[1] Matigi ko Musa ka layidu min ta Israɛl bɔnsɔn ye k'u to Moab jamana la, o kumaw filɛ ninw ye. A ye layidu min ta u ye ka u to Hɔrɛb, nin farala o kan.
[2] Musa ye Israɛl bɛɛ wele k'a fɔ u ye ko: «Matigi ye ko minw kɛ aw ɲɛ na Misira jamana la Faraon ni a ka jɔnw ni a ka jamana bɛɛ la, aw y'o bɛɛ ye.
[3] O kɔrɔbɔlibaw ni o taamashyɛnw ni o kabakow, aw ɲɛ ye olu ye.
[4] Nka fo ka na se bi ma, Matigi ma faamuli dusukun di aw ma, aniɲɛ minw bɛ yeli kɛ, ani tulo minw bɛ mɛnni kɛ.
[5] Ne ye aw ɲɛ minɛ ka san binaani kɛ kungokolon kɔnɔ. Aw ka finiw ma kɔrɔ aw kan na ka fara. Aw ka sabara ma kɔrɔ aw sen ka tiɲɛn.
[6] Aw ma buuru dun, aw ma diwɛn wala minni fɛn farinma min. O bɛɛ kɛra walisa aw k'a dɔn ko ale ye Matigi aw ka Ala ye.
[7] Aw sera nin yɔrɔ la minkɛ, Hesibɔn masakɛ Sihon ni Basan masakɛ Og bɔra ka an kunbɛn ka an kɛlɛ. An ye u faga.
[8] An ye u ka jamana minɛ ka o di Rubɛn siya ni Gad siya ani Manase siya tilancɛ ma ka kɛ olu ciyɛn ye.
[9] O de kosɔn aw ka nin layidu kumaw mara ka u kɛ, walisa aw ka kɛtaw bɛɛ kaɲɛ.
[10] «Aw bɛɛ jɔlen filɛ Matigi aw ka Ala ɲɛ kɔrɔ bi, aw siyaw kuntigiw ni aw ka cɛkɔrɔbaw ni aw ka kiritigɛlaw ni Israɛl cɛw bɛɛ,
[11] ani aw denw ni aw musow ani siginfɛ minw bɛ aw ka bugufyɛ kɔnɔ, k'a daminɛ i ka dɔgɔ ɲinina la ka ta'a bila i ka ji tala la.
[12] I jɔlen bɛ yan walisa i ka sɔn Matigi i ka Ala ka layidu ni a ka kalili ma. Matigi i ka Ala bɛ o ta i ye bi,
[13] walisa i ka kɛ a ka siya ye bi, a yɛrɛ ka kɛ i ka Ala ye, i ko a y'a fɔ i ye k'a kali i bɛnbaw Ibrahima ni Isaka ani Yakuba ye cogo min na.
[14] «Ne tɛ nin layidu ta ka nin kalili kɛ aw dɔrɔn ye,
[15] nka minw jɔlen bɛ Matigi, an bɛɛ ka Ala ɲɛ kɔrɔ bi ani minw tɛ aw cɛma bi, ne b'a kɛ olu bɛɛ ye.
[16] «An sigira Misira jamana la cogo min na ani an tɛmɛnna siyaw cɛma ka u ka jamanaw cɛ tigɛ cogo min na, aw bɛ o bɛɛ dɔn.
[17] Aw ye u ka ko haramulenw ye ani u ka boli minw dilara ni jiri ni kabakurun ni sanu ani warijɛ ye, olu bɛ u fɛ yen.
[18] Cɛ wala muso wala gwa wala siya min bɛ a dusukun mabɔ Matigi an ka Ala la bi ka taa baara kɛ o siyaw ka bato fɛnw ye, olu si kana sɔrɔ aw cɛma. Baga ni tale kunaya bɛ sɔrɔ jiri dili minw na, o si kana kɛ aw cɛma.
[19] Mɔgɔ minw ye nin layidu kumaw ni nin kalili mɛn, olu si kana u yɛrɛ bonya u yɛrɛ kɔnɔ k'a fɔ ko a na hɛrɛ sɔrɔ, hali ni a bɛ taama a ka tulo gɛlɛya la ka aw bɛɛ halaki, ɲuman fara juguman kan.
[20] Matigi tɛna sɔn ka yafa o tigi ma, nka Matigi ka dimiya ni a ka keleya na mana o cɛ kama. Dangali kuma minw sɛbɛnnen bɛ nin kitabu la, olu bɛɛ na bi a kan. Matigi na a tɔgɔ jɔsi ka bɔ sankolo jukɔrɔ.
[21] Matigi na o mɔgɔ bɔ Israɛl siyaw bɛɛ cɛma ka a bila a dan na ko jugu kama ka kɛɲɛ ni layidu dangali kumaw bɛɛ ye minw sɛbɛnna nin sariya kitabu la.
[22] Matigi na nin jamana gosi ni tɔɔrɔ ni bana minw ye, aw bɔnsɔn nataw, o kɔrɔ aw den minw na bange aw kɔ ani jamana wɛrɛ mɔgɔ minw bɛ na ka bɔ yɔrɔ jan na, olu na o kow ye.
[23] U n'a ye ko o jamana bɛɛ kɛra kiribi ni kɔgɔ dugukolo ani yɔrɔ jeninen ye, danni tɛ kɛ yen, suman tɛ tigɛ yen, bin si tɛ falen yen. A kɛra i ko Sodɔmɛ ni Gomɔrɛ ni Adima ni Zeboim cogo, Matigi diminnen dusu bɔlen ye o dugu minw halaki.
[24] Siyaw bɛɛ n'a fɔ ko mun y'a to Matigi ye nin jamana kɛ tan? Mun y'a to a ka dimiyaba wulila u kama tan?
[25] O tuma la mɔgɔw na u jaabi ko: ‹O kɛra katuguni Matigi, u bɛnbaw ka Ala ye layidu min ta u ye, u bɔlen kɔ Misira jamana la, u ye o tiɲɛn.
[26] U taara baara kɛ bato fɛn wɛrɛw ye ka olu bato, u tun ma bato fɛn minw dɔn, Matigi tun ma o ko fɔ u ye.
[27] O de kosɔn Matigi dusu diminna nin jamana kɔrɔ. Dangali ko minw sɛbɛnna nin kitabu la, a ye olu bɛɛ bi a kan.
[28] Matigi diminnen dusu bɔlen fununnen ye u tufa ka bɔ nin jamana la ka u fili jamana wɛrɛ la, a bɛ ten halibi.›
[29] «Gundo kow ye Matigi an ka Ala ta ye, nka ko minw jirala, olu ye an ni an denw ta ye badaa, walisa an ka nin sariya kumaw bɛɛ kɛ.