[1] «Matigi aw ka Ala ko aw ka kalan ci fɔlenw ni sariya sigilen ni ko latigɛlen minw na, olu filɛ ninw ye, walisa aw bɛ taa jamana min tigiya minɛ, aw ka o ciw mara ka u kɛ ka aw to o jamana kɔnɔ.
[2] I ka u kɛ, walisa i ka siran Matigi i ka Ala ɲɛ ka a ka sariya sigilenw ni nin ci fɔlenw bɛɛ mara, ne bɛ olu minw fɔ i ye bi. E ni i denkɛw ni i mɔdenw ka u kɛ aw si tilew bɛɛ la walisa aw ka si tile caman sɔrɔ.
[3] O de kosɔn Israɛl, i ka u lamɛn ka i janto u la ka u kɛ, walisa i ka to hɛrɛ la ka jiidi kosɛbɛ o jamana kɔnɔ. O falen bɛ nɔnɔ ni di la fo ka woyo, i ko Matigi i bɛnbaw ka Ala ye o layidu ta i ye cogo min na.
[4] «Israɛl, i ka lamɛnni kɛ. Matigi an ka Ala ye Matigi kelenpe de ye.
[5] I ka Matigi i ka Ala kanu ni i dusukun bɛɛ ni i ni bɛɛ ani i barika bɛɛ ye.
[6] Ne bɛ kuma minw fɔ i ye bi, olu ka to i dusukun na.
[7] I ka i jija ka i denw kalan u la. Ni i bɛ i sigi i ka so kɔnɔ, ni i bɛ taama la, ni i bɛ i da, ni i bɛ wuli, i ka kuma olu ko la.
[8] I ka u siri taamashyɛn ye i bolow la, u ka kɛ i tenna fɛn ye i ɲɛ furancɛ la.
[9] I ka u sɛbɛn i ka so kondon jiriw kan ani i ka so dala konw kan.
[10] «Matigi i ka Ala y'a kali i bɛnbaw Ibrahima ni Isaka ni Yakuba ye ko a na jamana min di i ma, a na i ladon yen, ka dugubaɲumanw di i ma, k'a sɔrɔ i yɛrɛ ma u jɔ.
[11] A na sow di i ma fana, u falen bɛ fɛnɲuman sifa bɛɛ la, k'a sɔrɔ i yɛrɛ ma u fa, ani ji mara dingɛw k'a sɔrɔ i ma u sen, ani rezɛn ni olive nakɔtuw k'a sɔrɔ i ma o sunw turu. I na dumuni kɛ ka i fa,
[12] o tuma la, i ka i yɛrɛ kɔlɔsi, i kana ɲinɛ Matigi kɔ, o min ye i labɔ Misira jamana jɔnya so la.
[13] I ka siran Matigi i ka Ala ɲɛ, ka baara kɛ a ye, ka i kali a tɔgɔ la.
[14] Aw kana tugu bato fɛn wɛrɛw nɔ fɛ, aw kɛrɛ fɛ siyaw ka bato fɛnw kɔni.
[15] Katuguni Matigi i ka Ala min bɛ i cɛma, keleya b'a la. Ni i tugura u nɔ fɛ, Matigi i ka Ala na dimin i kɔrɔ, ka i halaki ka i bɔ dugukolo kan.
[16] Aw kana Matigi aw ka Ala kɔrɔbɔ i ko aw y'a kɛ ka aw to Masa yɔrɔ la cogo min na.
[17] Nka aw ka Matigi aw ka Ala ka ci fɔlenw ni a ka seereya kow ni a ka sariya sigilenw mara, a ye olu minw ko fɔ aw ye.
[18] Matigi y'a kali i bɛnbaw ye ka jamanaɲuman min di i ma, ko a na i juguw gɛn ka bɔ i ɲɛ, i ka ko tilennen ni ko ɲuman kɛ Matigi ɲɛ kɔrɔ, walisa i ka to hɛrɛ la ka don o jamana kɔnɔ ka a tigiya minɛ, i ko Matigi y'a fɔ i ye cogo min na.
[20] «Ni i denkɛ y'i ɲininka don nata la ko: ‹Matigi an ka Ala ye nin seereya ko ni nin sariya sigilenw ani nin ci fɔlen minw fɔ an ye, olu kɔrɔ ye mun ye?›
[21] O tuma la i k'a fɔ i denkɛ ye ko: ‹An tun bɛ Faraon ka jɔnya la Misira jamana la. Matigi ye an labɔ Misira jamana la ni a barikaba ye.
[22] Matigi ye taamashyɛnba ni kabakoba jugumanw kɛ an ɲɛ na Misira jamana la ani Faraon ni a ka so bɛɛ la.
[23] A ye an labɔ yen walisa a y'i kali an bɛnbaw ye jamana min ko la, a ka an ladon o kɔnɔ ka a di an ma.›
[24] Matigi y'a fɔ an ye ko an ka nin sariya sigilenw bɛɛ mara ka u kɛ, ka siran Matigi an ka Ala ɲɛ, walisa an ka to hɛrɛ la badaa, ka anɲɛnama to. A bɛ ten halibi.
[25] Ni an bɛ an janto nin ci bɛɛ la ka u kɛ Matigi an ka Ala ɲɛ kɔrɔ, i ko a y'a fɔ an ye cogo min na, o na kɛ an ka tilennenya ye.