[1] «Ni i ye Matigi i ka Ala kan minɛ, ne bɛ a ka ci minw fɔ i ye bi, ni i bɛ olu mara ka u kɛ, o tuma la Matigi i ka Ala na i kɔrɔta ka tɛmɛn dugukolo kan siyaw bɛɛ kan.
[2] N'i ye Matigi i ka Ala kan minɛ tuma min na, duba minw bɛna da i kan ka kɛ i ta ye, olu filɛ ninw ye.
[3] «I na kɛ dubaden ye dugu kɔnɔ ka kɛ dubaden ye kungo kɔnɔ.
[4] I wolodenw ni i ka dugukolo sɛnɛkɛ sumanw ni i ka baganw denw, i ka bagan kunbaw ni i ka bagan misɛnw kɔni, olu na duba sɔrɔ.
[5] I ka so kɔnɔ bondon ni i ka dumuni dila minanw na duba sɔrɔ.
[6] «I dontɔ na kɛ dubaden ye, i bɔtɔ na kɛ dubaden ye.
[7] I jugu minw bɛ wuli i kama ka i kɛlɛ, Matigi na se di i ma olu kan. U na bɔ i kama sira kelen fɛ, nka u na boli i ɲɛ sira wolonwula fɛ.
[8] «Matigi n'a fɔ ko duba ka da i ka jiginɛw ni i bolo baara bɛɛ kan. Matigi i ka Ala bɛ jamana min di i ma, a na duba i ye o kɔnɔ.
[9] «Ni i ye Matigi i ka Ala ka ciw mara ka a ka siraw taama, a na i sigi ka kɛ siya senuma ye Matigi ye, i ko a y'a kali i ye cogo min na.
[10] Dugukolo kan siyaw bɛɛ n'a ye ko i bɛ wele Matigi tɔgɔ la. U na siran i ɲɛ.
[11] «Matigi y'a kali i bɛnbaw ye ko a na jamana min di i ma, Matigi na i jiidi kosɛbɛ o kɔnɔ ka i wolodenw ni i ka bagan denw ni i ka dugukɔlɔ sɛnɛkɛ suman caya.
[12] Matigi na a ka sankolo nafolo mara yɔrɔɲuman dayɛlɛ ka sanji lana i ka dugukolo kan a waati la, ka duba i bolo baara bɛɛ ye. I na juru don siya caman la, i tɛna juru ta.
[13] Ne bɛ Matigi i ka Ala ka ci minw fɔ i ye bi, ni i ye olu kan minɛ ka u mara ka u kɛ, ne bɛ kuma minw fɔ i ye bi, ni i ma jɛngɛ ka mabɔ olu si la ka taa kinin wala numan fɛ ka tugu bato fɛn wɛrɛw nɔ fɛ ka baara kɛ u ye, o tuma la Matigi na i kɛ kunkolo ye, a tɛna i kɛ kukala ye. I na kɛ san fɛ dɔrɔn, i tɛna kɛ duguma.
[15] «Nka ni i ma sɔn ka Matigi i ka Ala kan minɛ, ne bɛ a ka ciw ni a ka sariya sigilen minw fɔ i ye bi, ni i ma olu bɛɛ mara ka u kɛ, nin dangali kow bɛɛ na se i ma ka kɛ i ta ye.
[16] «I na kɛ dangaden ye dugu kɔnɔ, ka kɛ dangaden ye kungo kɔnɔ.
[17] Danga na i ka so kɔnɔ bondon ni i ka dumuni dila minanw sɔrɔ.
[18] I wolodenw ni i ka dugukolo sɛnɛkɛ suman ni i ka bagan kunbaw denw ni i ka bagan misɛnw denw, danga na olu bɛɛ sɔrɔ.
[19] «I dontɔ na kɛ dangaden ye, i bɔtɔ na kɛ dangaden ye.
[20] «Matigi na danga ni hakiliɲaami ani kɔrɔfɔli lase i ma i bolo baara bɛɛ la, fo ka i halaki ka i ban joona i ka kɛwale juguw kosɔn, o kɛwalew de y'a to i ye ale bila.
[21] I bɛ taa don jamana min na k'a kɛ i ta ye, Matigi n'a to fiɲɛbana ka nɔrɔ i la fo ka i ban o jamana kɔnɔ.
[22] Matigi na i gosi ni sɔgɔsɔgɔninjɛ ni farigwan ni fununbana ni funteniba ni kawule jugu ni ja niɲɔ diro ye. Olu na tugu i nɔ fɛ fo ka i ban.
[23] I kunna sankolo na kɛ nsiranɛgɛ ye, i senkɔrɔ dugukolo na kɛ nɛgɛfin ye.
[24] Matigi na i ka jamana sanji kɛ buguri ni fɔlɔkɔ ye. O na jigin i kan ka bɔ sankolo la fo ka i halaki.
