[1] «O tuma la an kɔseginna ka taa kungokolon kɔnɔ Kɔgɔji Bilen sira fɛ, i ko Matigi y'a fɔ an ye cogo min na. An ye Seir kulu munumunu tile caman na.
[2] «O kɔ, Matigi y'a fɔ ne ye ko
[3] an ye nin kulu munumunuli min kɛ, o b'a bɔ. Ko an ka yɛlɛma ka taa saheli yanfan fɛ.
[4] Ko ne ka nin ci fɔ mɔgɔw ye ko: ‹Aw na aw balimaw Esau bɔnsɔn ka jamana cɛ tigɛ, u sigilen bɛ Seir. U na siran aw ɲɛ, nka a' ye aw yɛrɛw kɔlɔsi.
[5] Aw kana u kɛlɛ, katuguni ne tɛna hali senda yɔrɔ kelen di aw ma u ka jamana la. Ne ye Seir kulu tigiya di Esau ma.
[6] Aw ka dumuni fɛn san u fɛ ni wari ye walisa aw ka dumuni kɛ, ka ji fana san u fɛ ni wari ye, walisa aw k'a min.
[7] K'a masɔrɔ Matigi i ka Ala dubara i ye i bolo baara bɛɛ la, a ye i ka taama bɛɛ dɔn nin kungokolonba kɔnɔ. A san binaani filɛ nin ye, Matigi i ka Ala tora i fɛ. Foyi ma dɛsɛ i la.›
[8] «An farala ka mabɔ an balimaw Esau bɔnsɔn na, u sigilen bɛ Seir jamana la. An ye jɛkɛnɛ sira ni Elat ni Eziɔn-Gebɛr fɛngɛ. O kɔ, an farala ka taa Moab sira fɛ.
[9] Matigi y'a fɔ ne ye ko: ‹I kana Moab degun, i kana u kɛlɛ, katuguni ne tɛna a ka jamana yɔrɔ si di i ma ka kɛ i ta ye. Ne ye Ar di Lɔti bɔnsɔn ma ka kɛ u ta ye.›»
[10] («Emim siya tun sigira yen ka kɔrɔ. O mɔgɔw tun ka bon, u tun ka ca, u tun ka jan i n'a fɔ Anak bɔnsɔn.
[11] Mɔgɔw bɛ u jate Refaim bɔnsɔn ye fana, i ko Anak bɔnsɔn, nka Moab siya tun bɛ wele ko Emim siya.
[12] Hor siya fana sigilen tun bɛ Seir ka kɔrɔ. Esau bɔnsɔn ye u gɛn ka u halaki ka bɔ u ɲɛ, ka sigi u nɔ na, i ko Israɛl bɔnsɔn y'a kɛ cogo min na a ka jamana la, Matigi ye o min di u ma.)
[13] «Matigi ko an ka wuli sisan ka Zerɛd kɔ tigɛ. An ye Zerɛd kɔ tigɛ.
[14] An ye waati min kɛ taama la kabini an bɔ tuma Kadɛs-Barnea fo ka taa se Zerɛd kɔ tigɛli ma, o tun ye san bisaba ni segin ye, fo o tilela kɛlɛkɛ cɛw bɛɛ banna ka bɔ bugufyɛ kɔnɔ, ka kɛɲɛ ni Matigi ka kalili ye.
[15] Matigi bolo tun bɛ u kɛlɛ fana ka u halaki ka bɔ bugufyɛ la, fo ka u bɛɛ ban.
[16] «Kɛlɛkɛ cɛw bɛɛ sara ka bɔ mɔgɔw cɛma tuma min na,
[17] Matigi kumana ne fɛ ko:
[18] ‹I na tɛmɛn Moab jamana dancɛ fɛ bi, Ar yɔrɔ la.
[19] Ni i gɛrɛla Amɔn bɔnsɔn na ka se u kuntilenna la tuma min na, i kana u degun, i kana u kɛlɛ, katuguni ne tɛna Amɔn bɔnsɔn ka jamana yɔrɔ si di i ma ka kɛ i ta ye. Ne y'o di Lɔti bɔnsɔn ma ka kɛ u ta ye.›»
[20] (O jamana tun bɛ jate Refaim siya ka jamana ye fana. Refaim siya sigira yen ka kɔrɔ, Amɔn bɔnsɔn tun bɛ u wele Zanzumim siya.
