[1] «Matigi i ka Ala bɛ jamana min di i ma ciyɛn ye, i ka don o kɔnɔ ka a tigiya minɛ ka sigi yen.
[2] Matigi i ka Ala bɛ jamana min di i ma, i bɛ sɛnɛ fɛn, fɛn o fɛn sɔrɔ ka bɔ o dugukolo la, i ka dɔ bɔ olu bɛɛ kun fɔlɔ la ka u kɛ segi kɔnɔ. Matigi i ka Ala bɛ yɔrɔ min ɲɛnatɔmɔ k'a tɔgɔ da o kan, i ka taa ni u ye yen.
[3] I ka taa i jɔ o waati sarakalasebaa ɲɛ kɔrɔ k'a fɔ a ye ko: ‹Ne b'a fɔ Matigi ne ka Ala ye bi, ko, Matigi y'a kali an bɛnbaw ye ko a na jamana min di an ma, ne donna o kɔnɔ.›
[4] Sarakalasebaa ka o segi minɛ i bolo k'a sigi Matigi i ka Ala ka saraka bɔlanɲɛ fɛ.
[5] I ka kuma ko kura k'a fɔ Matigi i ka Ala ɲɛ kɔrɔ ko: ‹Ne bɛnbakɛ tun ye Aramka bugu turu ni bugu bɔ ye. A taara Misira ni mɔgɔ dɔɔnin ye ka sigi yen. K'a to yen, a ka mɔgɔw cayara ka kɛ siyaba fangama ye.
[6] Misirakaw ye ko jugu kɛ an na ka an tɔɔrɔ ka an bila jɔnya baara gɛlɛn na.
[7] An kasira Matigi an bɛnbaw ka Ala nɔ fɛ. Matigi y'an kan lamɛn, a ye an ka sɛgɛnba ni an ka baara gɛlɛnma ni an degun kow ye.
[8] Matigi ye an labɔ Misira jamana la ni bolo barikama ni bolo mɔɔnɔbɔlen ni siran kobaw ni taamashyɛnw ani kabakow ye.
[9] A nana ni an ye nin yɔrɔ la ka nin jamana di an ma, a falen bɛ nɔnɔ ni di la fo ka woyo.
[10] A filɛ, Matigi i ye dugukolo min di ne ma, ne nana sisan ni o suman bɛɛ kun fɔlɔ ye.› «I ka o sigi Matigi i ka Ala ɲɛ kɔrɔ yen ka batoli kɛ Matigi i ka Ala ɲɛ kɔrɔ.
[11] O kɔ, Matigi i ka Ala ye fɛnɲuman minw di i ni i ka so mɔgɔw ma, i yɛrɛ ni Levite ni siginfɛ min bɛ i ka dugu kɔnɔ, aw ka ɲagali olu bɛɛ ko la.
[12] «San saba o san saba, o ye jaka bɔ san ye. Ni i ye o san saba fɛn sɔrɔlenw bɛɛ jaka bɔ, i ka o di Levite ni siginfɛ ni falatɔ ni muso cɛ salen ma, walisa olu ka o dun i ka dugu kɔnɔ ka u fa.
[13] O tuma la i k'a fɔ Matigi i ka Ala ɲɛ kɔrɔ ko saraka fɛn senuma minw tun bɛ i ka so kɔnɔ, i ye olu bɛɛ bɔ ka u di Levite ni siginfɛ ni falatɔ ni muso cɛ salen ma ka kɛɲɛ ni Matigi ka ci fɔlenw bɛɛ ye i ye. Ko i ma a ka ci fɔlen si tiɲɛn, u si ma bɔ i kɔnɔ.
[14] Ko i ma foyi dun a la i ka mɔgɔ sanga tuma la. Ka i nɔgɔlen to, i ma maga o si la. Ko i ma foyi bɔ o la ka kɛ saraka ye mɔgɔ salen kosɔn. Ko i ye Matigi i ka Ala kan minɛ ka a ka ci fɔlenw bɛɛ kɛ.
[15] Ko ka Matigi to a sigi yɔrɔ senuma la sankolo kɔnɔ, a ka dugumala filɛ ka duba a ka siya Israɛl ye, ka duba dugukolo fana ye, a ye o min di an ma, i ko a tun ye a kali an bɛnbaw ye cogo min na. Ko o yɔrɔ falen bɛ nɔnɔ ni di la fo ka woyo.
[16] «Matigi i ka Ala b'a fɔ i ye bi ko i ka nin sariya sigilenw ni nin ko fɔlenw kɛ. Ko i ka u mara ka u kɛ ni i dusukun bɛɛ ni i ni bɛɛ ye.
[17] I ye layidu ta bi ko Matigi ye i ka Ala ye, ko i na a ka siraw taama ka a ka sariya sigilenw ni a ka ci fɔlenw ni a ka ko fɔlenw mara, ko i na a kan lamɛn.
[18] Matigi fana ye layidu ta bi ko i ye a yɛrɛ kelenpe ka siya ye i ko a y'a fɔ i ye cogo min na, ko i ka a ka ci fɔlenw bɛɛ mara.
[19] A ye siya minw da, a ko a na i kɔrɔta ka tɛmɛn olu bɛɛ kan tanuli ni tɔgɔba ani bonya la, ko i ka kɛ siya senuma ye Matigi i ka Ala ye, i ko a y'a fɔ i ye cogo min na.»