[1] «Aw ye Matigi aw ka Ala denw ye. Aw kana aw fari cici ka aw kunɲɛfɛla si di su kosɔn,
[2] sabu i ye siya senuma ye Matigi i ka Ala ye. Matigi i ka Ala ye i ɲɛnatɔmɔ ka bɔ dugukolo kan siyaw bɛɛ cɛma ka kɛ a yɛrɛ kelenpe ka siya ye.
[3] «I kana fɛn haramulen si dun.
[4] Aw bɛ se ka sen naanima fɛn minw dun, olu filɛ ninw ye: misi ni saga ni ba,
[5] ani minan ni sɔn ni dajɛ ani mankalan ni sigi ni kɔngɔrɔn ni tankɔn.
[6] Sen naanima fɛn minw ntɔrɔn cilen bɛ ka kɛ fila ye, ni u bɛ ɲa ɲimi kɛ, aw bɛ se ka olu dun.
[7] Nka minw bɛ ɲa ɲimi dama kɛ, wala minw sen ntɔrɔn cilen don dama, aw kana olu si dun. O la, aw kana ɲaamɛ ni sonsanni ni kulubani dun, u bɛ ɲa ɲimi kɛ, nka ntɔrɔn cilen tɛ u la. U nɔgɔlen don aw ye.
[8] Aw kana lɛ dun, a ntɔrɔn cilen don nka a tɛɲaɲimi kɛ. A nɔgɔlen don aw ye. Aw kana a sogo dun, aw kana maga a su la.
[9] «Aw bɛ se ka ji la fɛn minw dun, olu filɛ: nonnikaman ni fara bɛ minw na, aw bɛ se ka olu dun.
[10] Nka nɔnnikaman ni fara tɛ minw na, aw kana olu dun. U nɔgɔlen don aw ye.
[11] «Aw bɛ se ka kɔnɔ jɛlen sifaw bɛɛ dun.
[12] Nka aw kana minw dun, olu filɛ: bɔn ni duga ni kɔgɔji la bɔn,
[13] ni milan ani otur ni duga sifaw bɛɛ,
[14] ani nkankan kɔnɔ sifaw bɛɛ,
[15] ani kɔnɔsogonti ni gingin ni muɛt ani sɛgɛ sifaw bɛɛ,
[16] ani gelu ni ginginba ni bumunkɔrɔ,
[17] ani jumɛn ni kɔrmɔran ni plɔnjɔn,
[18] ani baninkɔnɔ ni tentan sifaw bɛɛ ani hupe ani tonso.
[19] Fɛn fitinin kamanmaw bɛɛ nɔgɔlen don aw ye, aw kana u dun.
[20] Nka aw bɛ se ka kɔnɔ jɛlen sifaw bɛɛ dun.
[21] «Aw kana jufa dun. I bɛ se ka a di i ka dugu kɔnɔ siginfɛ ma, o k'a dun. I bɛ se k'a feere jamana wɛrɛ mɔgɔ ma. I ye siya senuma ye Matigi i ka Ala ye. «I kana baden sogo balabala a ba nɔnɔ la.
[22] «I bɛ sɛnɛ suman min sɔrɔ i ka foro la san o san, i ka o bɛɛ jaka bɔ.
[23] Matigi i ka Ala bɛ yɔrɔ min ɲɛnatɔmɔ k'a tɔgɔ da o kan, i ka suman ni i ka diwɛn kɛnɛ ni i ka tulu jaka ani i ka bagan kunbaw den fɔlɔ ni i ka bagan misɛnw den fɔlɔ, i ka olu bɛɛ dun yen, walisa i ka dege Matigi i ka Ala ɲɛsiran na tuma bɛɛ.
[24] Matigi bɛna yɔrɔ min ɲɛnatɔmɔ k'a tɔgɔ da o kan, ni o yɔrɔ ka jan i ka so la, ni a sira ka jan fo i tɛ se ka taa ni i ka jaka ye yen, ni Matigi i ka Ala dubara i ye tuma min na,
[25] o tuma la i ka i ka jaka feere wari la ka taa ni o wari ye i bolo Matigi i ka Ala ka yɔrɔɲɛnatɔmɔlen na.
[26] Ni i sera yen, fɛn o fɛn ka di i ye, misi wo, saga wo, diwɛn wo, minnifɛn farinma wo, i diyaɲe fɛn, fɛn o fɛn, i ka olu bɛɛ san ni o wari ye. I ni i ka so mɔgɔw bɛɛ ka olu dun Matigi i ka Ala ɲɛ kɔrɔ yen ka ɲagali.
[27] Levite min bɛ i ka dugu kɔnɔ, i kana ɲinɛ o kɔ katuguni a ma niyɔrɔ sɔrɔ, a ma ciyɛn ta i fɛ.
[28] «San saba o san saba, i ka o san sabanan suman jaka bɛɛ bɔ k'a mara i ka dugu kɔnɔ.
[29] O tuma la Levite min ma niyɔrɔ sɔrɔ, a ma ciyɛn ta i fɛ, ale ni siginfɛ ni falatɔ ni muso cɛ salen minw bɛ i ka dugu kɔnɔ, olu bɛɛ ka na ka o dun ka u fa, walisa i bolo bɛ baara o baara kɛ, Matigi i ka Ala ka duba i ye o bɛɛ la.