[1] «Ayiwa sisan Israɛl, ne bɛ aw kalan sariya sigilenw ni ci fɔlen minw la, aw ka olu lamɛn. Aw ka u minɛ ka u kɛ, walisa aw ɲɛnama ka to, ani Matigi aw bɛnbaw ka Ala bɛ jamana min di aw ma, walisa aw ka don o kɔnɔ ka a tigiya minɛ.
[2] Ne bɛ ci minw fɔ aw ye, aw kana foyi fara olu kan, aw kana foyi bɔ u la, walisa ne bɛ Matigi aw ka Ala ka ci minw fɔ aw ye, aw ka olu mara.
[3] «Matigi ye min kɛ Bal-Peɔr ko la, aw ɲɛw y'o ye, cɛ minw tugura Bal-Peɔr nɔ fɛ, Matigi i ka Ala ye olu bɛɛ halaki ka bɔ i cɛma.
[4] Nka aw kɔni, aw minw nɔrɔlen tora Matigi aw ka Ala la, aw bɛɛ ɲɛnama don bi.
[5] «A filɛ, ne ye aw kalan sariya sigilenw ni ci fɔlenw la, i ko Matigi ne ka Ala y'a fɔ ne ye cogo min na, walisa aw ka u minɛ ka u kɛ ka aw to o jamana kɔnɔ, aw bɛ taa o min tigiya minɛ.
[6] Aw ka u mara ka u taama, k'a masɔrɔ o na kɛ aw ka hakilitigiya ni aw ka dɔnniya ye siyaw bɛɛ ɲɛ na, olu minw na o sariyaw kuma mɛn k'a fɔ ko: ‹O siyaba ye siya hakiliman ko dɔnna ye dɛ.›
[7] «Tiɲɛ la, siyaba jumɛn bɛ yen min ka bato fɛn ka surun a la i ko Matigi an ka Ala ka surun an na cogo min na, ni an b'a tɔgɔ wele tuma o tuma?
[8] Sariya sigilen ni ci fɔlen tilennenw bɛ siya jumɛn fɛ i ko ne bɛ nin sariya dafalen min jira aw la bi?
[9] Nka i k'i yɛrɛ kɔlɔsi, ka i dusukun kɔlɔsi kosɛbɛ i si bɛɛ la, walisa i ɲɛ ye ko minw ye, i kana naɲinɛ olu kɔ, u kana na bɔ i kɔnɔ. I ka i denw kalan u la, ka i mɔdenw fana kalan u la.
[10] I ye i jɔ Matigi i ka Ala ɲɛ kɔrɔ Hɔrɛb don min na, i hakili ka to o la. Matigi y'a fɔ ne ye ko: ‹I ka nin mɔgɔw bɛɛ lajɛɲɔgɔn kan ne kɔrɔ. Ne b'a fɛ u ka ne ka kumaw lamɛn walisa u ka dege neɲɛsiran na ka to o kan u si tilew bɛɛ la dugukolo kan ani walisa u ka u denw kalan o la.›
[11] «Aw gɛrɛla ka aw jɔ kulu ju la. Kulu jenitɔ tun don, tasuma manaw tun bɛ yɛlɛn fo sankolo cɛmancɛ la. Dibi ni sanfin ni bugun finman tun bɛ yen.
[12] Matigi kumana aw fɛ k'a kan bɔ tasuma cɛmancɛ la. Aw y'a kumakan mɛn, nka aw m'a farikolo cogo si ye, aw ye kumakan dɔrɔn mɛn.
[13] A y'a ka layidu kuma fɔ aw ye, k'a fɔ ko aw ka o mara, ci fɔlen tan kɔni. A ye u sɛbɛn kabakurun walaha fila kan.
[14] O tuma la Matigi ye ci fɔ ko ne ka aw kalan sariya sigilen ni ci fɔlenw la, walisa aw ka u minɛ ka u taama ka aw to o jamana la, aw bɛ taa o min tigiya minɛ.
[15] «Matigi kumana aw fɛ Hɔrɛb ka a kan bɔ tasuma cɛma don min na, aw ma farikolo cogo si ye o don na, o de y'a to a' ye aw yɛrɛw kɔlɔsi kosɛbɛ,
[16] walisa aw kana na aw yɛrɛw tiɲɛn ka ja dɔ dɛsɛ aw yɛrɛw ye, ka kɛɲɛ ni fɛn dɔ bisigi ye, cɛ bisigi wala muso bisigi,
[17] wala dugukolo kan sen naanima fɛn dɔ bisigi wala sanfɛ kɔnɔ panta dɔ bisigi.
