[1] «Ni sɔsɔli wulila mɔgɔw niɲɔgɔn cɛ, ni u taara kiritigɛlaw sɛgɛrɛ ko olu ka o kiri tigɛ, o tuma la u ka jo di jotigi ma ka jalakitigi jalaki.
[2] Ni jalakitigi ka kan ni gosili ye, kiritigɛla k'a fɔ ko o tigi k'i da duguma a kɔrɔ. A ka gosi ka kɛɲɛ ni a jalaki ko ye.
[3] A bɛ se ka gɛɲɛɲɛ binaani kɛ a la, nka a kana tɛmɛn o kan, sabu n'i y'a gosi ka tɛmɛn o kan, i balimakɛ na jaasi i ɲɛ na.
[4] «Ni misi bɛ suman cɔngɔ, i kana jɔ siri a da la.
[5] «Ni cɛ kelen denkɛw sigilen bɛɲɔgɔn fɛ, ni u la kelen sara, k'a sɔrɔ denkɛ t'a fɛ, o cɛ salen muso kana furu kɛnɛma cɛ wɛrɛ ma. A cɛ balimakɛ dɔ k'a furu ka don a fɛ ka balima jɔyɔrɔ fa a ye.
[6] Ni a ye denkɛ fɔlɔ min sɔrɔ, a balimakɛ salen tɔgɔ ka da o la, walisa o tɔgɔ kana ban Israɛl cɛma.
[7] Nka ni o cɛ ma sɔn k'a balimakɛ muso ta, o tuma la a balimakɛ muso ka taa cɛkɔrɔbaw sɛgɛrɛ dugu donda la k'a fɔ u ye ko: ‹Ne cɛ balimakɛ ma sɔn k'a balimakɛ tɔgɔ lawuli Israɛl cɛma. A ma sɔn ka cɛ balima jɔyɔrɔ fa ne ye.›
[8] Dugu cɛkɔrɔbaw ka o cɛ wele ka kuma a fɛ. Ni a tora a kan k'a fɔ ko a t'a fɛ ka o muso furu,
[9] o tuma la a balimakɛ muso ka gɛrɛ a la cɛkɔrɔbaw ɲɛ na ka o cɛ ka sabara bɔ a sen na, ka daji tu a ɲɛda la k'a fɔ ko cɛ min tɛ sɔn ka a balimakɛ ka so jɔ, nin bɛ kɛ o la.
[10] O cɛ ka so tɔgɔ na wele Israɛl la ko cɛ sabara bɔlen ka so.
[11] «Ni cɛ fila kɛlɛla, ni u b'a la kaɲɔgɔn gosi, ni u la kelen muso gɛrɛla ko a bɛ a cɛ tila a gosibaa la, ni a y'a bolo mɔɔnɔbɔ ka cɛ gosibaa cɛya sama,
[12] i ka o muso bolo tigɛ, i kana hinɛ a la fewu.
[13] «Sumanikɛ ja sifa fila kana sɔrɔ i ka bɔrɛ kɔnɔ, ka dɔ giriya ka dɔ fiɲɛya.
[14] Sumanikɛ minan sifa fila kana sɔrɔ i ka so kɔnɔ, ka dɔ bonya ka dɔ dɔgɔya.
[15] Sumanikɛ ja bɛnnen dafalen ka kɛ i fɛ. Sumanikɛ minan bɛnnen ka kɛ i fɛ fana, walisa Matigi i ka Ala bɛ jamana min di i ma, i ka tilew ka caya o kɔnɔ.
[16] Katuguni mɔgɔ o mɔgɔ bɛ o tilenbaliya ko sifaw kɛ ka nanbara kɛ, olu si ko man di Matigi i ka Ala ye fewu.
[17] «I bɔlen kɔ Misira, Amalɛk bɔnsɔn ye min kɛ i la ka i to sira la, i hakili to o la.
[18] U bɔra ka i kunbɛn k'i to sira la ka bi i kɔfɛ mɔgɔ barika bannenw kan k'a sɔrɔ i sɛgɛnnen barika dɛsɛlen tun don. U ma siran Ala ɲɛ.
[19] O de kosɔn Matigi i ka Ala bɛ jamana min di i ma ciyɛn ye, ka kɛ i ta ye, ni Matigi i ka Ala ye lafiya di i ma o kɔnɔ ka i tila i lamini juguw bɛɛ la, o tuma la, i ka Amalɛk si tunun k'a ban pewu ka bɔ sankolo jukɔrɔ. I kana ɲinɛ o kɔ.