɛ la. I tun ma o dɔn, i bɛnbaw fana tun ma o dɔn. A ye o kɛ walisa ka i kalan ko mɔgɔ tɛ balo dumuni fɛn dama la, nka fɛn o fɛn bɛ bɔ Matigi da la, mɔgɔ bɛ balo o de la.
[4] I ka finiw ma kɔrɔ i kan na ka u fara. I sen ma funun o san binaani kɔnɔ.
[5] A ka to i kɔnɔ ko Matigi i ka Ala bɛ i gosi ka i kolo i ko cɛ bɛ a den gosi k'a kolo cogo min na.
[6] «I ka Matigi i ka Ala ka ci fɔlenw mara, i ka a ka siraw taama ka siran a ɲɛ,
[7] k'a masɔrɔ Matigi i ka Ala bɛ i ladon jamanaɲuman kɔnɔ, kɔw ni ji boyiw ani ji dunbaw bɛ woyo kuluw furancɛw ni tintinw kan o jamana kɔnɔ.
[8] Alikama ni orje suman jamana don. Rezɛn sunw ni toro sunw ni gerenati sunw ni olive sun tulumaw ani di jamana don.
[9] I na dumuni caman kɛ o jamana la, fɛn si tɛna dɛsɛ i la yen. O jamana kabakurunw ye nɛgɛfin ye. I na tintinw sen ka nsiranɛgɛ bɔ u la.
[10] N'i ye dumuni kɛ k'i fa tuma min na, i ka Matigi i ka Ala tanu, o min ye o jamanaɲuman di i ma.
[11] I yɛrɛ kɔlɔsi, i kana ɲinɛ Matigi i ka Ala kɔ. Ne bɛ ciw ni ko fɔlenw ni sariya sigilen minw ko fɔ i ye bi, i kana ban olu marali ma.
[12] N'i ye dumuni kɛ k'i fa ka soɲumanw jɔ ka sigi u kɔnɔ tuma min na,
[13] k'a ye ko i ka bagan kunbaw ni i ka bagan misɛnw cayara, ko i ka warijɛ ni i ka sanu ani i bolo fɛnw bɛɛ cayara,
[14] o tuma la i ka i yɛrɛ kɔlɔsi, i kana i yɛrɛ bonya ka ɲinɛ Matigi i ka Ala kɔ, o min ye i labɔ Misira jamana jɔnya so la.
[15] A nana ni i ye ka o kungokolonba cɛ tigɛ, siran fɛn caman b'a la. Sa tasumamaw ni bunteniw ani yɔrɔ jalen jintanw bɛ yen. A ye ji bɔ i ye kɛrɛbɔ farakurun la.
[16] A ye i balo ni manɛ ye k'i to kungokolon kɔnɔ, i bɛnbaw ma o min dɔn. A ye i majigin ka i kɔrɔbɔ walisa a ka ko ɲuman kɛ i ye a laban na.
[17] I yɛrɛ kɔlɔsi, i kan'a fɔ i kɔnɔ ko i yɛrɛ fanga ni i bolo barika y'a to i ka nin nafoloba sɔrɔ.
[18] I hakili ka to Matigi i ka Ala la ko ale de bɛ nafolo sɔrɔli fanga di i ma, walisa a y'a kali ka layidu min ta i bɛnbaw ye, a ka o sinsin. A bɛ ten halibi.
[19] «Ni i ɲinɛna Matigi i ka Ala kɔ, ka tugu bato fɛn wɛrɛw nɔ fɛ, ka baara kɛ u ye ka i biri u kɔrɔ, ne b'a fɔ aw ye bi k'a jɛya, ko aw na halaki, siga t'a la.
[20] Aw na halaki i ko Matigi ye siya dɔw halaki ka bɔ aw ɲɛ cogo min na, sabu aw ma sɔn ka Matigi aw ka Ala kan lamɛn.