[25] «Matigi n'a to i juguw ka se sɔrɔ i kan. I na bɔ u kama sira kelen fɛ, nka i na boli u ɲɛ sira wolonwula fɛ. Dugukolo kan masayaw bɛɛ ja na tigɛ aw kosɔn.
[26] Aw suw na kɛ sanfɛ kɔnɔw bɛɛ ni dugukolo kan waraw bɛɛ ka dumuni ye, mɔgɔ si tɛna u gɛn.
[27] Matigi na i gosi ni sumuniw ye i ko min kɛra Misirakaw la, ani joli juguw ni maɲa ni kaba, i tɛna se ka kɛnɛya ka bɔ u la.
[28] Matigi na fa don i la ka i ɲɛw fiyen ka i ja wuli.
[29] Ka tile to kuncɛ, i na mɔmɔli kɛ i ko fiyentɔ bɛ mɔmɔli kɛ dibi la cogo min na. I ka ko kɛtaw si tɛnaɲɛ. Foyi tɛna kɛ i la fanga digili ni cɛli kɔ don o don. Mɔgɔ si tɛna i tila.
[30] «I na muso maminɛ, cɛ wɛrɛ na da a fɛ. I na so jɔ, i tɛna sigi a kɔnɔ. I na rezɛn nakɔ sɛnɛ, i tɛna a mɔ sɔrɔ.
[31] I ka ntura na faga i ɲɛ na, i tɛna a sogo dun. I ka fali na bɔsi i la, a tɛna kɔsegin i ma. I ka sagaw na di i juguw ma, mɔgɔ si tɛna i tila.
[32] I denkɛw ni i denmusow na don jɔnya la siya wɛrɛ mɔgɔw fɛ. U ɲɛnafin na tile i la fo ka i ɲɛ dibi tile bɛɛ la, i bolo tɛna se ka foyi kɛ.
[33] I ma siya minw dɔn, olu na i ka dugukolo sɛnɛkɛ suman ni i ka baara nɔ bɛɛ dun. Foyi tɛna kɛ i la fangadigili ni mɔrɔnkɔli kɔ.
[34] I ɲɛ bɛna ko minw ye, olu na fa don i la.
[35] Matigi na i gosi ni sumuni ye i kunberew ni i senkalaw la, k'a daminɛ i sentɛgɛw la fo ka taa bila i kunkolo la, i tɛna se ka kɛnɛya.
[36] I na masakɛ min sigi i kun na, Matigi na taa ni i ni o masakɛ ye siya wɛrɛw ka yɔrɔ la k'a sɔrɔ i ni i bɛnbaw tun ma o siya dɔn. Ka i to yen i na baara kɛ bato fɛn wɛrɛw ye, jirima fɛnw ni kabakurunma fɛnw don.
[37] Matigi bɛ taa ni i ye siya minw cɛma, i na kɛ kɔnɔnafili fɛn ni ntalenda fɛn ni yɛlɛbɔ fɛn ye olu bɛɛ ɲɛ na.
[38] «I na danni si caman seri i ka forow la, nka i tɛna bɛrɛ sɔrɔ sabu ntɔnw na a dun.
[39] I na rezɛn nakɔw bi ka u sɛnɛ, nka i tɛna diwɛn sɔrɔ u la k'a min, i tɛna o rezɛn mɔ kari sabu ntumuw na u dun.
[40] Olive sunw na kɛ i fɛ i ka jamana fan bɛɛ la, nka i tɛna tulu sɔrɔ ka i mun, sabu i ka oliveden gerenw na burun.
[41] I na denkɛw ni denmusow bange, nka u tɛna kɛ i ta ye sabu u na minɛ ka kɛ jɔnw ye.
[42] Ntɔnw na i ka jiriw ni i ka dugukolo sɛnɛkɛ suman bɛɛ dun.
[43] Siginfɛ min bɛ i cɛma, o na kɔrɔta ka tɛmɛn i kan ka taa ɲɛ. I na majigin ka segin ko fɛ.
[44] A na juru don i la, i tɛna juru don a la. A na kɛ kunkolo ye, i na kɛ kukala ye.
[45] «Nin dangali kow bɛɛ na bi i kan ka tugu i la ka kɛ i ta ye fo ka i halaki, katuguni i ma sɔn ka Matigi i ka Ala kan minɛ, ka a ka ciw ni a ka sariyaw mara, a ye olu minw fɔ i ye.
[46] U na kɛ taamashyɛn ni kabako ye i ni i bɔnsɔn kan badaa.
[47] «Matigi i ka Ala ye fɛn bɛɛ di i ma k'a caya, nka i ma baara kɛ a ye niɲagali ye,
[48] o de y'a to Matigi na i jugu minw ci i kama, i kɔngɔtɔ ni i minnɔgɔtɔ ni i farilankolon ni i kɔlibaatɔ na baara kɛ olu ye. A na zu nɛgɛma da i tɔn na fo ka i halaki ka i ban.
