[1] Ayiwa Samuɛl y'a fɔ Israɛl bɔnsɔn jama bɛɛ ye ko: «Aw ye ko minw fɔ ne ye, ne ye aw kan minɛ o bɛɛ la. Ne ye masakɛ sigi aw kun na.
[2] Ayiwa a filɛ, o masakɛ na aw ɲɛ minɛ. Ne yɛrɛ ta fan fɛ, ne kɔrɔla, ne kunsigi jɛra. Ne denkɛw fana bɛ aw bolo. Ne kɛra aw ɲɛminɛbaa ye kabini ne denmisɛnma fo ka na se bi ma.
[3] Ne bɛ ne bolo kɔrɔta aw bɛɛ ɲɛ na, Matigi ni masakɛ ɲɛ kɔrɔ bi. Ni ne ye ko dɔ kɛ aw dɔw la, aw ka kuma ka o fɔ. Ne ye misi wala fali minɛ jɔn ni jɔn bolo? Ne ye jɔn tɔɔrɔ, ne fariyara jɔn ma? Ne ye surɔ fɛn minɛ jɔn bolo ka neɲɛ tugu ka ko ɲuman kɛ o ye? Ni o kɛra, ne na olu kɔsegin aw ma.»
[4] U y'a jaabi ko: «I ma an tɔɔrɔ, i ma fariya an ma, i ma fɛn minɛ mɔgɔ si bolo.»
[5] A ko fana: «Matigi ye aw seere ye, masakɛ fana ye seere ye bi ko aw ma foyi ye ne bolo.» U y'a jaabi ko: «U ka kɛ an seerew ye.»
[6] Samuɛl y'a fɔ mɔgɔw bɛɛ ye ko: «Matigi ye Musa ni a kɔrɔkɛ Aron sigi ka aw bɛnbaw labɔ Misira jamana la.
[7] Ayiwa sisan, a' ye na aw yɛrɛw jira Matigi ɲɛ kɔrɔ. Matigi ye ko ɲuman minw kɛ aw ni aw bɛnbaw ye, ne na kiri tigɛ aw kan o kow bɛɛ kosɔn Matigi ɲɛ kɔrɔ.
[8] Kabini Yakuba donna Misira jamana kɔnɔ, aw bɛnbaw kasira Matigi nɔ fɛ, Matigi ye Musa ni Aron ci ka taa aw bɛnbaw tila ka bɔ Misira jamana la ka u sigi nin jamana kɔnɔ.
[9] Nka u ɲinɛna Matigi, u ka Ala kɔ. A ye u feere Hazɔr kɛlɛbolo kuntigi Sisera ni Filisitikaw ani Moab bɔnsɔn ka masakɛ ma, olu minw ye u kɛlɛ.
[10] O tuma la u kasira Matigi nɔ fɛ ko: ‹An ye jurumu kɛ, k'a masɔrɔ an murutira Matigi ma ka baara kɛ Baalw ni Astarte boliw ye. Nka i ka an tila ka bɔ an juguw bolo sisan, an na baara kɛ i ye.›
[11] Matigi ye Jerubal ni Bedan ni Jefite ani ne, Samuɛl, ci ka aw tila ka aw bɔ aw lamini juguw bolo walisa aw ka se ka sigi hɛrɛ la.
[12] Nka aw y'a ye ko Amɔn bɔnsɔn ka masakɛ Nakas nana aw kama ka aw kɛlɛ tuma min na, aw ko, masakɛ ka sigi aw kun na k'a sɔrɔ Matigi, aw ka Ala tun ye aw ka masakɛ ye.
[13] Ayiwa sisan, aw ye masakɛ min ɲɛnatɔmɔ k'a deli Matigi fɛ, o filɛ nin ye. Matigi ye masakɛ sigi aw kun na.
[14] Ni aw bɛ sɔn ka siran Matigi ɲɛ ka baara kɛ a ye ka a kan minɛ, ni aw ma muruti a ka kuma ma, o tuma la aw ni aw ka masakɛ min sigilen bɛ aw kun na, aw na tugu Matigi, aw ka Ala nɔ fɛ.
[15] Nka ni aw ma Matigi kan minɛ, ni aw jɛngɛna ka mabɔ a ka ci fɔlen la, Matigi bolo na aw kɛlɛ i ko a ye aw bɛnbaw kɛlɛ cogo min na.
[16] Aw ka to yan nin waati yɛrɛ la ka Matigi ka nin koba kɛtɔ ye aw ɲɛw la.
[17] Ayiwa sisan nin waati tɛ alikama kan tuma ye wa? Ne na Matigi deli, a na sanpɛrɛn ni sanji bɔ. O de kosɔn aw n'a ye k'a dɔn ko aw ye masakɛ ɲini, ko o ye ko juguba ye Matigi ɲɛ kɔrɔ.»
[18] O tuma la Samuɛl ye Matigi deli, Matigi ye sanpɛrɛn kɛ ka sanji lana o don na. Mɔgɔw bɛɛ siranna Matigi ni Samuɛl ɲɛ kosɛbɛ.
[19] U bɛɛ y'a fɔ Samuɛl ye ko: «I ka Matigi, i ka Ala deli i ka jɔnw ye walisa an kana sa, k'a masɔrɔ an ye masakɛ ɲini ka dɔ fara an ka jurumuw kan.»
[20] Samuɛl ye mɔgɔw jaabi ko: «Aw kana siran. Ɔwɔ, aw ye ko jugu kɛ, o bɛɛ n'a ta aw kana muruti Matigi ma, nka aw ka baara kɛ a ye ni aw dusukun bɛɛ ye.
[21] Aw kana fara a la, n'o kɛra aw na tugu boliw nɔ fɛ, olu minw tɛ foyi ye, u tɛ se ka aw dɛmɛ, u tɛ se ka aw tila katuguni boliw tɛ foyi ye.
[22] Matigi tɔgɔba kosɔn, a tɛna a ka mɔgɔw bila, o cogo la Matigi y'a latigɛ ka aw kɛ a ka mɔgɔw ye.
[23] Ka Ala delili dabila aw ye, o ye Matigi hakɛ tali ye. Ala ma ne kisira o ma. Ne na aw kalan ko ɲuman ni sira tilennen na.
[24] Nka aw ka siran Matigi ɲɛ ka baara kɛ a ye ni kantigiya ye ni aw dusukun bɛɛ ye. A ye ko ɲumanba minw kɛ aw cɛma, aw ka miiri o la.
[25] Nka ni aw ye ko jugu kɛ, aw ni aw ka masakɛ bɛɛ na halaki.»