[1] Musa ye nin kuma fɔ Israɛl bɛɛ ye ko kura ko:
[2] «Ne ye san kɛmɛ ni mugan sɔrɔ bi, ne tɛ se ka taa ka segin kɛ tun, Matigi y'a fɔ ne ye fana ko, ne tɛna nin Jurdɛn ba tigɛ.
[3] Matigi i ka Ala yɛrɛ na taama i ɲɛ, ale de na nin siyaw halaki ka bɔ i ɲɛ, i na u ka yɔrɔw sɔrɔ. Josue na i ɲɛ minɛ i ko Matigi y'a fɔ cogo min na.
[4] Matigi ye min kɛ Amɔr siya ka masakɛw Sihon ni Og ani u ka jamana la ka u halaki, a na o bɔɲɔgɔnko kɛ o siyaw la.
[5] Matigi na u don aw bolo. Ne ye ci minw bɛɛ fɔ aw ye, aw ka o kow kɛ u la.
[6] A' ye aw barika bonya ka aw ja gɛlɛya. Aw kana siran, aw ja kana tigɛ u ɲɛ, k'a masɔrɔ Matigi i ka Ala yɛrɛ na taa i fɛ, a tɛna i bila, a tɛna i to yen abada.»
[7] O kɔ, Musa ye Josue wele k'a fɔ a ye Israɛl bɛɛ ɲɛ na ko: «I barika bonya ka i ja gɛlɛya. Matigi y'a kali nin siyaw bɛnbaw ye ko a na jamana min di u ma, i na nin mɔgɔw ladon o kɔnɔ, e de na a tilatila u cɛ.
[8] Matigi yɛrɛ na taa i ɲɛ fɛ, ale yɛrɛ na kɛ i fɛ. A tɛna i bila, a tɛna i to yen. I kana siran, i ja kana tigɛ.»
[9] Musa ye nin sariya sɛbɛn k'a di sarakalasebaaw Levi bɔnsɔn ma, olu minw bɛ Matigi ka layidu wagande doni. A ye a di Israɛl cɛkɔrɔbaw bɛɛ fana ma.
[10] O kɔ, Musa ye nin ci fɔ u ye ko: «San wolonwula o san wolonwula, hɔrɔɲali seli waati la, gwakɔrɔsigi seli fɛ,
[11] ni Israɛl bɛɛ nana ka u yɛrɛ jira Matigi i ka Ala ɲɛ kɔrɔ a ka yɔrɔɲɛnatɔmɔlen na tuma min na, i ka nin sariya kitabu bɛɛ kalan Israɛl bɛɛ ɲɛ kɔrɔ, u bɛɛ ɲɛ na.
[12] I ka mɔgɔw bɛɛ lajɛ, cɛw ni musow ani denmisɛnw ani siginfɛ minw bɛ i ka so, walisa u ka i lamɛn, walisa u ka dege Matigi i ka Ala ɲɛsiran na, ka nin sariya kumaw bɛɛ mara ka u kɛ,
[13] ani u den minw ma a dɔn, olu na a lamɛn ka kalan Matigi i ka Ala ɲɛsiran na tuma bɛɛ aw sigi waati bɛɛ la jamana kɔnɔ, aw bɛna Jurdɛn ba tigɛ ka don o min kɔnɔ ka kɛ aw ta ye.»
[14] Matigi y'a fɔ Musa ye ko: «A filɛ, i sa don surunyara. I ka Josue wele, aw ka taa ɲɔgɔn kunbɛn finiso kɔnɔ. Ne na ciw fɔ a ye.» Musa ni Josue taara donɲɔgɔn kunbɛn finiso kɔnɔ.
[15] Matigi y'i jira kabasen na finiso kɔnɔ. O kabasen jɔlen tun bɛ finiso da la.
[16] Matigi y'a fɔ Musa ye ko: «A filɛ, i na kafo i bɛnbaw kan. Nin mɔgɔw bɛ don jamana min kɔnɔ, u na jatɔya kɛ o siyaw ka bato fɛn wɛrɛw fɛ, ka ne bila. Ne ye layidu min ta u ye, u na o tiɲɛn.
