[1] «Matigi, aw bɛnbaw ka Ala bɛ jamana min di aw ma ka kɛ aw ta ye, ka aw to o kɔnɔ, aw ka sariya sigilenw ni ci fɔlen minw mara ka u kɛ aw si tilew bɛɛ la ka aw to dugukolo kan, o filɛ ninw ye.
[2] Aw bɛna siya minw ka jamana sɔrɔ, olu ye u ka bato fɛnw bato yɔrɔ minw na kulu jamanjanw ni tintinw kan, ani jirisun kɛnɛw bɛɛ jukɔrɔ, aw ka olu bɛɛ ci.
[3] Aw ka u ka saraka bɔlanw ci ka u ka boli samasenw karikari, ka u ka Astarte boliw jeni tasuma la, ka u ka bato fɛn ja dɛsɛnenw tigɛtigɛ. Aw ka u tɔgɔw ban ka bɔ o yɔrɔw la.
[4] «Aw kana o siyaw ka ko kɛtaw ɲɔgɔn kɛ Matigi aw ka Ala ko la.
[5] Nka Matigi aw ka Ala na yɔrɔ min ɲɛnatɔmɔ ka bɔ aw ka siyaw bɛɛ la ka a tɔgɔ da o kan k'a kɛ a sigi yɔrɔ ye, aw ka o ɲini ka taa yen.
[6] Aw ka taa ni aw ka saraka jenitaw ni aw ka saraka fagataw ni aw ka jakaw ni aw ka bolola saraka kɔrɔtataw ni aw ka dafalebɔ sarakaw ni aw ka diyaɲe nili fɛnw ani aw ka bagan kunbaw ni bagan misɛnw den fɔlɔ ye o yɔrɔ la.
[7] Aw ni aw ka so mɔgɔw ka dumuni kɛ Matigi aw ka Ala ɲɛ kɔrɔ yen. Matigi aw ka Ala dubara aw ye aw bolo baara minw na, aw ka ɲagali olu bɛɛ kosɔn o yɔrɔ la.
[8] An bɛ nin cogo min na yan sisan, o kɔrɔ, mɔgɔw bɛɛ kelen-kelen bɛ u yɛrɛw sago kɛ, aw kana o ɲɔgɔn kɛ tun.
[9] Matigi aw ka Ala bɛ lafiya yɔrɔ ni ciyɛn min di aw ma, aw ma se yen fɔlɔ.
[10] Nka Matigi aw ka Ala bɛ jamana min tigiya di aw ma, aw na Jurdɛn ba tigɛ ka sigi o kɔnɔ. Aw selen kɔ aw lamini juguw bɛɛ la, a na lafiya di aw ma. Aw lakanalen na sigi yen.
[11] O tuma la Matigi aw ka Ala na yɔrɔ dɔɲɛnatɔmɔ ka a tɔgɔ da o kan. Ne bɛ fɛn minw ko fɔ aw ye, aw ka taa ni olu bɛɛ ye o yɔrɔ la, aw ka saraka jenitaw ni aw ka saraka fagataw ni aw ka jakaw ni aw ka bolo la saraka kɔrɔtataw ani aw ka dafalebɔ fɛnɲɛnatɔmɔlenw Matigi ye.
[12] Aw na ɲagali Matigi aw ka Ala ɲɛ kɔrɔ o yɔrɔ la, aw ni aw denkɛw ni aw denmusow ani aw ka jɔnkɛw ni aw ka jɔnmusow, ani Levite min bɛ aw ka du kɔnɔ, sabu a ma niyɔrɔ sɔrɔ, a ma ciyɛn ta aw fɛ.
[13] I yɛrɛ kɔlɔsi, i mana yɔrɔ o yɔrɔ ye, i kana i ka saraka jenitaw bɔ o bɛɛ la,
[14] nka Matigi na yɔrɔ min ɲɛnatɔmɔ aw siyaw la kelen cɛma, i ka i ka saraka jenitaw bɔ o yɔrɔ la, ka ne ka ci fɔlenw bɛɛ kɛ yen.
[15] «O bɛɛ n'a ta, ni a ka di i ye tuma min na, i bɛ se ka bagan dɔ faga ka a sogo dun i sigi yɔrɔw bɛɛ la ka kɛɲɛ ni Matigi i ka Ala ka duba dalen ye i kan. Mɔgɔ nɔgɔlen ani mɔgɔ jɛlen fila bɛɛ bɛ se ka o dun, i ko minan ni sɔn bɛ dun cogo min na.