[18] Aw kana dugukolo kan fɛn fofota si bisigi dila, wala dugukolo jukɔrɔ jila jɛgɛ bisigi.
[19] I yɛrɛ kɔlɔsi, i kana na i ɲɛ kɔrɔta san fɛ ka tile ni kalo ni dolow filɛ ka u bato. Sankolola kɛnɛbɔlanw si batoli nege kana i minɛ. I kana baara kɛ u ye. Matigi i ka Ala ye o fɛnw di sankolo jukɔrɔ siyaw bɛɛ ma.
[20] Nka aw kɔni, Matigi ye aw ta ka aw labɔ Misira jamana nɛgɛfin gwantugu tasuma la, walisa aw ka kɛ a yɛrɛ kelenpe ka mɔgɔw ye, i ko aw bɛ cogo min na bi.
[21] Ayiwa Matigi diminna ne kɔrɔ aw kosɔn, a y'i kali ko ne tɛna nin Jurdɛn ba tigɛ, ko Matigi i ka Ala bɛ jamana min di i ma ciyɛn ye, ko ne tɛna don o kɔnɔ.
[22] O de kosɔn ne na sa nin jamana la, ne tɛna Jurdɛn ba tigɛ, nka aw na a tigɛ, ka o jamanaɲuman sɔrɔ.
[23] A' ye aw yɛrɛw kɔlɔsi walisa Matigi aw ka Ala ye layidu min ta aw ye, aw kana naɲinɛ o kɔ. Aw kana na ja dɛsɛnen dila aw yɛrɛw ye ka kɛɲɛ ni fɛn dɔ bisigi ye, Matigi i ka Ala y'a fɔ i kana o kɛ.
[24] K'a masɔrɔ Matigi i ka Ala ye tasuma jenini kɛtɔ de ye, Ala keleyama don.
[25] «Ni i ye denw ni mɔdenw sɔrɔ tuma min na, ka mɛn o jamana la, ni aw ye aw yɛrɛw tiɲɛn ka ja dɛsɛnenw dila ka kɛɲɛ ni fɛn dɔ bisigi ye, ka ko jugu kɛ Matigi aw ka Ala ɲɛ kɔrɔ ka a dusu dimin,
[26] ne bɛ sankolo ni dugukolo wele ka kɛ seere ye aw kama bi, ko aw na si tunun joona ka bɔ o Jurdɛn ba kɔ fɛ jamana la, aw bɛ taa o min tigiya minɛ. Aw si tile tɛna janya yen, sabu aw na halaki ka ban pewu.
[27] Matigi na aw jɛnsɛn siyaw cɛma, Matigi bɛna taa ni aw ye siya minw cɛma, aw tɔ tolenw tɛna kɛ bɛrɛ ye yen.
[28] Ka aw to yen aw na baara kɛ bato fɛn dɔw ye minw ye mɔgɔ bolo baara nɔ ye, jirima fɛnw ni kabakurunma fɛnw don, olu tɛ yeli kɛ, u tɛ mɛnni kɛ, u tɛ dumuni kɛ, u tɛ fɛn suma mɛn.
[29] Ka i to yen, i na Matigi i ka Ala ɲini. Ni i y'a ɲini ni i dusukun bɛɛ ni i hakili bɛɛ ye tuma min na, i n'a ye.
[30] Ka i toɲɛni la, o kow bɛɛ na i sɔrɔ. O tuma la, laban donw la, i na kɔsegin Matigi i ka Ala ma, ka a kan minɛ,
[31] katuguni Matigi i ka Ala ye makaritigi Ala ye, a tɛna i bila, a tɛna i halaki. A y'a kali ka layidu min ta i bɛnbaw ye, a tɛnaɲinɛ o kɔ.
[32] «I ka ɲininkali kɛ waati jan tɛmɛnnen kow la, ko minw kɛra k'a sɔrɔ e tun tɛ yen fɔlɔ, kabini Ala ye Hadamaden da dugukolo kan. I ka ɲininkali kɛ k'a bɔ sankolo kun dɔ la ka se a kun dɔ ma, ko: Yala o kobaɲɔgɔn kɛra badaa wa? Yala mɔgɔ ye o bɔɲɔgɔnko mɛn fɔlɔ wa?