[17] O don yɛrɛ la, ne ka dimiya na wuli u kama, ne na u bila, ne na neɲɛda dogo u la. U na cɛ. Ko juguba ni tɔɔrɔ kobaw caman na u sɔrɔ. O tuma la u n'a fɔ ko: ‹An ka Ala tɛ an cɛma, o de m'a to nin bɔnɛ kow ye an sɔrɔ wa?›
[18] Ne kɔni, ne na neɲɛda dogo u la o don na u ka ko jugu kɛlenw bɛɛ kosɔn, sabu u ye u yɛlɛma ka taa bato fɛn wɛrɛw nɔ fɛ.
[19] Ayiwa sisan, a' ye nin dɔnkili sɛbɛn ka Israɛl bɔnsɔn kalan a la, ka a kɛ u da la, walisa nin dɔnkili ka kɛ ne seere ye Israɛl bɔnsɔn kama.
[20] K'a masɔrɔ ne ye ne kali u bɛnbaw ye jamana min ko la, ne na u ladon o kɔnɔ, o falen bɛ nɔnɔ ni di la fo ka woyo. U na dumuni kɛ fo ka u wasa, ka u tɔlɔ. O kɔ, u na u yɛlɛma bato fɛn wɛrɛw nɔ fɛ ka baara kɛ olu ye. U na ne mafiɲɛya ka ne ka layidu tiɲɛn.
[21] O tuma la ni o ko jugubaw ni o tɔɔrɔ caman ye u sɔrɔ, nin dɔnkili na kɛ seere ye u kama, katuguni a na to u bɔnsɔn da la, u tɛnaɲinɛ a kɔ abada. Ɔwɔ, u bɛ cogoya min jira, ne bɛ o dɔn bi, sani ne ka u ladon o jamana kɔnɔ, ne ye ne kali ko ne na o min di u ma.»
[22] Musa ye nin dɔnkili sɛbɛn o don yɛrɛ la ka Israɛl bɔnsɔn bɛɛ kalan a la.
[23] Matigi ye nin ci di Nun denkɛ Josue ma k'a fɔ a ye ko: «I barika bonya ka i ja gɛlɛya, k'a masɔrɔ ne ye ne kali Israɛl bɔnsɔn ye jamana min ko la, i na u ladon yen. Ne yɛrɛ na to i fɛ.»
[24] Musa ye nin sariya kumaw sɛbɛn kitabu dɔ kɔnɔ k'a dafa tuma min na,
[25] Levite minw bɛ Matigi ka layidu wagande doni, a ye nin ci di olu ma k'a fɔ u ye ko:
[26] «Aw ka nin sariya kitabu ta k'a bila Matigi aw ka Ala ka layidu wagande kɛrɛ fɛ, a na kɛ seere ye aw kama yen.
[27] K'a masɔrɔ ne bɛ aw ka murutili cogo ni aw ka tulo gɛlɛya dɔn. Aw murutira Matigi ma ka ne ɲɛnama to aw cɛma bi, janko ne salen kɔ.
[28] «A' ye aw ka cɛkɔrɔbaw ni aw ka kuntigiw bɛɛ lajɛ ne kɔrɔ, ne na nin kumaw bɛɛ fɔ u ɲɛ na, ne na sankolo ni dugukolo wele ka kɛ seere ye u kama.
[29] K'a masɔrɔ ne y'a dɔn ko ne salen kɔ, aw na aw yɛrɛw tiɲɛn. Ne ye sira min ko fɔ aw ye, aw na aw yɛlɛma ka o bila. Bɔnɛ na aw sɔrɔ don nataw la, k'a masɔrɔ aw na ko jugu kɛ Matigi ɲɛ kɔrɔ k'a dusu kasi ni aw bolo baara nɔw ye.»
[30] O kɔ, Musa ye nin dɔnkili kumaw bɛɛ lajɛlen kalan Israɛl jama bɛɛ ɲɛ na.