[16] Nka aw kana a joli dun, i ka o bɔn duguma i ko ji.
[17] «I ka sɛnɛ kɛ suman ni i ka diwɛn ni i ka tulu, i kana olu si jaka dun i ka dugu kɔnɔ, wala i ka bagan kunbaw ni i ka bagan misɛnw den fɔlɔw, wala i ka dafalebɔ fɛn si, wala i ka diyaɲe nili fɛnw wala i bolola saraka kɔrɔtataw.
[18] Nka Matigi i ka Ala na yɔrɔ min ɲɛnatɔmɔ, i ka o fɛnw dun Matigi i ka Ala ɲɛ kɔrɔ yen, e ni i denkɛ ni i denmuso ani i ka jɔnkɛ ni i ka jɔnmuso ani Levite min bɛ i ka du kɔnɔ. I ka ɲagali Matigi i ka Ala ɲɛ kɔrɔ i bolo baara bɛɛ kosɔn.
[19] I sigili mɛn o mɛn i ka jamana la, i yɛrɛ kɔlɔsi, i kana ɲinɛ Levite kɔ.
[20] «Ni Matigi i ka Ala ye i dan yɔrɔw bonya tuma min na, i ko a y'a fɔ i ye cogo min na, ni sogodun nege y'i minɛ fo i b'a fɔ ko i b'a fɛ ka sogo dun, o tuma la i bɛ se ka sogo dun ka kɛɲɛ ni i diyaɲeko ye.
[21] Matigi i ka Ala na yɔrɔ min ɲɛnatɔmɔ ka a tɔgɔ da o kan, ni o ka jan i la, Matigi ye bagan kunba wala bagan misɛn minw di i ma, i bɛ se ka olu dɔw faga i ko ne y'a fɔ i ye cogo min na, ka o dun i ka dugu kɔnɔ ka kɛɲɛ ni i diyaɲeko ye.
[22] I k'a dun i ko minan ni sɔn bɛ dun cogo min na. Mɔgɔ nɔgɔlen ni mɔgɔ jɛlen fila bɛɛ bɛ se ka a dun.
[23] Nka i yɛrɛ kɔlɔsi, i kana a joli dun, k'a masɔrɔ a joli ye a ɲɛnamaya de ye. I kana sogo ni a ɲɛnamaya dunɲɔgɔn fɛ.
[24] I kana joli dun, i k'a bɔn duguma i ko ji.
[25] I kana joli dun, ni i ni i bɔnsɔn ye ko tilennen kɛ Matigi ɲɛ kɔrɔ, aw na to hɛrɛ la.
[26] «Nka i ka fɛn senumaw ni i ka dafalebɔ fɛnw, i ka taa ni olu ye Matigi ka yɔrɔ ɲɛnatɔmɔlen na.
[27] I ka i ka saraka jenitaw sogo ni u joli lase Matigi i ka Ala ka saraka bɔlan kan. Saraka fagata wɛrɛw ko la, u joli ka bɔn Matigi ka saraka bɔlan kan, i ka u sogo dun.
[28] Ne bɛ ko minw fɔ i ye, i ka olu bɛɛ lamɛn ka u mara, ni i ni i bɔnsɔn ye ko ɲuman tilennenw kɛ Matigi aw ka Ala ɲɛ kɔrɔ, aw na to hɛrɛ la badaa.
[29] «I bɛna siya minw ka jamana minɛ, ni Matigi i ka Ala ye olu bɛɛ halaki ka u ban i ɲɛ kɔrɔ tuma min na, ni i ye o jamana minɛ ka sigi yen tuma min na,
[30] i ka i yɛrɛ kɔlɔsi, u ladegeli kana na kɛ i minɛli jan ye, u halakilen kɔ ka bɔ i ɲɛ. I yɛrɛ kɔlɔsi, i kana kunnafoni ɲini u ka bato fɛnw ko la k'a fɔ ko o siyaw tun bɛ baara kɛ u ka bato fɛnw ye cogo di? Ko i fana b'a fɛ ka o ɲɔgɔn kɛ.
[31] I kana o kɛ Matigi i ka Ala la, katuguni ko haramulen minw si ko man di Matigi ye, o mɔgɔw ye olu bɛɛ kɛ u ka bato fɛnw ye. U bɛ hali u denkɛw ni u denmusow jeni tasuma la u ka bato fɛnw ye.
[32] «Ne bɛ ci minw fɔ aw ye, aw ka olu bɛɛ mara ka u kɛ. Aw kana foyi fara u kan, aw kana foyi bɔ u la.