[1] «Ne ye duba ni dangali ko minw bila i ɲɛ kɔrɔ bi, i bɛ se kaɲɛnatɔmɔli kɛ olu la. Ni nin kow bɛɛ ye i sɔrɔ tuma min na, ni i ye i hakili jigin u la ka i to siyaw cɛma, Matigi i ka Ala ye i jɛnsɛn o yɔrɔ minw na,
[2] ni i ni i denw segira Matigi i ka Ala ma ka a kan minɛ ni i dusukun bɛɛ ani i hakili bɛɛ ye ka kɛɲɛ ni ne ka kuma fɔlenw bɛɛ ye i ye bi,
[3] o tuma la Matigi i ka Ala na makari i la ka i ka mɔgɔ minɛlenw bɔ jɔnya la. Matigi i ka Ala tun ye i jɛnsɛn siya minw cɛma, a na i lajɛ ko kura ka bɔ olu cɛma.
[4] «Hali ni i jɛnsɛnna ka taa sankolo kun dɔ la, Matigi i ka Ala na i ɲini ka i lajɛɲɔgɔn kan ka i bɔ yen.
[5] Jamana min tun ye i bɔnsɔn ta ye, Matigi i ka Ala na i lana o kɔnɔ, a na kɛ i ta ye, a na ko ɲuman kɛ i ye ka i jiidi ka tɛmɛn i bɛnbaw kan.
[6] Matigi i ka Ala na i ni i bɔnsɔnw dusukunw kɛ i n'a fɔ bolokolenw, walisa i ka Matigi i ka Ala kanu ni i dusukun bɛɛ ani i ni bɛɛ ye, walisa i ɲɛnama ka to.
[7] Matigi i ka Ala na o dangali kow bɛɛ bi i juguw ni i koniyabaaw ni i tɔɔrɔbaaw bɛɛ kan.
[8] E kɔni, i na kɔsegin Matigi ma, i na a kan minɛ, i na a ka ci fɔlenw mara ka u kɛ, ne ye olu minw fɔ i ye bi.
[9] Matigi i ka Ala na i jiidi ka duba i ye i bolo baara nɔw bɛɛ la, i wolodenw ni i ka baganw denw ani i ka dugukolo sɛnɛ suman na caya. A na diya Matigi ye ka ko ɲuman kɛ i ye ko kura, i ko a ye ko ɲuman kɛ i bɛnbaw ye cogo min na.
[10] Ni i ye Matigi i ka Ala kan minɛ ka a ka ci fɔlenw mara, o ko fɔlen minw sɛbɛnna nin sariya kitabu la, n'i kɔseginna Matigi i ka Ala ma ni i dusukun bɛɛ ni i hakili bɛɛ ye, o na kɛ.
[11] «Ne bɛ nin ci minw fɔ i ye, o man gɛlɛn i ma, a yɔrɔ man jan i la.
[12] A tɛ sankolo la fo i k'a fɔ ko: ‹Jɔni na yɛlɛn ka taa sankolo la an kosɔn ka o kuma minɛ an ye ka o fɔ an ɲɛ na walisa an k'a kɛ?›
[13] A tɛ kɔgɔji kɔ fɛ fana fo i k'a fɔ ko: ‹Jɔn na taa kɔgɔji kɔ fɛ an kosɔn ka o kuma minɛ ka o fɔ an ye walisa an k'a lamɛn k'a kɛ?›
[14] Nka o kuma ka surun i la, a bɛ i da fɛ, a bɛ i dusukun na, walisa i k'a mara k'a kɛ.
[15] «A filɛ, ne bɛɲɛnamaya ni hɛrɛ bila i ɲɛ kɔrɔ bi, ani saya ni ko jugu.
[16] K'a masɔrɔ ne y'a fɔ i ye ko i ka Matigi i ka Ala kanu k'a ka siraw taama k'a ka ci fɔlenw mara ani a ka sariyaw ni a ka ko latigɛlenw, walisa i ɲɛnama ka to ka jiidi, walisa i bɛ taa don jamana min kɔnɔ k'a kɛ i ta ye, Matigi i ka Ala ka duba i ye o kɔnɔ.
[17] Nka ni i dusukun jɛngɛna ka mabɔ Ala la, ni i ma a kan minɛ, ni i sɔnna mɔgɔ ka i nɛgɛn ka taa bato fɛn wɛrɛw nɔ fɛ ka i biri u kɔrɔ, ka baara kɛ u ye,
[18] ne b'a fɔ aw ye ka a jɛya ko aw na halaki, siga t'a la. Aw na Jurdɛn ba tigɛ ka don jamana min kɔnɔ ka kɛ aw ta ye, aw si tilew tɛna caya o kɔnɔ fewu.
[19] «Ne bɛ sankolo ni dugukolo wele ka u kɛ seere ye aw kama bi, ko ne ye ɲɛnamaya ni saya bila i ɲɛ kɔrɔ bi, ani duba ni danga. I ka ɲɛnamaya ɲɛnatɔmɔ, walisa i ni i bɔnsɔn ɲɛnama ka to.
[20] I ka Matigi i ka Ala kanu ka a kan minɛ ka nɔrɔ a la, k'a masɔrɔ ale de ye i ka ɲɛnamaya ye, a bɛ i si tilew caya. O cogo la Matigi y'a kali i bɛnbaw Ibrahima ni Isaka ani Yakuba ye ko a na jamana min di i ma, i na sigi o kɔnɔ.»