[1] Ayiwa Filisitikaw bɔra ka Israɛl bɔnsɔn kɛlɛ. Israɛl bɔnsɔn bolila Filisitikaw ɲɛ, u la mɔgɔ caman fagara Gilboa kulu kan.
[2] Filisitikaw tugura Saul ni a denkɛw nɔ fɛ. U ye Saul denkɛ saba Jonatan ni Abinadab ani Malikisua faga.
[3] Kɛlɛ juguyara Saul ma. Bonnikɛla dɔ ka biɲɛ ye Saul sɔrɔ fo k'a jogin kosɛbɛ.
[4] Saul y'a fɔ a ka kɛlɛkɛ minan tabaa ye ko: «I ka npan foosi ka ne sɔgɔ n'a ye walisa o bolokobaliw kana na ne sɔgɔ ka tulon kɛ ne la.» Nka o kɛlɛkɛ minan tabaa ma sɔn, k'a masɔrɔ o sirannen tun don. O tuma la Saul y'a ka npan ta ka i turu o kan.
[5] A ka kɛlɛkɛ minan tabaa y'o ye minkɛ, o fana ye i turu a ka npan kan, a ni Saul saraɲɔgɔn fɛ.
[6] Saul ni a denkɛ saba ni a ka kɛlɛkɛ minan tabaa ni a fɛ cɛw sara o don kelen na.
[7] Israɛl bɔnsɔn minw sigilen tun bɛ jɛkɛnɛ fan dɔ fɛ ani Jurdɛn ba kɔ fɛ, olu ye Israɛl bɔnsɔn ka kɛlɛkɛ cɛw bolitɔ ye minkɛ, k'a mɛn ko Saul ni a denkɛw fagara, olu ye u ka duguw bila ka boli. O tuma la Filisitikaw taara u sigi o duguw kɔnɔ.
[8] O dugusajɛ, Filisitikaw taara suw la finiw wɔrɔn. U ye Saul ni a denkɛ saba suw sɔrɔ Gilboa kulu kan.
[9] U ye Saul kunkolo tigɛ ka a ka kɛlɛkɛ minanw bɔ a la ka taa o kibaru duman lase Filisiti jamana yɔrɔ bɛɛ la, ani u ka bato fɛnw ka sow kɔnɔ.
[10] U ye Saul ka kɛlɛkɛ minanw bila Astarte boli bato so kɔnɔ ka Saul su gengen kogo la Bɛt-Sean.
[11] Filisitikaw ye min kɛ Saul la, Jabɛs Galadkaw ye o mɛn minkɛ,
[12] u la kɛlɛkɛ cɛ ja gɛlɛnw wulila ka su bɛɛ kɛ taama la. U ye Saul ni a denkɛw suw lajigin ka bɔ Bɛt-Sean kogo la ka segin ka taa Jabɛs ka u jeni yen.
[13] O kɔ, u ye u kolow cɛ ka olu don ntamaro sun kɔrɔ Jabɛs kɛrɛ fɛ, o kɔ, ka sun don tile wolonwula kɔnɔ.