[1] «O tuma la Matigi y'a fɔ ne ye ko ne ka kabakurun walaha fila dɛsɛ i ko fɔlɔtaw, ka yɛlɛn ka taa a fɛ kulu kan. Ko ne ka jiri wagande kelen fana dila.
[2] Ko ne ye walaha fɔlɔ minw ci, kuma min tun sɛbɛnna olu kan, ko a na o kumaw sɛbɛn o walaha fila kan. Ko ne ka u bila wagande kɔnɔ.
[3] Ne ye wagande dila ni zajɛ jiri ye, ka kabakurun walaha fila dɛsɛ i ko fɔlɔtaw. Ne yɛlɛnna kulu kan ni o walaha fila ye ne bolo.
[4] Matigi ye a kan bɔ kulu kan k'a to tasuma cɛmancɛ la jamalajɛ don na ka ci fɔlen minw fɔ aw ye, a ye olu sɛbɛn walahaw kan ka kɛɲɛ ni fɔlɔta sɛbɛnnenw ye. Matigi ye u di ne ma.
[5] Ne kɔseginna ka jigin ka bɔ kulu kan, ka o walahaw bila ne ka wagande dilalen kɔnɔ. U bɛ yen, i ko Matigi y'a fɔ ne ye cogo min na.»
[6] (Ayiwa Israɛl bɔnsɔn bɔra Beɛrɔt-Bɛnɛ-Jakan ka taa se Mosera. Aron sara yen, a su donna yen. A denkɛ Eleazar ye sarakalasebaaya baara kɛ a nɔ na.
[7] U bɔra yen ka taa Gudigoda, ka bɔ Gudigoda ka taa Jotibata, o ye kɔji jamana ye.
[8] O tuma la Matigi ye Levi siya bila u dan na, ka ci fɔ ko u ka Matigi ka layidu wagande doni, ko u ka u jɔ Matigi ɲɛ kɔrɔ ka a ka baara kɛ, ka dubaw kɛ a tɔgɔ la fo ka na se bi ma.
[9] O de y'a to niyɔrɔ ni ciyɛn tɛ Levi fɛ a balimaw cɛma. Matigi ye a ciyɛn ye, i ko Matigi i ka Ala y'a fɔ a ye cogo min na.)
[10] «Ne ye tile binaani ni su binaani kɛ kulu kan i ko fɔlɔta cogo. Matigi ye ne ka kuma lamɛn o tuma la fana. Matigi ma sɔn ka i halaki tun.
[11] Matigi y'a fɔ ne ye ko ne ka wuli ka nin mɔgɔw ɲɛ minɛ. Ko ale y'a kali u bɛnbaw ye ko a na jamana min di u ma, u ka don yen ka o tigiya minɛ.
[12] «Sisan Israɛl, Matigi i ka Ala bɛ mun wajibiya i ma nin fɛn kelen kɔ? Ko i ka siran Matigi i ka Ala ɲɛ ka a ka siraw bɛɛ taama k'a kanu ka baara kɛ Matigi i ka Ala ye ni i dusukun bɛɛ ni i ni bɛɛ ye.
[13] Ko ne bɛ Matigi ka ciw ni a ka sariya sigilen minw fɔ i ye bi, i ka olu mara walisa i ka to hɛrɛ la.
[14] A filɛ, sankolo ni sankolow bɛɛ kunna sankolo ani dugukolo ni a kɔnɔ fɛnw bɛɛ ye Matigi i ka Ala taw ye.
[15] O bɛɛ n'a ta, Matigi nɔrɔla i bɛnbaw dɔrɔn de la, ka u kanu, ka u bɔnsɔnɲɛnatɔmɔ u kɔ, aw yɛrɛw kɔni, ka aw bɔ siyaw bɛɛ cɛma. A bɛ ten halibi.
[16] Aw dusukunw ka kɛ i ko bolokolenw, aw kana kɛ mɔgɔ tulo gɛlɛnw ye tun,
[17] k'a masɔrɔ Matigi aw ka Ala ye bato fɛnw bɛɛ kunna Ala ye, matigiw bɛɛ ka Matigi don, Alaba, Sebaayabatigi, siranfɛnba don. A tɛ mɔgɔ bɔ mɔgɔ la, a tɛ surɔ fɛn minɛ.
[18] A bɛ tilennenya kɛ falatɔ ni muso cɛ salen ye. A bɛ siginfɛ kanu k'a balo, k'a fɛɛrɛbɔ.
[19] Aw ka siginfɛ kanu, sabu aw yɛrɛw tun ye siginfɛw ye Misira jamana la.
[20] I ka siran Matigi i ka Ala ɲɛ, ka baara kɛ a ye, ka nɔrɔ a la, ka i kali a tɔgɔ la.
[21] Ale de ye i tanuli sababu ye, i ka Ala don. Ale de ye nin kobaw ni siran kobaw kɛ i ye i yɛrɛɲɛ na.
[22] I bɛnbaw taara Misira jamana la tuma min na, u dama tun ye mɔgɔ biwolonwula ye. Sisan Matigi i ka Ala ye i caya i ko sankolola dolow.