[1] A nana fɔ Dawuda ye ko: «A filɛ, Filisitikaw nana bi Keila kan ka u ka gendekɛnɛ la suman bɛɛ cɛ.»
[2] Dawuda ye Matigi ɲininka ko: «Ne ka taa Filisitikaw kɛlɛ wa? Ne na se sɔrɔ Filisitikaw kan wa?» Matigi ye Dawuda jaabi ko: «I ka taa, i na se sɔrɔ Filisitikaw kan ka Keila tila ka bɔ u bolo.»
[3] Nka Dawuda fɛ cɛw y'a fɔ a ye ko: «An bɛ siran Juda jamana la yan, janko ni an taara Filisitikaw kama Keila.»
[4] Dawuda ye Matigi ɲininka ko kura. Matigi y'a jaabi ko: «Wuli ka jigin ka taa Keila. Ne na Filisitikaw don i bolo.»
[5] O tuma la Dawuda ni a fɛ cɛw taara Keila ka Filisitikaw kɛlɛ ka u tiɲɛn kosɛbɛ ka u ka baganw caman cɛ ka Keilakaw tila ka bɔ u bolo.
[6] Akimelɛk denkɛ Abiatar taara i dogo Dawuda fɛ Keila tuma min na, a taara ni efɔd ye a bolo.
[7] A fɔra Saul ye ko Dawuda taara Keila. Saul ko: «Ala na Dawuda don ne bolo, k'a masɔrɔ a taara don dugu min kɔnɔ, lamini kogo ni sogolan bɛ o dugu la.»
[8] O tuma la Saul ye a ka kɛlɛbolow bɛɛ wele ko a bɛ jigin ka taa Keila, ka daga Dawuda ni a fɛ cɛw da la.
[9] Nka Dawuda y'a dɔn ko Saul b'a fɛ ka a minɛ, a y'a fɔ sarakalasebaa Abiatar ye ko: «I ka efɔd don i la ka na.»
[10] O kɔ, Dawuda ko: «Matigi, Israɛl ka Ala, i ka baaraden y'a dɔn ko Saul bɛ na Keila kama ka nin dugu halaki ne kosɔn.
[11] Keilakaw na ne don a bolo wa? Saul na jigin ka na i ko i ka baaraden y'a mɛn cogo min na wa? Matigi, Israɛl ka Ala, ne b'i deli, i ka i ka jɔn jaabi.» Matigi ko: «Saul bɛ jigin ka na.»
[12] Dawuda y'a ɲininka tun ko: «Keilakaw na ne ni ne fɛ cɛw don Saul bolo wa?» Matigi ko: «U na aw don Saul bolo.»
[13] O tuma la Dawuda ni a fɛ cɛw wulila ka bɔ Keila ka taa yɔrɔ wɛrɛ la. U tun ye cɛ kɛmɛ wɔɔrɔɲɔgɔn ye. Saul y'a mɛn ko Dawuda bolila ka bɔ Keila ka taa kungo kɔnɔ minkɛ, Saul ka taali ma bɔ.
[14] Dawuda tora a dogo yɔrɔw la Zif kungo kɔnɔ kulu yɔrɔw la yen. Saul tora ka Dawuda ɲini don o don, nka Ala ma Dawuda don a bolo.
[15] Dawuda y'a ye ko Saul bɛ yaala kungo kɔnɔ walisa ka ale sɔrɔ k'a faga minkɛ, a tora Zif kungokolon kɔnɔ.
[16] O tuma la Saul denkɛ Jonatan wulila ka taa Dawuda nɔ fɛ tu kɔnɔ ka a ja gɛlɛya Ala la.
[17] A y'a fɔ Dawuda ye ko: «I kana siran, k'a masɔrɔ ne fa Saul bolo tɛna se i ma. I na Israɛl bɔnsɔn mara, ne na kɛ i dankan ye. Ne fa Saul y'o dɔn k'a jɛya.»
[18] U fila bɛɛ ye layidu ta Ala ɲɛ kɔrɔ yen. O kɔ, Dawuda tora kungo kɔnɔ yen, Jonatan seginna a ka so.
[19] O tuma la Zifkaw taara Saul sɛgɛrɛ Gibea k'a fɔ a ye ko: «Dawuda dogolen bɛ an cɛma kungo kɔnɔ worodugu yanfan fɛ Hakila tintin kan.
[20] Ayiwa masakɛ, i ka jigin, an ka taa, k'a masɔrɔ o ye i sago ye. An na a ɲini ka a don masakɛ bolo.»
[21] Saul ko: «Matigi ka duba aw ye, aw minw hinɛna ne la.
[22] Aw ka taa a yɔrɔ ɲini ko ɲuman ani mɔgɔ min y'a ye yen, ka o dɔn, katuguni a fɔra ne ye ko a ka kegun kojugu.
[23] Ayiwa a' ye a dogo yɔrɔw bɛɛ filɛ ka u dɔn, o kɔ, aw ka segin ka na o kibaru jɛlen fɔ ne ye. O tuma la ne na taa aw fɛ. Ni a bɛ jamana kɔnɔ, ne na a ɲini Juda bɔnsɔn cɛma k'a ye.»
[24] O tuma la u wulila ka taa Saul ɲɛ Zif, k'a sɔrɔ Dawuda ni a fɛ cɛw bɛ Maon kungo kɔnɔ jɛkɛnɛ la kungokolonba worodugu yanfan fɛ.
[25] Saul ni a nɔfɛ cɛw taara Dawuda ɲini. O fɔra Dawuda ye minkɛ, a jiginna ka bɔ farakurun kan ka taa Maon kungokolon kɔnɔ. Saul y'o mɛn minkɛ, a tugura Dawuda nɔ fɛ Maon kungokolon kɔnɔ.
[26] Saul tun bɛ taama la kulu fan kelen fɛ, k'a sɔrɔ Dawuda ni a fɛ cɛw tun bɛ kulu fan dɔ fɛ. Dawuda tɛliyara ka boli walisa k'a yɛrɛ tila Saul la, nka Saul ni a fɛ cɛw tun ye Dawuda ni a fɛ cɛw lamini walisa ka u minɛ.
[27] Nka ciden dɔ nana a fɔ Saul ye ko: «I tɛliya ka na, k'a masɔrɔ Filisitikaw bira jamana kan.»
[28] O tuma la Saul bɔra Dawuda nɔ fɛ ka taa Filisitikaw kunbɛn. O de kosɔn o yɔrɔ tɔgɔ ko Tilali Farakurun.