[49] Matigi na siya dɔ wuli i kama ka bɔ yɔrɔ jan dugukolo dan yɛrɛ la, i ko bɔn bɛ pan cogo min na. I tɛna o siya kumakan mɛn.
[50] Siyaɲɛda farinmaw don, u tɛna mɔgɔ kɔrɔba bonya, u tɛna hinɛ denmisɛnw la.
[51] U na i ka baganw ni i ka dugukolo sɛnɛkɛ suman dun fo ka i halaki, u tɛna sɛnɛ fɛn wala diwɛn kɛnɛ wala bagan kunbaw wala bagan misɛnw si to i bolo, u na i ban.
[52] U na daga sigi i ka duguw bɛɛ da la. I jigi tun dara i ka kɛlɛkunbɛn kogojan barikama minw kan i ka jamana yɔrɔw bɛɛ la, olu na bi. Matigi i ka Ala ye jamana min di i ma, u na daga sigi i ka duguw bɛɛ da la o yɔrɔw bɛɛ la.
[53] Ka i degunnen corilen to i juguw ka daga sigili kosɔn, i na i wolodenw dun. Matigi i ka Ala ye denkɛ ni denmuso minw di i ma, i na olu sogo dun.
[54] Aw la cɛɲɛsumalen fɛrɛlen na a balima ni a furumuso ni a den tɔ tolenw mafilɛ ni a ɲɛ jugu ye.
[55] A bɛ a den dɔw sogo dun tuma min na, a tɛna foyi di u si ma, sabu foyi tɛ a bolo tun, k'a masɔrɔ i juguw bɛɛ na daga sigi i ka duguw bɛɛ da la ka i corin ka i degun.
[56] Aw la musoɲɛsumalen fɛrɛlen min tɛ sɔn ka a sentɛgɛ da duguma a kaɲɛ suma ni fɛrɛ kosɔn, o na a furucɛ ni a denkɛ ni a denmuso mafilɛ ni a ɲɛ jugu ye.
[57] Hali tonso min bɛ bɔ a sen furancɛ la ani a wolodenw, a na olu dun dogo la dɛsɛ kosɔn, sabu i jugu bɛ na daga sigi i ka duguw da la ka i corin ka i degun.
[58] «Sariya kuma minw sɛbɛnnen bɛ nin kitabu la, ni i ma olu mara ka u kɛ, ni i ma siran nin tɔgɔ nɔɔrɔma siranfɛnbaɲɛ, Matigi i ka Ala kɔni,
[59] o tuma la Matigi na i ni i bɔnsɔn gosi ni tɔɔrɔ koba kabakomaw ani bana jugu dabilabaliw ye.
[60] I tun siranna Misira jamana bana minw ɲɛ, a na olu bɛɛ lase i ma, u na nɔrɔ i la.
[61] Bana sifa bɛɛ ni tɔɔrɔ sifa o sifa minw ma sɛbɛn nin sariya kitabu la, Matigi na olu lase i ma fo ka i halaki.
[62] Hali ni aw tun ka ca i ko sankolola dolow, aw tɔ tolen tɛna kɛ bɛrɛ ye, katuguni i ma Matigi i ka Ala kan minɛ.
[63] A diyara Matigi ye ka ko ɲuman kɛ aw ye ka aw jiidi cogo min na, o cogo la a na diya Matigi ye ka aw halaki ka aw ban. Aw bɛ don jamana min kɔnɔ k'a kɛ aw ta ye, aw na tufa ka bɔ o la.
[64] Matigi na i jɛnsɛn siyaw bɛɛ cɛma, k'a daminɛ dugukolo kun kelen na, ka taa bila kun dɔ la. K'i to yen, i na baara kɛ bato fɛn wɛrɛw ye, i ni i bɛnbaw tun ma minw dɔn, jirima fɛnw ni kabakurunma fɛnw don.
[65] Ka i to o siyaw cɛma, i tɛna fɛrɛ si sɔrɔ, i sen tɛna lafiya yɔrɔ sɔrɔ. Matigi n'a to dusukun yɛrɛyɛrɛ niɲɛlafin ani jigitigɛ ka i minɛ.
[66] I na sigasiga i yɛrɛ ni ko la, i na siran su fara tile kan. I na jɔrɔ i saya ko la tuma bɛɛ.
[67] Siran min bɛ i dusukun fa ani i ɲɛ bɛ ko minw ye, olu kosɔn i n'a fɔ sɔgɔma da fɛ ko: ‹Ni a y'a sɔrɔ su tun kora.› Su fɛ, i n'a fɔ ko: ‹Ni a y'a sɔrɔ dugu tun jɛra.›
[68] Matigi na i kɔsegin Misira jamana la jikan kurunw kɔnɔ. Ne tun y'a fɔ ko: ‹I tɛna sira min ye tun,› i na kɔsegin o fɛ. Aw n'a ɲini ka aw yɛrɛw feere aw juguw ma ka kɛ jɔnkɛw ni jɔnmusow ye yen, nka mɔgɔ si tɛna aw san.»