[1] «Cɛ kɔbɔlen wala min cɛya tigɛlen don, o si kana don Matigi ka jama la.
[2] Ɲɛmɔgɔden kana don Matigi ka jama la, a bɔnsɔn si kana don Matigi ka jama la, hali a bɔnsɔn yɛlɛma ko tannan.
[3] Amɔn bɔnsɔn wala Moab bɔnsɔn kana don Matigi ka jama la. U ka mɔgɔ si kana don Matigi ka jama la abada, hali u bɔnsɔn yɛlɛma ko tannan,
[4] katuguni aw bɔtɔ Misira jamana la, u ma taa aw kunbɛn ni dumuni fɛn ni ji ye sira la. U ye Beɔr denkɛ Balam fana sara ko a ka na ka bɔ Mɛsopotami jamana la Petɔr ka i danga.
[5] O bɛɛ n'a ta Matigi i ka Ala ma sɔn ka Balam kan lamɛn, nka Matigi i ka Ala ye danga yɛlɛma ka kɛ duba ye i ye, sabu Matigi i ka Ala bɛ i kanu.
[6] I kana hɛrɛ wala lafiya ɲini u ye abada i si tile bɛɛ la.
[7] I kanaɲigin Edɔmka la, sabu i balima don. I kanaɲigin Misiraka la, katuguni i tun ye siginfɛ ye a ka jamana la.
[8] U bɔnsɔn yɛlɛma ko sabanan bɛ se ka don Matigi ka jama la.
[9] «Ni i bɔra ka taa daga i juguw da la ka u kɛle, i ka i yɛrɛ kɔlɔsi fɛn jugu bɛɛ la.
[10] Ko min bɛ kɛ cɛ la su fɛ, ni aw la cɛ dɔ nɔgɔlen bɛ o kosɔn, a ka taa bugufyɛ kɔ fɛ, a kana kɔsegin bugufyɛ la.
[11] Wula da fɛ a k'i yɛrɛ ko ji la, ni tile bira, a bɛ se ka kɔsegin bugufyɛ la.
[12] I kaɲama na taa yɔrɔ fana kɛ bugufyɛ kɔ fɛ. N'i bɛ taa banakɔ tuma min na, i ka taa yen.
[13] Soli dɔ ka sɔrɔ i ka minanw cɛma, walisa ni i taara banakɔ, i ka o kɛ ka dingɛ sen, o kɔ ka bo datugu.
[14] Katuguni Matigi i ka Ala bɛ i ka bugufyɛ yaala walisa ka i mara ka i juguw gɛn i ɲɛ. O de kosɔn i ka bugufyɛ ka kɛ yɔrɔ senuma ye, walisa Matigi kana fɛn nɔgɔlen si ye i cɛma, ka fara ka mabɔ i la.
[15] «Jɔn min tilara a makɛ la ka boli ka taa a dogo i ka so, i kana o don a makɛ bolo.
[16] A ka sigi i fɛ i ka mɔgɔw cɛma a sagona yɔrɔɲɛnatɔmɔlen na i ka dugu kɔnɔ. I kana i fanga digi a la.
[17] «Kakalamuso kana sɔrɔ Israɛl denmusow cɛma. Cɛɲɔgɔn ɲinina kana sɔrɔ Israɛl denkɛw cɛma.
[18] «I kana taa ni kakalamuso sara wala cɛɲɔgɔn ɲinina sara ye Matigi i ka Ala ka so kɔnɔ ka dafale bɔ n'a ye. O ko fila bɛɛ haramulen bɛ Matigi i ka Ala fɛ.
[19] «Wari wala dumuni fɛn wala tɔnɔ bɛ sɔrɔ fɛn o fɛn na, i kana o si juru don i balima la ka tɔnɔ ɲini a kan.
[20] I bɛ se ka juru don jamana wɛrɛ mɔgɔ la ka tɔnɔ ɲini a kan, nka i kana juru don i balima la ka tɔnɔ ɲini a kan, walisa i bɛ don jamana min kɔnɔ ka a kɛ i ta ye, Matigi i ka Ala ka duba i ye i ka baara kɛtaw bɛɛ la o kɔnɔ.
[21] «Ni i ye i dafale Matigi i ka Ala la, i kana mɛn ni i ma a bɔ. Ni o kɛra, o na kɛ jurumu ye i la, katuguni Matigi i ka Ala na o ɲini i fɛ, siga t'a la.
[22] Ni i ma dafale kɛ, o tɛna kɛ jurumu ye i la.
[23] Nka ni i ye i dafale Matigi i ka Ala la, fɛn o fɛn bɛ bɔ i da la, i da ye diyaɲe nili fɛn min ko fɔ, i ka kɛ kantigi ye ka o bɛɛ dafa.
[24] «Ni i bɛ tɛmɛn i sigiɲɔgɔn ka rezɛn nakɔtu fɛ, i bɛ se ka rezɛn mɔ dun k'i fa i sago la, nka i kana dɔ bila i ka minan kɔnɔ.
[25] Ni i donna i sigiɲɔgɔn ka suman kanbali la, i bɛ se ka tinsan dɔw kari n'i bolo ye, nka i kana wɔlɔsɔ don i sigiɲɔgɔn ka suman kanbali la.