[1] Filisitikaw ye u ka kɛlɛbolow bɛɛ lajɛ Afɛk k'a sɔrɔ Israɛl bɔnsɔn ka kɛlɛbolow tun y'u ka daga sigi Jizreɛl ji boyi da la.
[2] Filisitikaw ka kuntigiw ye u ka kɛlɛkɛ cɛw kɛmɛ-kɛmɛ ni waa kelen-kelenɲɛ minɛ. Dawuda ni a fɛ cɛw ani Akis tugura kɛlɛbolow kɔ.
[3] O tuma la Filisitikaw ka kuntigiw ko: «Hɛburuw bɛ mun kɛ yan?» Akis ye u jaabi ko: «Israɛl bɔnsɔn ka masakɛ Saul ka baaraden Dawuda don. A sigilen bɛ ne fɛ yan kabini waati jan, a ka ca ni san kelen yɛrɛ ye. Ne ma jalaki yɔrɔ si ye a la kabini a sigira ne fɛ yan fo ka na se bi ma.»
[4] Filisitikaw ka kuntigiw diminna masakɛ Akis kɔrɔ k'a fɔ a ye ko: «I ka o cɛ bila ka kɔsegin. I ye sigi yɔrɔ min di a ma, a ka segin ka taa yen. A kana taa an fɛ kɛlɛ la, an bɛ siran ko a kana yɛlɛma an kama kɛlɛ waati la. A na se ka hɛrɛ sɔrɔ a kuntigi fɛ cogo di ni a ma taa ni an ka mɔgɔ dɔw kunkolow ye?
[5] U tun bɛ dɔn kɛ kaɲɔgɔn da laminɛ dɔnkiliw la min ko la ko: ‹Saul ye mɔgɔ waa caman faga, Dawuda ye mɔgɔ waa tan caman faga,› o Dawuda tɛ nin ye wa?»
[6] O tuma la masakɛ Akis ye Dawuda wele k'a fɔ a ye ko: «Matigi ɲɛnama tɔgɔ kosɔn, i ye mɔgɔ tilennen ye. A ka di ne ye i ka taa ka segin kɛ ne fɛ kɛlɛ daga la, sabu ne ma tilenbaliya ko si ye i la kabini i nana ne fɛ yan fo ka na se bi ma. Nka i ko man di kuntigiw ye.
[7] Ayiwa sisan i ka segin ka taa hɛrɛ la walisa i kana na Filisitikaw ka kuntigiw dusuw tiɲɛn.»
[8] Dawuda y'a fɔ Akis ye ko: «Ne ye mun kɛ, i ye mun ko jugu ye i ka baaraden na kabini ne sera i fɛ yan fo ka na se bi ma, fo ne tɛ se ka taa kɛlɛ la ka ne ka masakɛ juguw kɛlɛ?»
[9] Akis y'a fɔ Dawuda ye ko: «Ne y'a dɔn, i ko ka di ne ye i ko Ala ka mɛlɛkɛ dɔ, nka Filisitikaw ka kuntigiw ko i tɛ se ka taa an fɛ kɛlɛ la.
[10] Ayiwa i ka soli ka wuli, i ni i ka baaraden minw nana i fɛ. Ɔwɔ, a' ye wuli joona ka taa sani dugu ka jɛ.»
[11] O tuma la Dawuda ni a fɛ cɛw solila ka wuli ka taa sɔgɔma da fɛ. U kɔseginna ka taa Filisitikaw ka jamana la. Filisitikaw taara Jizreɛl.