[1] «Nɔ wala fiɲɛ bɛ misi wala saga min na, i kana o faga ka kɛ saraka ye Matigi i ka Ala ye. O ye ko haramulen ye Matigi i ka Ala fɛ.
[2] «Matigi i ka Ala bɛ dugu minw di i ma, ni cɛ dɔ wala muso dɔ sɔrɔla i cɛma yen min bɛ ko jugu kɛ Matigi i ka Ala ɲɛ kɔrɔ, ka a ka layidu tiɲɛn,
[3] ka taa bato fɛn wɛrɛw nɔ fɛ ka baara kɛ u ye ka biri u kɔrɔ, ka tile wala kalo wala sankolo dolow bato k'a sɔrɔ ne ma o fɔ,
[4] ni a fɔra i ye, ni i ye o kibaru mɛn, i ka sɛgɛsɛgɛli kɛ kosɛbɛ. Ni a sɔrɔla tiɲɛ ye, ni a jɛyalen bɛ ko o ko haramulen kɛra Israɛl cɛma,
[5] o tuma la cɛ wala muso min ye o ko jugu kɛ, i ka taa n'o ye i ka dugu donda la, ka o cɛ wala o muso bon ni kabakurunw ye ka a faga.
[6] Min ka kan ni saya ye, o ka faga seere fila wala seere saba dala kuma kosɔn. A kana faga seere kelenpe dala kuma kosɔn.
[7] Seere bolo ka se a ma fɔlɔ, o kɔ, mɔgɔ tɔw bolo ka se a ma k'a faga. I na ko jugu ban i cɛma ten.
[8] «Ni mɔgɔ fagali ko walaɲɔgɔn sendonni ko walaɲɔgɔn gosili ko wulila ka kɛ sɔsɔli ko ye i ka dugu kɔnɔ fo ka o kiri tigɛli gɛlɛya i ma, i ka wuli ka taa Matigi i ka Ala ka yɔrɔɲɛnatɔmɔlen na.
[9] I ka taa sarakalasebaaw Levitew ni o waati kiritigɛla sɛgɛrɛ ka olu ɲininka. U na o kiri koɲɛnabɔ i ye.
[10] U na kiri koɲɛnabɔ cogo min fɔ i ye Matigi ka yɔrɔɲɛnatɔmɔlen na, i ka o kɛ. U bɛ i kalan fɛn o fɛn na, i ka i janto o bɛɛ la ka o kɛ.
[11] U bɛ i kalan sariya ko min na ka kiri ko min fɔ i ye, i ka olu kɛ. U bɛ kiri ko min fɔ i ye, i kana o bila ka taa kinin fɛ wala numan fɛ.
[12] Sarakalasebaa min bɛ jɔ Matigi i ka Ala ɲɛ kɔrɔ ka a ka baara kɛ, mɔgɔ min ye a kuncɛ bonya ko a tɛna o ka kuma lamɛn, ko a tɛna kiritigɛla ka kuma lamɛn, o tigi ka faga. I na ko jugu ban Israɛl cɛma ten.
[13] Mɔgɔw bɛɛ na o kibaru mɛn ka siran, u tɛna u kuncɛ bonya tun.
[14] «Matigi i ka Ala bɛ jamana min di i ma, ni i donna o la k'a tigiya minɛ ka sigi a kɔnɔ tuma min na, ni i y'a fɔ ko i na masakɛ sigi i kun na i ko i lamini siyaw b'a kɛ cogo min na,
[15] o tuma la Matigi i ka Ala bɛ mɔgɔ min ɲɛnatɔmɔ, i ka o sigi i kun na, o ka kɛ mɔgɔ ye min bɔra i balimaw cɛma. A kana kɛ jamana wɛrɛ mɔgɔ ye, o min tɛ i balima ye.
[16] O kana yɛlɛnkan sow caya a yɛrɛ fɛ, a kana mɔgɔw bila ka taa Misira jamana la walisa ka yɛlɛnkan so caman sɔrɔ, katuguni Matigi y'a fɔ aw ye ko aw tɛna kɔsegin o sira fɛ tun abada.
[17] A kana muso caman furu, walisa a dusukun kana yɛlɛma. A kana warijɛ ni sanu caman lajɛ a yɛrɛ ye.
[18] Ni a sigira a ka masaya masasigilan kan tuma min na, a ka nin sariya kitabu minɛ sarakalasebaaw Levitew fɛ ka a bɛɛ sɛbɛn sɛbɛn dɔ kan a yɛrɛ ye.
[19] A ka a to a kɔrɔ ka a kalan a si tilew bɛɛ la, walisa a ka dege Matigi a ka Ala ɲɛsiran na, ka nin sariya sigilen kumaw ni a ci fɔlenw bɛɛ mara ka u kɛ.
[20] O sɛbɛn ka to a fɛ walisa a kuncɛ kana bonya a balimaw kun na, a kana na fara ka nin ci fɔlenw bila ka taa kinin fɛ wala numan fɛ, walisa a ni a denw ka to masaya la ka tile caman sɔrɔ Israɛl cɛma.