[1] Zifkaw taara Saul sɛgɛrɛ Gibea ko kura k'a fɔ a ye ko: «Dawuda dogolen bɛ Hakila tintin kan kungokolon fan fɛ.»
[2] O tuma la Saul wulila ka taa ni Israɛl bɔnsɔn kɛlɛkɛ cɛ waa saba ye Zif kungokolon kɔnɔ ka taa Dawuda ɲini.
[3] Saul ye a ka daga sigi Hakila tintin kan sira da la k'a ɲɛ sin kungokolon ma. Dawuda tora kungokolon kɔnɔ. A y'a dɔn ko Saul sera minkɛ,
[4] a ye kolajɛbaa dɔw bila ka taa Saul filɛ ani a sera yɔrɔ min na.
[5] O tuma la Dawuda taara ka se Saul ka daga ma. A ye Saul ni a ka kɛlɛ kuntigi Ner denkɛ Abinɛr dayɔrɔ ye. Saul dalen tun bɛ daga cɛmancɛ la, a ka kɛlɛkɛ cɛw dalen tun bɛ ka a lamini.
[6] Dawuda y'a fɔ Hɛti bɔnsɔn Akimelɛk ani Zeruja denkɛ Joab balimakɛ Abisayi ye ko: «Jɔn b'a fɛ ka taa ne fɛ Saul yɔrɔ la a ka daga la?» Abisayi ko: «Ne bɛ taa i fɛ.»
[7] O tuma la Dawuda ni Abisayi y'u labɛn ka taa Saul ka kɛlɛbolow cɛma su fɛ. U y'a sɔrɔ Saul sunɔgɔlen tun bɛ kɛlɛdenw cɛmancɛ la. A ka tama turulen tun bɛ a kun kɔrɔ duguma. Abinɛr ni kɛlɛdenw bɛɛ sunɔgɔlen tun don a lamini na.
[8] Abisayi y'a fɔ Dawuda ye ko: «Ala ye i jugu don i bolo bi. Ne bɛ i deli, i k'a to ne k'a sɔgɔ ni tama ye fo ka dugu sɔgɔ siɲɛ kelen, ne t'a kɛ siɲɛ fila.»
[9] Nka Dawuda y'a fɔ Abisayi ye ko: «I kana a faga. Jɔn bɛ se k'a bolo se Matigi ka munlen ma ni o tigi ma jalaki?»
[10] A ko fana: «Matigi ɲɛnama don. Matigi kelenpe na a gosi. A na sa a yɛrɛma wala a na sa kɛlɛ yɔrɔ la.
[11] Ka ne bolo mɔɔnɔbɔ Matigi ka munlen kama, Matigi ka ne kisi o ma. Nka o tama min turulen bɛ a kun kɔrɔ, ani ji ta minan, i ka olu ta, an ka taa.»
[12] Ayiwa Dawuda ye Saul kunkɔrɔ tama ni a ka ji ta minan ta ka taa ni olu ye. Mɔgɔ si ma u ye, mɔgɔ ma u kɔlɔsi, k'a masɔrɔ mɔgɔ si ma kunun, katuguni Matigi tun ye sunɔgɔba bila u bɛɛ la.
[13] O kɔ, Dawuda taara fan dɔ fɛ k'i mabɔ u la k'i jɔ kulu kan yɔrɔ jan.
[14] Dawuda pɛrɛnna k'a fɔ mɔgɔw ni Ner denkɛ Abinɛr ye ko: «I tɛ ne jaabi wa, Abinɛr?» Abinɛr y'a jaabi ko: «E min bɛ masakɛ sɛgɛn ni i pɛrɛnkan ye, e ye jɔn ye?»
[15] Dawuda y'a fɔ Abinɛr ye ko: «E tɛ cɛ barikama ye min ɲɔgɔn tɛ Israɛl bɔnsɔn cɛma wa? Mun y'a to i ma masakɛ, i matigi kɔlɔsi? Mɔgɔ dɔ donna yen ko a bɛ i matigi, masakɛ faga.
[16] I bɛ min kɛ tan, o manɲi. Matigi ɲɛnama tɔgɔ kosɔn, aw ka kan ka faga, sabu aw ma aw matigi, Ala ka munlen kɔlɔsi. I ka filɛli kɛ sisan, masakɛ ka tama ni a ka ji daga min tun bɛ a kun kɔrɔ, olu bɛ min?»
[17] Saul ye Dawuda kan dɔn k'a fɔ ko: «Ne denkɛ Dawuda, yala e kan don wa?» Dawuda ko: «Ne kan don, ne matigi, masakɛ.»
[18] A ko fana: «Mun y'a to ne matigi bɛ tugu a ka baaraden nɔ fɛ? Ne ye mun kɛ? Ne ka ko jugu kɛlen ye mun ye?
[19] Ne matigi masakɛ k'a tulo majɔ a ka baaraden ka kumaw la. Ni Matigi ye i bila ne nɔgɛnni la, a ka sɔn saraka la, nka ni mɔgɔw ye i bila ne la, u dangalen bɛ Matigi ɲɛ kɔrɔ sabu u bɛ ne gɛn ka mabɔ Matigi la ko ne ka taa jamana wɛrɛ ka bato fɛnw bato.
[20] Ayiwa, ne joli bɔn yɔrɔ kana janya Matigi la, k'a masɔrɔ Israɛl bɔnsɔn ka masakɛ bɔra ka ne ɲini i ko nkaranka, i ko mɔgɔ bɛ wɔlɔ ɲini kuluw kan cogo min na.»
[21] O tuma la Saul ko: «Ne ye jurumu kɛ, ne denkɛ Dawuda. I ka na, ne tɛna ko jugu si kɛ i la tun, sabu i ye ne ni jate fɛn ye bi. Ɔwɔ, ne ye hakilintanya ko kɛ, ne ye fililiba kɛ.»
[22] Dawuda y'a jaabi ko: «Masakɛ ka tama filɛ. I fɛ kamalen dɔ ka na a minɛ.
[23] Matigi bɛ mɔgɔw bɛɛ kelen-kelen sara ka kɛɲɛ ni u ka tilennenya ni u ka kantigiya ye, sabu Matigi tun y'i don ne bolo bi nka ne ma sɔn ka ne bolo se Matigi ka munlen ma.
[24] Ka fara o kan, ne ye i ni jate fɛnba ye bi, Matigi fana ka ne ni jate fɛnba ye. A na ne tila ka bɔ ne bɔnɛ kow bɛɛ la.»
[25] Saul y'a fɔ Dawuda ye ko: «Ne denkɛ Dawuda, Ala ka to i fɛ. Siga t'a la, i na kobaw kɛ ka se sɔrɔ.» Dawuda ye sira minɛ ka taa. Saul kɔseginna ka taa a ka so.