[33] Ala kumana k'a kan bɔ tasuma cɛmancɛ la, aw y'a mɛn, aw ɲɛnama tora. Yala siya jumɛn bɛ yen, o ɲɔgɔn kɛra min na?
[34] Yala bato fɛn dɔ bɛ yen min ye a lajɛ ka siya dɔ ta ka bɔ siya wɛrɛ cɛma i ko Matigi aw ka Ala y'a kɛ aw la cogo min na wa? A ye aw labɔ Misira ni ko jiralenw ni taamashyɛnw ni kabakow ni kɛlɛ ni bolo barikama ni bolo mɔɔnɔbɔlen ani siran kobaw ye. O kɛra aw ɲɛ na.
[35] I kɛra o kow seere ye, walisa i k'a dɔn ko Matigi ye Ala ye, ko Ala wɛrɛ si tɛ yen ale kɔ.
[36] A y'a kan bɔ sankolo la i ɲɛ na walisa ka i kalan. A ye a ka tasumaba bɔ i ɲɛ na dugukolo kan. I ye a ka kumaw mɛn ka bɔ tasuma cɛma.
[37] A ye i bɛnbaw kanu, ka u bɔnsɔnɲɛnatɔmɔ u kɔ. Ale yɛrɛ ye i labɔ Misira jamana la ni fangaba ye.
[38] Siya minw ka bon i ye ni u barika ka bon ni i ta ye, a ye olu gɛn ka bɔ i ɲɛ, walisa ka i ladon u ka jamana la ka a di i ma ka kɛ i ta ye, i ko i ɲɛ b'a la cogo min na bi.
[39] O de kosɔn i k'a dɔn bi ka i hakili to a la ko Matigi ye Ala ye sankolo kɔnɔ ani dugukolo kan, ko Ala wɛrɛ si tɛ yen.
[40] Ne bɛ a ka sariya sigilenw ni a ka ci minw fɔ i ye bi, i ka olu mara, walisa i ni i bɔnsɔn ka hɛrɛ sɔrɔ. Ni i ye o kɛ, Matigi i ka Ala bɛ jamana min di i ma, i si tilew na caya o kɔnɔ badaa.»
[41] O tuma la Musa ye dugu sabaɲɛnatɔmɔ Jurdɛn ba kɔ kɔrɔn yanfan fɛ,
[42] walisa olu ka kɛ mɔgɔ fagala kalifadon yɔrɔ ye, o min ye a mɔgɔɲɔgɔn faga a ɲinɛma k'a sɔrɔ a m'a lawuli a kama. Ni a bolila ka taa o dugu saba la kelen na, a ɲɛnama na to.
[43] Bezɛr min bɛ kungokolon kɛnɛba la, o ka kɛ Rubɛn bɔnsɔn ta ye. Galad Ramɔt ka kɛ Gad bɔnsɔn ta ye. Basan Golan ka kɛ Manase bɔnsɔn ta ye.
[44] Musa ye sariya min ɲɛ fɔ Israɛl bɔnsɔn ye, o filɛ nin ye.
[45] Musa ye seereya kow ni sariya sigilen ni ci fɔlen minw fɔ Israɛl bɔnsɔn ye, u bɔlen kɔ Misira jamana la, olu filɛ ninw ye.
[46] O kɛra ka u to Jurdɛn ba kɔ fɛ jɛkɛnɛ la, Bɛt-Peɔr kuntilenna la, Amɔr siya ka masakɛ Sihon ka jamana la, o min sigilen tun bɛ Hesibɔn. Musa ni Israɛl bɔnsɔn ye se sɔrɔ o kan, u bɔlen kɔ Misira jamana la.
[47] U ye o jamana ni Basan masakɛ Og ka jamana fana minɛ. Olu tun ye Amɔr siya ka masakɛ fila ye Jurdɛn ba kɔ fɛ kɔrɔn yanfan fɛ.
[48] U ka jamana tun bɛ bɔ Arnɔn kɔ da la Aroɛr fo ka taa se Sion kulu ma, o ye Hermɔn ye.
[49] Jurdɛn ba kɔ fɛ jɛkɛnɛ bɛɛ tun b'a la kɔrɔn yanfan fɛ, fo ka taa se jɛkɛnɛ kɔgɔji ma, Pisiga kulu da fɛ.