[21] O mɔgɔw tun ka bon, u tun ka ca, u tun ka jan i ko Anak bɔnsɔn. Matigi ye u halaki ka bɔ Amɔn bɔnsɔnɲɛ. Olu ye u gɛn ka sigi u nɔ na.
[22] Esau bɔnsɔn min sigilen bɛ Seir, Matigi y'a kɛ olu fana ye ten, a ye Hor bɔnsɔn halaki u ɲɛ. U ye olu gɛn ka sigi u nɔ na fo ka na se bi ma.
[23] Avika minw sigilen tun bɛ dugu misɛnw la fo ka taa se Gaza, olu halakira Kafitɔrkaw fɛ, olu minw bɔra Kafitɔr la. Kafitɔrkaw sigira Avikaw nɔ na.)
[24] «Matigi ko: ‹A' ye wuli ka taa ka Arnɔn kɔ tigɛ. A filɛ, ne bɛ Amɔn siya Hesibɔn masakɛ Sihon ni a ka jamana don i bolo. Aw k'a daminɛ ka u kɛlɛ ka u kɛ aw ta ye.
[25] Ne n'a daminɛ bi ka aw ɲɛsiran bila sankolo jukɔrɔ siyaw bɛɛ la. U ja na tigɛ aw kosɔn. Ni u ye i kibaru mɛn tuma min na, u na yɛrɛyɛrɛ ka kɔnɔnagwan.›
[26] «Ne ye ciden dɔw ci ka bɔ Kedemɔt kungokolon kɔnɔ ka taa Hesibɔn masakɛ Sihon sɛgɛrɛ ni hɛrɛ kuma ye. Ne y'a fɔ a ye ko:
[27] ‹A to, ne ka tɛmɛn i ka jamana fɛ. Ne na taama siraba fɛ, ne tɛna fara ka taa kinin wala numan fɛ.
[28] I ka ne ka dumuni fɛn dunta feere ne ma wari la, ka ne ka ji minta feere ne ma wari la. Ne na tɛmɛn ne sen na dɔrɔn.
[29] Esau bɔnsɔn minw sigilen bɛ Seir ani Moab bɔnsɔn minw sigilen bɛ Ar, olu y'a kɛ ten. I fana ka sɔn ka o kɛ ne ye, fo ne ka Jurdɛn ba tigɛ ka don an ka jamana kɔnɔ, Matigi an ka Ala bɛ o min di an ma.›
[30] «Nka Hesibɔn masakɛ Sihon ma sɔn an ka tɛmɛn a ka jamana fɛ, k'a masɔrɔ Matigi i ka Ala ye miiribaliya hakili di a ma k'a dusukun gɛlɛya, walisa k'a don i bolo, i ko i ɲɛ b'a la cogo min na bi.
[31] «Matigi y'a fɔ ne ye ko: ‹A filɛ, sisan ne bɛ Sihon ni a ka jamana don i bolo. I k'a daminɛ ka o jamana minɛ ka kɛ aw ta ye.›
[32] Sihon ni a ka mɔgɔw bɛɛ bɔra ka na an kunbɛn, walisa ka an kɛlɛ Jahaz.
[33] Matigi an ka Ala y'a don an bolo, an ye a ni a denkɛw ni a ka mɔgɔw bɛɛ faga.
[34] An ye u ka duguw bɛɛ minɛ ka cɛw ni musow ni denmisɛnw bɛɛ halaki ka u ban, hali kelen ma to.
[35] An ye dugu minw minɛ, an ye baganw ni nafolo dɔrɔn cɛ ka bɔ olu la ka to ni u ye.
[36] Ka bɔ Aroɛr, o min bɛ Arnɔn kɔ da la, ani jɛkɛnɛ dugu fo ka taa se Galad, o dugu si barika ma bonya ka an kɛɲɛ. Matigi an ka Ala ye u bɛɛ don an bolo.
[37] Nka Amɔn bɔnsɔn ka jamana la, Jabɔk kɔ dafɛ jamana kɔni, ani kulu jamana duguw, Matigi an ka Ala ko an kana yɔrɔ minw kɛlɛ, an ma gɛrɛ olu si la.