[1] «I bɛ taa jamana min tigiya minɛ, Matigi i ka Ala na i ladon o la ka siya caman gɛn ka bɔ i ɲɛ, Hɛti bɔnsɔn ni Girgaz siya ni Amɔr siya ni Kanankaw ni Ferɛz siya ni Hev siya ani Jebuskaw, olu ye siya wolonwula ye. U ka bon i ye, u barika ka bon ni i barika ye.
[2] Matigi i ka Ala na u don i bolo, i na se sɔrɔ u kan. O tuma la i ka u halaki ka u ban. I kana layidu si ta u ye, i kana hinɛ u la.
[3] I kana furu kɛ u fɛ, i kana i denmusow di u denkɛw ma, i kana u denmusow ɲini i denkɛw ye,
[4] katuguni u na i denkɛw yɛlɛma ka bɔ ne nɔ fɛ, walisa u ka baara kɛ bato fɛn wɛrɛw ye. Ni o kɛra, Matigi na dimin aw kɔrɔ, a na aw halaki joona.
[5] Nka aw ka min kɛ u la, o filɛ nin ye: aw ka u ka saraka bɔlanw ci, ka u ka boli samasenw karikari ka u ka Astarte boliw tigɛtigɛ ka u ka ja dɛsɛnenw jeni ni tasuma ye,
[6] k'a masɔrɔ i ye siya senuma ye Matigi i ka Ala ye. Matigi i ka Ala ye i ɲɛnatɔmɔ ka bɔ dugukolo kan siyaw bɛɛ cɛma, walisa i ka kɛ ale kelenpe ka siya ye.
[7] «Matigi ma a ka kanuya da aw kan ka aw ɲɛnatɔmɔ ko aw ka ca siya tɔw bɛɛ ye, siga t'a la aw tun ye siyaw bɛɛ la dɔgɔmanni ye.
[8] Nka Matigi ye aw ɲɛnatɔmɔ k'a masɔrɔ a bɛ aw kanu. A y'a kali aw bɛnbaw ye ko min na, a tun b'a fɛ ka o dafa. O de y'a to Matigi ye aw labɔ ni a barikaba ye ka aw kunmabɔ ka bɔ jɔnya so la, ka aw tila ka bɔ Misira masakɛ Faraon bolo.
[9] O de kosɔn i k'a dɔn ko Matigi i ka Ala ye Ala yɛrɛ de ye. Ala kantigi don. A bɛ a ka layidu ni a ka makari mara a kanubaaw ni a ka ci marabaaw ye fo ka taa se u bɔnsɔn waa kelen ma,
[10] nka a bɛ a koniyabaaw sara ka u halaki. A koniyabaaw sarali salaya tɛna a minɛ, nka a na o tigi yɛrɛ sara.
[11] O de kosɔn ne bɛ ciw ni sariya sigilenw ni ko fɔlen minw fɔ i ye bi, i ka olu mara ka u kɛ.
[12] «Ni i ye nin ko fɔlenw lamɛn ka u mara ka u kɛ, Matigi i ka Ala y'a kali i bɛnbaw ye ka layidu ni makari ko min fɔ, a na o dafa i ye.
[13] A y'a kali i bɛnbaw ye ko a na jamana min di i ma, ka i to o kɔnɔ, a na i kanu ka duba i ye ka i jiidi. A na duba i ka bangeli ni i ka dugukolo suman ye. A na duba i kaɲɔ ni i ka diwɛn kɛnɛ ni i ka tulu ye, i ka bagan kunbaw ni i ka bagan misɛnw na den sɔrɔ ka jiidi.
[14] I na duba sɔrɔ ka tɛmɛn siyaw bɛɛ kan. Cɛ bange kɛbali wala muso kɔna tɛna sɔrɔ aw cɛma. Bagan bɔrɔgɛ fana tɛna sɔrɔ i ka baganw cɛma.
[15] Matigi na bana sifaw bɛɛ mabɔ i la. I ye bana jugu minw dɔn k'i to Misira jamana la, a tɛna sɔn olu si ka i minɛ, nka a na olu kɛ ka i koniyabaaw bɛɛ minɛ.
[16] «Matigi i ka Ala na siya minw don i bolo, i ka olu bɛɛ halaki. I kana hinɛ u la hali dɔɔnin. I kana baara kɛ u ka bato fɛnw ye walisa olu kana na kɛ i minɛli jan ye.
[17] A dɔrɔ i n'a fɔ i kɔnɔ ko o siyaw ka ca i ye kosɛbɛ, ko i na se ka u gɛn cogo di?
[18] I kana siran u ɲɛ. Matigi i ka Ala ye min kɛ Faraon ni Misira jamana bɛɛ la, i hakili ka to o la kosɛbɛ.
[19] I ɲɛw ye kɔrɔbɔli ko gɛlɛnw ni kabakow ni taamashyɛn minw ye, Matigi i ka Ala ye i labɔ yen ni a barikaba ni a ka sebaaya ye tuma min na, i ka i hakili to olu la. I bɛ siran siya minw ɲɛ, Matigi i ka Ala na o bɔɲɔgɔnkow kɛ olu bɛɛ la.
[20] U tɔ tolen minw bɛ taa ka u dogo, Matigi i ka Ala na dondoliw ci olu kama ka u halaki.
[21] I ja kana wuli olu kosɔn, sabu Matigi i ka Ala min bɛ i cɛma, o de ye Alaba ye, siranfɛnba don.
[22] Matigi i ka Ala na o siyaw gɛn ka bɔ i ɲɛ dɔɔnin dɔɔnin. I man kan ka u ban joona. Ni o kɛra, kungo waraw na caya i ma.
[23] Matigi i ka Ala na u don i bolo, a na u jɛnsɛn ka bɔ i ɲɛ fo ka u halaki.
[24] A na u ka masakɛw don i bolo, i ka u tɔgɔw tunun ka bɔ sankolo jukɔrɔ. Mɔgɔ si tɛna se ka jɔ ka i bali, i ka u halaki.
[25] Aw ka u ka bato fɛn ja dɛsɛnenw jeni tasuma la. Warijɛ ni sanu min bɛ olu la, i ɲɛ kana bɔ o si fɛ ka o ta, o kana na kɛ i minɛli jan ye, sabu olu haramulen don Matigi i ka Ala fɛ.
[26] I kana fɛn haramulen si ladon i ka so kɔnɔ, walisa i kana kɛ o bɔɲɔgɔnko fɛn halakita ye. I ka ɲigin u la, i ka u haramu, k'a masɔrɔ fɛn halakitaw don.