[1] «Israɛl, i ka lamɛnni kɛ. I bɛna Jurdɛn ba tigɛ bi. Siya minw ka bon ni i ye ni u barika ka bon ni i ta ye, duguba barikamaw bɛ u fɛ, lamini kogo janw bɛ o duguw la fo ka se san fɛ, i na olu ka jamana tigiya minɛ.
[2] O mɔgɔw ye mɔgɔba jamanjanw ye, Anak bɔnsɔnw don, i bɛ o minw dɔn, i y'a mɛn u ta fan fɛ ko: ‹Jɔni bɛ se ka jɔ ka Anak bɔnsɔn bali?›
[3] I k'a dɔn bi ko Matigi i ka Ala yɛrɛ bɛ taa i ɲɛ i ko tasuma jenili kɛtɔ. Ale de na u halaki ka u bi i ɲɛ kɔrɔ. I na u gɛn ka u ban joona, i ko Matigi y'a fɔ i ye cogo min na.
[4] Ni Matigi i ka Ala ye u gɛn ka bɔ i ɲɛ tuma min na, i kan'a fɔ i kɔnɔ ko i ka tilennenya kosɔn Matigi ye i ladon yen ka o jamana tigiya di i ma, sabu o siyaw ka juguya kosɔn, Matigi bɛ u gɛn ka bɔ i ɲɛ.
[5] I tɛ don yen ka u ka jamana tigiya minɛ i yɛrɛ ka tilennenya ni i dusukun jɛya kosɔn. Matigi i ka Ala bɛ o siyaw gɛn ka bɔ i ɲɛ u yɛrɛw ka juguya kosɔn ani walisa a y'a kali ka kuma min fɔ i bɛnbaw Ibrahima ni Isaka ani Yakuba ye, a ka o dafa.
[6] I k'a dɔn ko Matigi i ka Ala tɛ nin jamanaɲuman di i ma k'a kɛ i ta ye i yɛrɛ ka tilennenya kosɔn, sabu i ye siya tulo gɛlɛn de ye.
[7] «I ye Matigi i ka Ala dusu dimin cogo min na k'i to kungokolon kɔnɔ, i hakili to o la, a kana bɔ i kɔnɔ. Kabini i bɔra Misira jamana la don min na, fo ka na se nin yɔrɔ la, aw kɛra mɔgɔ murutilenw ye Matigi ma.
[8] «K'an to Hɔrɛb fana, aw ye Matigi dusu bɔ. Matigi diminna aw kɔrɔ, a tun b'a fɛ ka aw halaki.
[9] Matigi ye layidu min ta aw ye, ne yɛlɛnna kulu kan ka o layidu kabakurun walaha minɛ tuma min na, ne tora kulu kan ka tile binaani ni su binaani kɛ. Ne ma dumuni kɛ, ne ma ji min.
[10] Matigi ye kabakurun walaha fila don ne bolo, u sɛbɛnna Ala bolonkɔni fɛ. Matigi ye kuma minw fɔ aw ye kulu kan, ni a y'a kan bɔ tasuma la jamalajɛ don na, olu bɛɛ sɛbɛnna u kan.
[11] Tile binaani ni su binaani tɛmɛnnen kɔ, Matigi ye o kabakurun walaha fila di ne ma, o layidu walahaw kɔni.
[12] «O tuma la Matigi y'a fɔ ne ye ko ne ka wuli ka jigin ka bɔ yen joona, ko ne ye ne ka mɔgɔ minw labɔ Misira jamana la, olu ye u yɛrɛw tiɲɛn. Ko ale ye sira min ko fɔ u ye, u farala ka o bila joona, u ye ja dila u yɛrɛw ye ni sanu yeelelen ye.
[13] Matigi y'a fɔ ne ye ko ale y'a ye ko nin siya ye siya tulo gɛlɛn ye,
[14] ko ne k'a to ale ka u halaki ka u tɔgɔ jɔsi ka bɔ sankolo jukɔrɔ, ko a na ne kɛ siyaba barikama ye ka tɛmɛn olu kan.
[15] Ne kɔseginna ka jigin ka bɔ kulu kan, tasuma tun bɛ o kulu fan bɛɛ la, o layidu walaha fila tun bɛ ne bolo fila la.
[16] Ne ye filɛli kɛ. A filɛ, aw ye Matigi aw ka Ala hakɛ ta, aw tun ye sanu yeele ka misiden bisigi dila aw yɛrɛw ye. Matigi tun ye sira min ko fɔ aw ye, aw farala ka o bila joona.
[17] Ne ye o walaha fila fili ka bɔ ne bolo fila la ka u ci aw ɲɛ kɔrɔ.
[18] Ne ye ne bi Matigi ɲɛ kɔrɔ i ko fɔlɔ cogo, ka tile binaani ni su binaani kɛ. Ne ma dumuni kɛ, ne ma ji min. Ne ye o kɛ aw ka jurumu kɛlenw bɛɛ kosɔn, sabu aw ye ko jugu kɛ Matigi ɲɛ kɔrɔ k'a dusu dimin.
[19] Ne siranna k'a ye ko Matigi ka dimiya ni a ka dusu bɔ wulila aw kama, a tun b'a fɛ ka aw halaki. Nka Matigi ye ne ka delili lamɛn o waati la fana.
[20] Matigi diminna Aron fana kɔrɔ kosɛbɛ, a tun b'a fɛ ka o halaki. Ne ye delili kɛ Aron fana ye o tuma la.
[21] Ne ye aw ka misiden bisigi dilalen ta, aw ka jurumu fɛn kɔni, k'a jeni tasuma la, k'a karikari k'a ɲɔɲɔ fo k'a kɛ mugu ye i ko buguri. Kɔ min bɛ jigin ka bɔ kulu la, ne ye o mugu bɔn o ji la.
[22] «Aw ye Matigi dusu dimin ka aw to Tabera ni Masa ani Kiborɔt-Hatava.
[23] Ka aw to Kadɛs-Barnea, Matigi ye aw ci ka taa ɲɛ k'a fɔ ko ale bɛ jamana min di aw ma, aw ka wuli ka taa o tigiya minɛ. O tuma la aw murutira ka ban Matigi aw ka Ala ka ci fɔlenw ma, aw ma da Matigi la, aw ma a kan minɛ.
[24] Kabini ne ye aw dɔn don min na, aw kɛra mɔgɔ murutilenw ye Matigi ma.
[25] «Ne ye ne bi Matigi ɲɛ kɔrɔ ka tile binaani ni su binaani kɛ ka ne bilen to, katuguni Matigi tun ko a bɛ aw halaki.
[26] Ne ye Matigi deli ko: ‹Matigi Ala, i kana i ka mɔgɔw ni i ka ciyɛn halaki, i ye o minw kunmabɔ ni i bonyaba ye, ka u labɔ Misira jamana la n'i barikaba ye.
[27] I hakili to i ka jɔnw Ibrahima ni Isaka ani Yakuba la. I kana nin mɔgɔw ka tulo gɛlɛya ni u ka juguya ni u ka jurumu filɛ,
[28] walisa i ye an labɔ jamana min na, o mɔgɔw kana n'a fɔ ko Matigi ye jamana min ko fɔ u ye, a ma se ka u ladon o kɔnɔ, ko u ko man di a ye fewu, o de y'a to a ye u labɔ yen ka taa ni u ye ka u faga kungokolon kɔnɔ.
[29] O bɛɛ n'a ta, i ka mɔgɔw ni i ka ciyɛn don, i ye u labɔ Misira ni i fangaba ni i ka sebaaya ye.›