[1] «Matigi i ka Ala bɛ jamana min di i ma ka kɛ i ta ye, ni mɔgɔ fagalen yera o yɔrɔ kungo la, ni a fagabaa ma dɔn,
[2] o tuma la, i ka dugu cɛkɔrɔbaw ni i ka kiritigɛlaw ka taa a yɔrɔ suma k'a daminɛ mɔgɔ fagalen su la fo ka taa se a dafɛ duguw ma.
[3] Dugu min ka surun su la ka tɛmɛn tɔw kan, ni o dɔnna, o dugu cɛkɔrɔbaw ka misigeren dɔ minɛ, baara ma kɛ ni min ye fɔlɔ, ni zu ma da a kan na,
[4] u ka taa ni o misigeren ye kɔ ji woyota da la, yɔrɔ dɔ la min ma sɛnɛ fɔlɔ. U ka o misigeren kan kari kɔ da la yen.
[5] Sarakalasebaaw, Levi bɔnsɔnw ka gɛrɛ a la, sabu Matigi i ka Ala ye olu ɲɛnatɔmɔ walisa u ka baara kɛ a ye ka dubaw kɛ a tɔgɔ la. Sɔsɔli kow bɛɛ ni gosili kow bɛɛ kaɲɛnabɔ ka kɛɲɛ ni u ka kuma ye.
[6] O su da fɛ dugu cɛkɔrɔbaw bɛɛ ka u tɛgɛw ko misigeren kan karilen kun na kɔ da la.
[7] U k'a fɔ ko u bolow ma o mɔgɔ faga, u ɲɛ m'a ye.
[8] Ko Matigi ka yafa a ka mɔgɔw kunmabɔlenw Israɛl ma. Ko a kana o mɔgɔw jalakibali joli hakɛ bi a ka mɔgɔw Israɛl kan. O joli hakɛ na yafa u ma.
[9] O cogo la i na mɔgɔ jalakibali joli hakɛ mabɔ i la ni i ye ko tilennen kɛ Matigi ɲɛ kɔrɔ.
[10] «Ni i bɔra ka i juguw kɛlɛ, ni Matigi i ka Ala ye u don i bolo, ni i ye u cɛ,
[11] ni i ye muso cɛɲi dɔ ye mɔgɔ minɛlenw la, n'i b'a fɛ ka o furu,
[12] o tuma la i ka taa n'a ye i ka so kɔnɔ. A ka a kun di ka a sɔninfaraw tigɛ.
[13] A ka a ka jɔnya finiw yɛlɛma. A ka to i ka so kɔnɔ ka a fa ni a ba ko kasi kalo kelen kɔnɔ. O kɔ, i bɛ se ka don a fɛ ka kɛ a cɛ ye, a ka kɛ i muso ye.
[14] Ni a ko ma diya i ye, i k'a bila a ka taa a sagona yɔrɔ la. I kana a feere wari la fewu. I kana a minɛ i ko jɔn, sabu i jɛra a fɛ.
[15] «Ni muso fila bɛ cɛ dɔ fɛ, ni dɔ kɛra baramuso ye, ni dɔ kɛra galomuso ye, ni u fila bɛɛ ye denkɛ bange a ye, k'a sɔrɔ denkɛ fɔlɔ ye galomuso den ye,
[16] ni o cɛ bɛ a ciyɛn tila a denkɛw cɛ don min na, a kana a ka baramuso denkɛ jate den fɔlɔ ye ka galomuso den to yen, o min ye den fɔlɔ ye sɛbɛ la.
[17] Nka a ka jɔ a la ko galomuso denkɛ ye a denkɛ fɔlɔ ye ka niyɔrɔ fila di o ma a bolo fɛn bɛɛ la katuguni o de ye a barika daminɛ ye, kɔrɔya tɔnɔ ye ale de ta ye.
[18] «Ni denkɛ tulo gɛlɛn murutilen bɛ cɛ dɔ fɛ, ni a ma sɔn ka a fa ni a ba kan minɛ, hali ni u y'a gosi, a ma u kan lamɛn,
[19] a fa ni a ba ka a minɛ ka taa n'a ye u ka dugu cɛkɔrɔbaw fɛ u ka dugu donda la.
[20] U k'a fɔ dugu cɛkɔrɔbaw ye ko: ‹An denkɛ filɛ nin ye, mɔgɔ murutilen tulo gɛlɛn don, a ma sɔn ka an kan minɛ, mɔgɔ nuguma, dɔlɔtɔ don.›
[21] O tuma la a ka dugu kɔnɔ cɛw bɛɛ k'a bon ni kabakurunw ye k'a faga. I na ko jugu ban i cɛma ten. Israɛl bɛɛ na o kibaru mɛn ka siran.
[22] «Ni mɔgɔ dɔ ye ko jugu kɛ min ka kan ni saya ye, ni a fagara o kɔ ka a su dulon jiri la,
[23] a su kana si jiri la, nka i k'a su don o don yɛrɛ la, katuguni min dulonna jiri la, o dangalen don Ala fɛ. I k'a su don, walisa Matigi i ka Ala bɛ jamana min di i ma ciyɛn ye, i kana o nɔgɔ.