[1] «I ka Matigi i ka Ala kanu ka a ka ko fɔlenw ni a ka sariya sigilenw ni a ka kiri kow ni a ka ci fɔlenw mara tuma bɛɛ.
[2] Aw denw ma ko minw ye ka ko minw dɔn, aw kɔni ka olu dɔn bi, Ala ka kololi ni a bonyaba ni a sebaaya barikama,
[3] Ala ka taamashyɛnw ni a ka kɛwale minw kɛra Misira jamana masakɛ Faraon ni a ka jamana bɛɛ la,
[4] ani a ye min kɛ Misira kɛlɛbolo ni a ka sotigiw ni a ka wotorow la, aw ka o dɔn. U tun bɛ aw nɔgɛn tuma min na, a ye Kɔgɔji Bilen jikuruw kɔsegin u kan ka u halaki ka u ban pewu.
[5] A ye min kɛ aw ye ka aw to kungokolon kɔnɔ, fo ka na se nin yɔrɔ la,
[6] ka min kɛ Rubɛn bɔnsɔn Eliab denkɛ Datan ni Abiram la, aw bɛ o dɔn, ko dugukolo ye a da yɛlɛ ka u ni u ka denbayaw ni u ka finisow ni u ka fɛnɲɛnamaw bɛɛ kunun Israɛl bɛɛ ɲɛ na.
[7] Matigi ye koba minw kɛ, aw ɲɛw ye olu bɛɛ ye.
[8] «O de kosɔn ne bɛ ci minw fɔ aw ye bi, aw ka olu bɛɛ mara, walisa aw bɛ ba tigɛ ka taa jamana min tigiya minɛ, aw ka kɛ barikamaw ye ka se sɔrɔ o kan.
[9] Aw ka o ciyɛn mara walisa Matigi y'i kali aw bɛnbaw ye ko a na jamana min di u ni u bɔnsɔn ma, aw si tilew ka caya o kɔnɔ. O jamana falen bɛ nɔnɔ ni di la fo ka woyo.
[10] I bɛ don jamana min na k'a tigiya minɛ, o ni aw bɔ yɔrɔ Misira jamana tɛ kelen ye. Ka i to Misira, i tun bɛ i ka danni fɛn dan ka a sɔn i sen na i ko nakɔɲuguw.
[11] Aw bɛ don jamana min na k'a kɛ aw ta ye, kuluw ni jɛkɛnɛw b'a la, a bɛ sanji min.
[12] Matigi i ka Ala bɛ a janto o jamana la. Matigi i ka Ala ɲɛ bɛ o jamana kan tuma bɛɛ kabini san daminɛ fo ka taa a laban.
[13] «Ne bɛ ci minw fɔ aw ye bi, ni aw ye olu mara kosɛbɛ ka Matigi aw ka Ala kanu, ka baara kɛ a ye ni aw dusukun bɛɛ ni aw ni bɛɛ ye,
[14] a na sanji di aw ka jamana ma a waati la, sanji fɔlɔ ni a laban bɛɛ, walisa i ka sɛnɛkɛ suman tigɛ ka i ka diwɛn kɛnɛ ni i ka tulu sɔrɔ.
[15] A na bin fana fale aw ka jamana la aw ka baganw kosɔn. I na dumuni kɛ fo ka fa.
[16] Aw ka aw yɛrɛw kɔlɔsi, aw dusu kana lafili ka fara ka taa baara kɛ bato fɛn wɛrɛw ye ka aw biri u kɔrɔ.
[17] Ni o kɛra, Matigi na dimin aw kɔrɔ. A na sankolo datugu fo sanji tɛna na. Dugukolo tɛna suman di tun. Matigi bɛ jamanaɲuman min di aw ma, aw na halaki ka bɔ o la joona.
[18] «Ne bɛ kuma minw fɔ aw ye, olu ka to aw dusukunw ni aw hakili la. Aw ka u siri taamashyɛn ye aw bolo la, u ka kɛ tenna fɛn ye aw ɲɛ furancɛ la.
[19] Aw ka aw denw kalan u la, ni i bɛ sigi i ka so kɔnɔ, ni i bɛ taama la, ni i bɛ da, ni i bɛ wuli, i ka nin kumaw masala bɔ.
[20] I ka u sɛbɛn i ka so kondon jiriw kan ani i ka so da la konw kan.
[21] Ni o kɛra, Matigi y'a kali aw bɛnbaw ye ko a na jamana min di u ma, aw si tilew ni aw denw si tilew na caya o kɔnɔ, i ko sankolo tilew ka ca dugukolo kun na cogo min na.
[22] Ne bɛ ci minw fɔ aw ye, ni aw ye olu bɛɛ mara ka u kɛ ka Matigi, aw ka Ala kanu ka a ka siraw bɛɛ taama ka nɔrɔ a la,
[23] o tuma la Matigi na nin siyaw bɛɛ gɛn ka bɔ aw ɲɛ, siya minw ka bon aw ye ni u barika ka bon aw ta ye, aw na olu ka jamana sɔrɔ.
[24] Aw sentɛgɛ bɛ da yɔrɔ o yɔrɔ kan, o na kɛ aw ta ye. Aw dan yɔrɔ na bɔ kungokolon la fo ka taa se Liban, ka bɔ ba da la, Ufrate ba kɔni, fo ka taa se tilebi yanfan kɔgɔji ma.
[25] Mɔgɔ si tɛna jɔ aw ɲɛ ka aw bali. Aw na taama dugukolo min kan, Matigi aw ka Ala n'a to o yɔrɔ mɔgɔw ja ka tigɛ aw ɲɛsiran kosɔn, i ko a y'a fɔ aw ye cogo min na.
[26] «A filɛ, ne bɛ duba ni danga bila aw ɲɛ kɔrɔ bi.
[27] Ne bɛ Matigi aw ka Ala ka ci minw fɔ aw ye bi, ni aw ye olu mara, aw na duba sɔrɔ.
[28] Nka ni aw ma Matigi aw ka Ala ka ciw mara, ne bɛ sira min ko fɔ aw ye bi, ni aw farala ka o bila ka tugu bato fɛn wɛrɛw nɔ fɛ, aw tun tɛ minw dɔn, aw na danga sɔrɔ.
[29] I bɛ taa jamana min tigiya minɛ, ni Matigi i ka Ala ye i ladon yen tuma min na, i ka dubaw kɛ Garizim kulu kan ka dangali kɛ Ebal kulu kan.
[30] O kuluw bɛ Jurdɛn ba kɔfɛ tilebi yanfan fɛ sira da la, Kanankaw ka jamana la. U bɛ jɛkɛnɛ la Gilgal kuntilenna la More sɛn jirisunw kɛrɛ fɛ.
[31] Matigi aw ka Ala bɛ jamana min di aw ma, aw na Jurdɛn ba tigɛ ka don o kɔnɔ ka o tigiya minɛ ka sigi yen.
[32] Ne bɛ sariya sigilen ni ci minw fɔ aw ɲɛ na bi, aw ka olu bɛɛ mara ka u kɛ.