[1] Samuɛl ka kuma sera Israɛl bɔnsɔn bɛɛ ma. Israɛl bɔnsɔn taara Filisitikaw kunbɛn ka u kɛlɛ. U taara u ka daga sigi Ebɛn-Ezɛr k'a sɔrɔ Filisitikaw ka daga tun bɛ Afɛk.
[2] Filisitikaw ye kɛlɛ labɛn Israɛl bɔnsɔn kama. U ye kɛlɛ daminɛ. Filisitikaw ye se sɔrɔ Israɛl bɔnsɔn kan ka u ka daga la kɛlɛkɛ cɛ waa naaniɲɔgɔn faga.
[3] Jama seginna daga la tuma min na, Israɛl bɔnsɔn cɛkɔrɔbaw y'a fɔ ko: «Mun y'a to Matigi ye an don Filisitikaw bolo ka an gosi bi? An ka taa Silo ka Matigi ka layidu wagande ta walisa a ka kɛ an cɛma ani a k'an tila ka bɔ an juguw bolo.
[4] O tuma la jama ye cidenw bila ka taa Silo ka na ni Kɛlɛbolow Matigi ka layidu wagande ye, Matigi sigilen bɛ serubɛn fila furancɛ la.» Eli denkɛ fila, Hofini ni Fineɛs, taara Ala ka layidu wagande fɛ.
[5] Matigi ka layidu wagande sera daga la tuma min na, Israɛl bɔnsɔn bɛɛ ye pɛrɛnkanba bɔ niɲagali ye fo ka dugukolo yɛrɛyɛrɛ.
[6] Filisitikaw ye o pɛrɛnkan mɛn minkɛ, u ye ɲininkali kɛ ko: «O pɛrɛnkan ni o ɲagalikanba kun ye mun ye Israɛl bɔnsɔn ka daga la?» O tuma la u y'a mɛn ko Matigi ka layidu wagande sera Israɛl bɔnsɔn ka daga la.
[7] O ye u lasiran katuguni u ko: «Ala nana Israɛl bɔnsɔn ka daga la. O ɲɔgɔn ma kɛ fɔlɔ.
[8] Bɔnɛ bɛ an ye. Jɔn na an tila ka bɔ o bato fɛn barikamaw bolo? Nin bato fɛnw de ye Misirakaw ɲɛgwan ni tɔɔrɔ sifa bɛɛ ye kungokolon kɔnɔ.
[9] Filisitikaw, a' ye aw ja gɛlɛya. Aw ka kɛ cɛw ye walisa aw kana kɛ Hɛburuw ka jɔnw ye, i ko u tun ye aw ka jɔnw ye cogo min na. Aw ka kɛ cɛw ye ka kɛlɛ kɛ.»
[10] O tuma la Filisitikaw ye kɛlɛ kɛ, u ye se sɔrɔ Israɛl bɔnsɔn kan. Olu bɛɛ bolila ka taa u ka finisow kɔnɔ. O kɛra tiɲɛnniba ye. Cɛ waa bisaba fagara Israɛl bɔnsɔn na.
[11] Ala ka wagande minɛna, Eli denkɛ fila, Hofini ni Fineɛs fana fagara.
[12] Benjamɛn bɔnsɔn cɛ dɔ bolila ka bɔ daga la ka taa Silo o don kelen na. A ka finiw faralen tun don, buguri tun bɛ a kun na.
[13] O cɛ sera yen tuma min na, a y'a sɔrɔ Eli sigilen tun bɛ a ka sigilan kan sira da la ka o kow kibaru makɔnɔ, k'a masɔrɔ a dusukun tun bɛ yɛrɛyɛrɛ Ala ka wagande ko la. O cɛ donna dugu kɔnɔ ka o kibaru fɔ dugu yɔrɔw bɛɛ la. Dugu mɔgɔw bɛɛ ye pɛrɛnkanba bɔ.
[14] Eli ye o mankan mɛn minkɛ, a ye ɲininkali kɛ o ko la ko: «O mankan kun ye mun ye?» O yɔrɔ nin bɛɛ, o cɛ sera Eli yɔrɔ ka o kibaru fɔ a ye.
[15] O y'a sɔrɔ Eli si tun bɛ san bikɔnɔntɔn ni segin bɔ, a ɲɛ fiyennen tun don, a tun tɛ yeli kɛ.
[16] O cɛ y'a fɔ Eli ye ko: «Ne nana ka bɔ kɛlɛ daga la, ne kisira ka bɔ yen bi.» Eli y'a ɲininka ko: «Mun kɛra, ne denkɛ?»
[17] O cɛ y'a jaabi ko: «Israɛl bɔnsɔn bolila Filisitikaw ɲɛ, mɔgɔ caman yɛrɛ fagara. Ka fara o kan, i denkɛ fila, Hofini ni Fineɛs fagara, Ala ka layidu wagande fana minɛna.»
[18] Eli ye Ala ka wagande minɛli ko mɛn minkɛ, a bɔra a ka sigilan kan ka bi a kɔ kan dugu donda la k'a kan kari. A sara k'a masɔrɔ a tun kɔrɔla, a tun ka bon. Ale kɛra Israɛl bɔnsɔn ka kiritigɛla ye san binaani kɔnɔ.
[19] Eli biranmuso, Fineɛs muso kɔnɔma tun don. A jigin tuma tun sera. O ye Ala ka wagande minɛli ko kibaru mɛn minkɛ ka a birankɛ Eli ni a cɛ saya ko mɛn, tin y'a minɛ o yɔrɔ nin bɛɛ. A y'i biri ka jigin.
[20] K'a to nimakaran la, tinminɛmusow y'a fɔ a ye ko: «I kana siran, i ye denkɛ bange.» Nka o muso ma se ka jaabili si kɛ wala ka u ka kuma lamɛn.
[21] Fineɛs muso y'a den tɔgɔ da ko I-Kabɔd. A ko: «Katuguni nɔɔrɔ tɛ Israɛl la tun.» A kan tun bɛ Ala ka wagande minɛli ko ni a birankɛ ni a cɛ saya ko ma.
[22] A ko: «Nɔɔrɔ si tɛ Israɛl la tun, sabu Ala ka wagande minɛna u la.»