[1] «Sarakalasebaaw Levitew, Levi siya bɛɛ kɔni, olu kana niyɔrɔ wala ciyɛn sɔrɔ Israɛl fɛ. U ka balo Matigi ka tasuma la sarakaw ni a niyɔrɔ la.
[2] U kana ciyɛn ta u balimaw fɛ. Matigi de ye u ka ciyɛn ye, i ko a y'a fɔ u ye cogo min na.
[3] Mɔgɔ minw bɛ misi wala saga bɔ ka kɛ saraka ye, sarakalasebaaw niyɔrɔ filɛ ka bɔ olu ka sarakaw la. Kaman ni dadugula ni furu ka di sarakalasebaaw ma.
[4] I ka suman kura ni i ka diwɛn kɛnɛ ni i ka tulu ani i ka sagasi kannen fɔlɔw di sarakalasebaa ma,
[5] katuguni Matigi i ka Ala ye ale deɲɛnatɔmɔ ka bɔ i ka siyaw bɛɛ la ko a ni a bɔnsɔnw ka jɔ ka baara kɛ Matigi tɔgɔ la badaa.
[6] «Ni Levite dɔ bɔra a sigi yɔrɔ la i ka dugu dɔ kɔnɔ Israɛl yɔrɔ o yɔrɔ la ka taa Matigi ka yɔrɔɲɛnatɔmɔlen na, sabu o yɔrɔ nege b'a la kosɛbɛ,
[7] ni o Levite bɛ baara kɛ Matigi a ka Ala tɔgɔ la i ko a balimaw Levite tɔ minw jɔlen bɛ Matigi ɲɛ kɔrɔ,
[8] tɔw bɛ niyɔrɔ min sɔrɔ ka kɛ u balo ye, o ɲɔgɔn ka di ale fana ma. Ni o Levite ye a bolo fɛn min feere, o wari ye a yɛrɛ kelen ta ye.
[9] «Matigi i ka Ala bɛ jamana min di i ma, ni i donna o la tuma min na, i kana tugu o siyaw ka ko haramulenw nɔ fɛ ka u ladege.
[10] Mɔgɔ min bɛ a denkɛ wala a denmuso kɛ tasuma la saraka ye, o si kana sɔrɔ aw cɛma, wala buguridala wala filɛlikɛla wala boli dilabaa wala subaa,
[11] wala kilisifɔla wala jinɛkilila wala dɔnbaa wala sukilila,
[12] katuguni o kow kɛbaaw haramulen bɛ Matigi fɛ. O ko haramulenw de kosɔn Matigi i ka Ala bɛ o siyaw gɛn ka bɔ i ɲɛ.
[13] I ka kɛ mɔgɔ dafalen ye Matigi i ka Ala ɲɛ kɔrɔ
[14] k'a masɔrɔ i bɛna nin siya minw gɛn, olu bɛ filɛlikɛlaw ni buguridalaw ka kuma lamɛn, nka e kɔni, Matigi i ka Ala ma sɔn i ka o ɲɔgɔn kɛ.
[15] «Matigi i ka Ala na ne bɔɲɔgɔnko kira lawuli i ye ka bɔ i balimaw cɛma. Aw ka o lamɛn.
[16] I ye min deli Matigi i ka Ala fɛ Hɔrɛb jamalajɛ don na, o don. I y'a fɔ ko i kana Matigi i ka Ala kan mɛn tun, i kana o tasumaba ye tun, walisa i kana na sa.
[17] Matigi y'a fɔ ne ye ko u ye min fɔ, o ka ɲi.
[18] Ko Matigi na ne bɔɲɔgɔnko kira lawuli ka bɔ u balimaw cɛma. A na a ka kumaw don o da la. Ko a bɛ ko minw fɔ o ye, o na olu bɛɛ fɔ aw ye.
[19] Matigi ko: ‹O kira na ne ka kuma minw fɔ ne tɔgɔ la, ni mɔgɔ o mɔgɔ ma sɔn ka olu lamɛn, ne yɛrɛ na o tigi ɲininka.
[20] Nka kira min bɛ a kuncɛ bonya ka kuma ne tɔgɔ la k'a sɔrɔ ne m'a fɔ ko a ka kuma wala ni a bɛ kuma bato fɛn wɛrɛ tɔgɔ la, o kira ka faga.
[21] A dɔrɔ i n'a fɔ i kɔnɔ ko Matigi ma kuma min fɔ, aw na se ka o dɔn cogo di?
[22] Ayiwa ni kira dɔ kumana Matigi tɔgɔ la, ni o ka fɔlen ma ye, ni a ma dafa, o tɛ Matigi ka kuma fɔlen ye. O kira y'a kuncɛ bonya ka o fɔ. I kana siran a ɲɛ.›