[1] «Ni i bɔra ka taa i juguw kɛlɛ tuma min na, ni i y'a ye ko yɛlɛnkan sow ni wotorow ni mɔgɔw ka ca u fɛ kosɛbɛ ka tɛmɛn i kan, i kana siran u ɲɛ, katuguni Matigi i ka Ala bɛ i fɛ, o min ye i labɔ Misira jamana la.
[2] Ni aw surunyara kɛlɛ yɔrɔ la, sarakalasebaa ka gɛrɛ mɔgɔw la k'a fɔ u ye ko:
[3] ‹Israɛl, i ka lamɛnni kɛ. Aw surunyara aw juguw kɛlɛ yɔrɔ la bi. Aw ja kana tigɛ, aw kana siran, aw kana yɛrɛyɛrɛ, aw kana kɔnɔnafili u ɲɛ.
[4] Katuguni aw ka Ala bɛ taa aw ɲɛ ka aw dɛmɛ ka aw juguw kɛlɛ ka aw tanga u ma.›
[5] «O kɔ, sɔrɔdasi kuntigiw k'a fɔ mɔgɔw ye ko: ‹Cɛ jumɛn ye so kura jɔ ni a ma o di Ala ma fɔlɔ? O tigi ka kɔsegin so walisa a kana to kɛlɛ la, mɔgɔ wɛrɛ kana na o so di Ala ma.
[6] Cɛ jumɛn ye rezɛn nakɔ sɛnɛ n'a m'a tɔnɔ sɔrɔ fɔlɔ? O tigi ka kɔsegin so walisa a kana to kɛlɛ la, mɔgɔ wɛrɛ kana na a tɔnɔ sɔrɔ.
[7] Cɛ jumɛn ye muso maminɛ ni a m'a furu fɔlɔ? O tigi ka kɔsegin so walisa a kana to kɛlɛ la, mɔgɔ wɛrɛ kana na o ta a kɔ.›
[8] Kuntigiw ka taa ɲɛ kuma la k'a fɔ mɔgɔw ye ko: ‹Cɛ jumɛn bɛ siran ni a ja tigɛlen don? O tigi ka kɔsegin so walisa a balimaw fari kana faga i ko ale.›
[9] Ni sɔrɔdasi kuntigiw tilara kuma la mɔgɔw fɛ tuma min na, u ka kɛlɛbolo kuntigiw sigi mɔgɔw kun na.
[10] «Ni i gɛrɛla dugu dɔ la tuma min na ko i b'a kɛlɛ, i ka hɛrɛ ko fɔ a ye.
[11] Ni o dugu sɔnna hɛrɛ ma ka a daw yɛlɛ, o tuma la o dugu mɔgɔw bɛɛ ka bila diyagoya baara la ka kɛ i ka jɔnw ye.
[12] Ni a ma sɔn ka hɛrɛ ɲini i fɛ, ni a ko a bɛ i kɛlɛ, o tuma la i ka daga sigi a da la.
[13] Ni Matigi i ka Ala y'a don i bolo tuma min na, i ka o dugu cɛw bɛɛ faga ni npan ye.
[14] Nka a musow ni denmisɛnw ni baganw ni dugu kɔnɔ fɛnw bɛɛ na kɛ i ta ye. I ka a nafolo bɛɛ cɛ i yɛrɛ ye. Matigi i ka Ala ye i juguw ka nafolo min di i ma, i ka o dun.
[15] Dugu minw yɔrɔ ka jan i la ni u tɛ nin siyaw ka duguw ye, i ka olu bɛɛ kɛ ten.
[16] Nka Matigi i ka Ala bɛ nin siyaw ka dugu minw di i ma ka kɛ i ta ye, ninakili bɛ o dugu kɔnɔ fɛn, fɛn o fɛn na, i kana olu siɲɛnama to.
[17] I ka o mɔgɔw halaki ka u ban pewu, Hɛti bɔnsɔn ni Amɔr siya ni Kanankaw ni Ferɛz siya ni Hev siya ani Jebuskaw kɔni, i ko Matigi i ka Ala y'a fɔ i ye cogo min na.
[18] I ka o kɛ walisa u bɛ ko haramulen minw kɛ u ka bato fɛnw ye, u kana aw dege olu si la, walisa aw kana na Matigi aw ka Ala hakɛ ta.
[19] «Ni i dagara dugu dɔ da la ka a kɛlɛ walisa i ka a minɛ, ni i mɛnna yen, i kana a jirisunw tigɛ ka u tiɲɛn. I bɛ se ka u denw dun, i kana u tigɛ, sabu kungo jiri tɛ mɔgɔ ye ko i bɛ taa a kɛlɛ.
[20] Nka i b'a dɔn ko jiri minw den tɛ dun, i bɛ se ka olu tigɛ ka kɛlɛkɛ yɔrɔw dila n'u ye dugu kama fo ka se sɔrɔ a kan.