[1] «O kɔ, an farala ka taa Basan sira fɛ. Basan masakɛ Og ni a ka mɔgɔw bɛɛ bɔra ka na an kunbɛn ka an kɛlɛ Edrei.
[2] Matigi y'a fɔ ne ye ko: ‹I kana siran a ɲɛ, sabu ne ye Og ni a ka mɔgɔw bɛɛ ni a ka jamana don i bolo. I ye Amɔr siya ka masakɛ Sihon kɛ cogo min na, o min sigilen tun bɛ Hesibɔn, i ka ale fana kɛ ten.›
[3] Matigi an ka Ala ye Basan masakɛ Og ni a ka mɔgɔw bɛɛ don an bolo. An ye u faga, an m'a to hali kelen ka dan kɛ.
[4] An ye Basan Og ka mara la duguw bɛɛ minɛ, hali kelen ma to min ma tiɲɛn an fɛ. Argɔb jamana dugu biwɔɔrɔ bɛɛ minɛna.
[5] O duguw bɛɛ tun ye dugu barikamaw ye, kogo janw ni konw ni konbalabalaw tun bɛ u la. Dugu lamini kogontan caman tun bɛ yen fana.
[6] An ye u bɛɛ halaki ka u ban, i ko an y'a kɛ Hesibɔn masakɛ Sihon la cogo min na. An ye duguw mɔgɔw bɛɛ halaki ka u ban, cɛw ni musow ni denmisɛnw.
[7] Nka an ye baganw bɛɛ ni dugu nafolo bɛɛ cɛ ka taa n'u ye.
[8] «O cogo la an ye se sɔrɔ Amɔr siya masakɛ fila ka jamana kan Jurdɛn ba kɔ fɛ, ka bɔ Arnɔn kɔ da la fo ka taa se Hermɔn kulu ma.
[9] Sidɔnkaw bɛ Hermɔn wele ko Sirion, Amɔr siya b'a wele ko Senir.
[10] An ye se sɔrɔ kɛnɛba la duguw bɛɛ kan, ani Galad bɛɛ ni Basan bɛɛ fo ka taa se Salika ni Edrei ma, Basan masakɛ Og ka mara duguw tun don.
[11] (Basan masakɛ Og kelenpe tun tora Refaim siya la. A filɛ, a ka kalaka tun ye nɛgɛ kalaka ye, o tɛ Amɔn bɔnsɔn ka dugu Rabat kɔnɔ wa? O janya bɛ nɔnkɔn ɲɛ kɔnɔntɔn bɔ, a kɔnɔ bɛ nɔnkɔn ɲɛ naani bɔ, ka kɛɲɛ ni mɔgɔw ka sumani kɛ cogo ye.)
[12] «O tuma la an ye o jamana tigiya ta. Ka bɔ Arnɔn kɔ da la Aroɛr ka taa se Galad kulu jamana tilancɛ ani a duguw bɛɛ ma, ne ye o di Rubɛn siya ni Gad siya ma.
[13] Galad tɔ tolen ani Basan masakɛ Og ka mara bɛɛ, ne ye o di Manase siya tilancɛ ma, Argɔb jamana bɛɛ ani Basan bɛɛ.» (Basan bɛ wele ko Refaim siya jamana fana.
[14] Manase bɔnsɔn Jair ye Argɔb jamana bɛɛ minɛ fo ka taa se Gesurkaw ni Makakaw ka jamana dancɛ ma, ka a yɛrɛ tɔgɔ da Basan bugufyɛw la, u bɛ wele ko Jair bugufyɛw halibi.)
[15] «Ne ye Galad di Manase bɔnsɔn Makir ma.
[16] Ka bɔ Galad fo ka taa se Arnɔn kɔ ma, o kɔ cɛmancɛ ye o dan yɔrɔ ye, fo ka se Jabɔk ma, o ye Amɔn bɔnsɔn dan yɔrɔ ye. Ne ye o di Rubɛn siya ni Gad siya ma.
[17] Ne ye jɛkɛnɛ fana di u ma ka o dan bɔ Jurdɛn ba la Kinerɛt, fo ka taa se jɛkɛnɛ baji ma, Kɔgɔji Misɛn kɔni, Pisiga kulu jigin yɔrɔ kɔrɔn yanfan fɛ.
[18] «O waati la ne ye nin ci fɔ u ye ko: ‹Matigi aw ka Ala bɛ nin jamana don aw bolo, walisa a ka kɛ aw ta ye. Aw kɛlɛkɛ cɛw bɛɛ ka taama Israɛl bɔnsɔnɲɛ ni aw ka kɛlɛkɛ minanw ye aw bolo ka ba tigɛ.
[19] Ne ye dugu minw di aw ma ka ban, aw musow ani aw ka denmisɛnw ni aw ka baganw na to olu kɔnɔ. Ne y'a dɔn ko bagan caman bɛ aw fɛ.
[20] Olu na to yen fo Matigi ka lafiya di aw balimaw ma i ko a y'a di aw ma cogo min na. Matigi aw ka Ala bɛ jamana min di aw ma Jurdɛn ba kɔ fɛ, fo u ka o minɛ k'a kɛ u ta ye. O kɔ, aw bɛɛ kelen-kelen na kɔsegin aw ka ciyɛn talen na, ne ye o min di aw ma.›
[21] «O tuma la ne ye ci fɔ Josue ye ko: ‹Matigi aw ka Ala ye min kɛ o masakɛ fila la, i ye o bɛɛ ye i ɲɛ la. O cogo la i na taa masaya minw kama ba kɔ, Matigi n'a kɛ olu bɛɛ la ten.
[22] Aw kana siran u ɲɛ, sabu Matigi aw ka Ala yɛrɛ na kɛlɛkɛ aw ye.›
[23] «O tuma la ne ye Matigi deli ko:
[24] ‹Matigi Ala, i y'a daminɛ ka i bonyaba ni i barika jira i ka baaraden la, katuguni bato fɛn si tɛ sankolo la wala dugukolo kan min bɛ se ka i ka kɛwalew ni i ka kabakow ɲɔgɔn kɛ.
[25] Ne b'i deli, i ka sɔn ne ka Jurdɛn ba tigɛ ka taa o jamanaɲuman filɛ ba kɔ fɛ, o kulu jamanaɲuman ani Liban.›
[26] «Nka Matigi diminna ne kɔrɔ aw kosɔn, a ma ne lamɛn. Matigi y'a fɔ ne ye ko: ‹O b'a bɔ sa, i kana kuma ne fɛ o ko la tun.
[27] I ka yɛlɛn Pisiga kulu kuncɛ la, ka i ɲɛ kɔrɔta ka tilebi ni saheli ni worodugu ani kɔrɔn yanfan filɛ i ɲɛw la, sabu i tɛna nin Jurdɛn ba tigɛ.
[28] I ka ci fɔ Josue ye ka a ja gɛlɛya ka a sinsin katuguni i bɛ na jamana min ye, ale de na nin mɔgɔw ɲɛ minɛ ka ba tigɛ ka u ladon o jamana kɔnɔ k'a tilatila u cɛ k'a kɛ u ta ye.›
[29] «An sigira o jɛ la Bɛt-Peɔr kuntilenna la.