[1] «Ni kira dɔ wala sugokɛla dɔ wulila i cɛma ka taamashyɛn ni kabako ko fɔ i ye,
[2] a kumana taamashyɛn ni kabako minw ko la, ni olu kɛra, ni a y'a fɔ i ye ko i ka taa a fɛ ka bato fɛn wɛrɛw bato, ka baara kɛ u ye, k'a sɔrɔ i ma olu dɔn,
[3] i kana o kira wala o sugokɛla ka kumaw lamɛn, sabu Matigi aw ka Ala bɛ aw kɔrɔbɔ k'a dɔn yala ni aw bɛ Matigi aw ka Ala kanu ni aw dusukun bɛɛ ni aw ni bɛɛ ye.
[4] Aw ka tugu Matigi aw ka Ala nɔ fɛ ka siran a ɲɛ ka a ka ci fɔlenw mara k'a kan minɛ ka baara kɛ a ye ka nɔrɔ a la.
[5] O kira wala o sugokɛla ka faga, sabu a ye murutili kuma fɔ Matigi aw ka Ala ma, o min ye aw labɔ Misira jamana la ka aw kunmabɔ ka bɔ jɔnya la. Matigi i ka Ala ko i ka sira min taama, o mɔgɔ tun b'a fɛ ka i lafili ka bɔ o la. I na o ko jugu ban ka bɔ i cɛma ten.
[6] «Ni i balima, i ba denkɛ, wala i denkɛ, wala i denmuso, wala i yɛrɛ muso, min ko ka di i ye, wala i terikɛ min ko ka di i ye i ko i yɛrɛ dusukun, ni olu dɔ ye i nɛgɛn dogo la k'a fɔ i ye ko i ka taa a fɛ ka baara kɛ bato fɛn wɛrɛw ye, k'a sɔrɔ i ni i bɛnbaw tun ma olu dɔn,
[7] i kɛrɛfɛ siyaw ka bato fɛnw kɔni, u ka surun i la wo, u ka jan i la wo, ka bɔ dugukolo kun dɔ la ka taa se a kun dɔ ma,
[8] i kana sɔn o ma, i kana a ka kuma lamɛn. I kana hinɛ a la hali dɔɔnin, i kana makari a la, i kana a dogo,
[9] nka i ka a faga. I yɛrɛ bolo ka se a ma fɔlɔ, o kɔ, mɔgɔ tɔw bolo ka se a ma k'a faga.
[10] I k'a bon ni kabakurunw ye k'a faga, katuguni a tun b'a fɛ ka i nɛgɛn ka i mabɔ Matigi i ka Ala la, o min ye i labɔ Misira jamana jɔnya so la.
[11] Israɛl bɔnsɔn bɛɛ na o mɛn ka siran. U tɛna o bɔɲɔgɔnko ko jugu kɛ i cɛma tun.
[12] «Matigi i ka Ala bɛ dugu minw di i ma ka kɛ i sigi yɔrɔw ye, ni i y'a mɛn olu dɔ ko la ko
[13] mɔgɔ sɔnkolon dɔw bɔra i cɛma ka taa o dugu mɔgɔw nɛgɛn ka taa baara kɛ bato fɛn wɛrɛw ye, k'a sɔrɔ i ma olu dɔn,
[14] o tuma la i ka ɲininkali kɛ ka sɛgɛsɛgɛli kɛ walisa i k'a dɔn k'a jɛya ni a y'a sɔrɔ ko o ye tiɲɛ ye, ko a jɛyalen don ko o ko haramulen kɛra i cɛma,
[15] i ka o dugu mɔgɔ faga ni npan ye, ka o dugu ni a kɔnɔ fɛnw bɛɛ halaki ka u ban, ka a baganw faga ni npan ye.
[16] I ka o dugu nafolo bɛɛ lajɛɲɔgɔn kan fɛrɛkɛnɛ la ka dugu ni a nafolo bɛɛ jeni ni tasuma ye. O na kɛ i ko saraka jenita Matigi i ka Ala ɲɛ kɔrɔ. A ka kɛ tomon ye, a kana sigi tun abada.
[17] Fɛn haramulen si kana sɔrɔ i bolo, walisa Matigi ka a ka dimiyaba bila, ka makari i la ka nɛɛma kɛ i ye, ka i jiidi i ko a y'a kali i bɛnbaw ye cogo min na.
[18] A na o kɛ, ni i ye Matigi i ka Ala kan minɛ ka ko tilennenw kɛ Matigi i ka Ala ɲɛ kɔrɔ ka a ka ciw bɛɛ mara, ne bɛ o minw fɔ i ye bi.