[1] Matigi ka jɔnkɛ Musa salen kɔ, Matigi y'a fɔ Musa ka baaraden, Nun denkɛ Josue ye ko:
[2] «Ne ka jɔnkɛ Musa sara. Ne bɛ jamana min di Israɛl bɔnsɔn ma, e ni nin mɔgɔw bɛɛ ka wuli ka nin Jurdɛn ba tigɛ sisan ka don o jamana kɔnɔ.
[3] Ni aw sentɛgɛw dara yɔrɔ o yɔrɔ kan, ne bɛ o di aw ma ka kɛɲɛ ni ne ka kuma fɔlen ye Musa ye.
[4] Aw dancɛ na bɔ kungokolon ni Liban na fo ka taa se baba ma, Ufrate ba kɔni ani Hɛti bɔnsɔn ka jamana bɛɛ fo ka taa se Kɔgɔjiba ma tilebi yanfan fɛ.
[5] Mɔgɔ si tɛna se ka jɔ ka i bali i si bɛɛ la. Ne na to i fɛ i ko ne tora Musa fɛ cogo min na. Ne tɛna i to yen fewu, ne tɛna i bila abada.
[6] I barika bonya ka i ja gɛlɛya, k'a masɔrɔ ne ye ne kali nin siya bɛnbaw ye jamana min ko la, ko ne na a di u ma, e de na u ladon o kɔnɔ k'a kɛ u ta ye.
[7] I ka i barika bonya ka i ja gɛlɛya dɔrɔn. Ne ka jɔnkɛ Musa ye sariya min ko fɔ i ye, i ka o bɛɛ mara ni kantigiya ye walisa i ka ko kɛtaw bɛɛ kaɲɛ. I kana jɛngɛ ka taa kinin wala numan fɛ ka mabɔ o sariya la.
[8] Nin sariya kitabu kuma ka to i da la. I ka miiri a la su fara tile kan, walisa i ka a ko sɛbɛnnenw bɛɛ kɛ ni kantigiya ye. Ni o kɛra, i ka ko kɛtaw naɲɛ, i na jiidi.
[9] Ne ma nin ci fɔ i ye wa? I barika bonya ka i ja gɛlɛya. I kana siran, i ja kana tigɛ, k'a masɔrɔ Matigi, i ka Ala bɛ i fɛ, i ka ko kɛtaw bɛɛ la.»
[10] Josue ye nin ci fɔ mɔgɔw kuntigiw ye,
[11] ko u ka bugufyɛ yaalayaala ka nin ci fɔ mɔgɔw bɛɛ ye ko u ka sirafana labɛn, sabu tile saba bi kɔ, u na Jurdɛn ba tigɛ. Matigi, u ka Ala bɛ jamana min di u ma, u ka taa o minɛ.
[12] Josue y'a fɔ Rubɛn siya ni Gad siya ani Manase siya tilancɛ ye ko:
[13] «Matigi ka jɔnkɛ Musa ye ci min fɔ aw ye, aw ka aw hakili to o la. A ko: ‹Matigi, aw ka Ala ye lafiya di aw ma ka nin jamana di aw ma.›
[14] Musa ye jamana min di aw ma Jurdɛn ba yanfan fɛ, aw musow ni aw ka denmisɛnw ani aw ka baganw ka to yen. Aw cɛ farinma ja gɛlɛnw bɛɛ ka tɛmɛn aw balimaw ɲɛ ni kɛlɛkɛ minanw ye ka u dɛmɛ
[15] fo Matigi ka lafiya di aw balimaw ma, i ko a y'a di aw ma cogo min na. Matigi, aw ka Ala bɛ jamana min di u ma, aw ka u dɛmɛ fo u ka o minɛ. O kɔ, Matigi ka jɔnkɛ Musa ye nin jamana min di aw ma yan Jurdɛn ba kɔrɔn yanfan fɛ ka kɛ aw ta ye, aw na kɔsegin ka don a kɔnɔ.»
[16] U ye Josue jaabi ko: «I ye fɛn o fɛn fɔ an ye, an na o bɛɛ kɛ. I bɛ an ci yɔrɔ o yɔrɔ, an na taa yen.
[17] An na i kan minɛ kow bɛɛ la i ko an ye Musa kan minɛ cogo min na. Matigi, i ka Ala ka to i fɛ i ko a tora Musa fɛ cogo min na.
[18] Ni mɔgɔ o mɔgɔ banna ka i kan minɛ, ni a ma sɔn ka i ka ci fɔlenw kɛ, o tigi na faga. I barika bonya ka i ja gɛlɛya dɔrɔn.»