[1] «San wolonwula o san wolonwula i ka hɔrɔɲali kɛ.
[2] O hɔrɔɲali kɛ cogo filɛ nin ye. Mɔgɔ o mɔgɔ ye juru don a mɔgɔɲɔgɔn na, a ka o bila. A kana o juru kani a mɔgɔɲɔgɔn ni a balima la, katuguni Matigi ka hɔrɔɲali welewele dara.
[3] I bɛ se ka juru kani jamana wɛrɛ mɔgɔ la, nka i ka fɛn o fɛn bɛ i balima fɛ, i ka o bɛɛ to a bolo.
[4] O bɛɛ n'a ta ni i ye Matigi i ka Ala kan minɛ tiɲɛ la, ne bɛ ci minw fɔ i ye bi, ni i ye olu bɛɛ mara ka u kɛ, o tuma la faantan si tɛna sɔrɔ i fɛ yen, katuguni Matigi i ka Ala bɛ jamana min di i ma ciyɛn ye ka kɛ i ta ye, Matigi na duba i ye o kɔnɔ.
[6] Matigi i ka Ala na duba i ye i ko a y'a fɔ i ye cogo min na. I na juru don siya caman na, i tɛna juru ta u fɛ. I na sigi siya caman kun na, u tɛna sigi i kun na.
[7] «Matigi i ka Ala bɛ jamana min di i ma, ni faantan dɔ sɔrɔla i ka dugu dɔ la i balimaw cɛma yen, i kana i dusu gɛlɛya i balima faantan ma,
[8] nka i ka i tɛgɛ labila a ye ka a mago fɛn dɔnɔ a ma.
[9] I yɛrɛ kɔlɔsi, miirili jugu kana sɔrɔ i kɔnɔ k'a fɔ ko san wolonwulanan surunyara, hɔrɔɲali san kɔni. I yɛrɛ kɔlɔsi, i kana i ɲɛ tugu i balima faantan la fo i tɛ foyi di a ma. Ni o kɛra, a na kasi Matigi nɔ fɛ i kama, o na jate jurumu ye i la.
[10] I k'a sɔn. A sɔnnen kɔ, i dusu kana nimisa, katuguni o de kosɔn Matigi i ka Ala na duba i ye i ka baara kɛtaw ni i ka ko kɛtaw bɛɛ la.
[11] Faantanw tɛna ban jamana la, o de y'a to ne bɛ ci fɔ i ye ko i ka i tɛgɛ labila i balima ni kolibaatɔ ani faantan ye i ka jamana la.
[12] «Ni i balimakɛ wala i balimamuso heburu dɔ feerela i ma ka kɛ i ka jɔn ye, a ka baara kɛ i ye san wɔɔrɔ kɔnɔ. A san wolonwulanan la, i k'a bila k'a hɔrɔnya.
[13] Ni i y'a hɔrɔnya tuma min na, i kana a bolo lankolon bila ka taa.
[14] I ka i tɛgɛ labila ka dɔ bɔ i ka bagan misɛnw ni i ka sɛnɛ suman ni i ka diwɛn la k'a di a ma i ko Matigi i ka Ala dubara i ye cogo min na.
[15] I hakili to a la ko i yɛrɛ tun ye jɔn ye Misira jamana la, ko Matigi i ka Ala ye i kunmabɔ. O de y'a to ne ye nin ci fɔ i ye bi.
[16] Ni i ka jɔn y'a fɔ i ye ko a t'a fɛ ka bɔ i fɛ, sabu i ni i ka so ko ka di a ye, ko a ye hɛrɛ sɔrɔ i fɛ,
[17] o tuma la i ka biɲɛ dɔ ta ka o jɔnkɛ tulo da so dala kon kan k'a sɔgɔ, o kɔ a na kɛ i ka jɔn ye kudayi. I ka o ɲɔgɔn kɛ jɔnmuso fana la.
[18] A hɔrɔɲali kana gɛlɛya i ma, sabu a ye baara kɛ i ye san wɔɔrɔ kɔnɔ, o bɛ baarakɛla ka sara bɔɲɔgɔnko fila bɔ. N'i y'o kɛ, o tuma la Matigi i ka Ala na duba i ye i ka ko kɛtaw bɛɛ la.
[19] «I ka i ka bagan kunbaw ni i ka bagan misɛnw den fɔlɔ cɛmaw bɛɛ bila u dan na Matigi i ka Ala ye. I kana baara kɛ ni i ka misiw den fɔlɔw ye. I kana i ka bagan misɛnw den fɔlɔw si kan.
[20] San o san i ni i ka so mɔgɔw ka a dun Matigi i ka Ala ɲɛ kɔrɔ Matigi ka yɔrɔɲɛnatɔmɔlen na.
[21] Ni fiɲɛ b'a la, ni a bɛ segelen, wala ni fiyentɔ don, wala ni fiɲɛ wɛrɛ b'a la, i kana a faga ka kɛ saraka ye Matigi i ka Ala ye.
[22] I k'a dun i ka dugu kɔnɔ. Mɔgɔ nɔgɔlen ni mɔgɔ jɛlen fila bɛɛ k'a dun, i ko minan ni sɔn bɛ dun cogo min na.
[23] Nka i kana a joli dun. I k'o bɔn duguma i ko ji.