[1] Dawuda taara Nob sarakalasebaa Akimelɛk yɔrɔ. Akimelɛk yɛrɛyɛrɛtɔ ye Dawuda kunbɛn k'a fɔ a ye ko: «I kelen nana ka bɔ min, fo mɔgɔ ma na i fɛ?»
[2] Dawuda ye sarakalasebaa Akimelɛk jaabi ko: «Masakɛ ye ci di ne ma k'a fɔ ne ye ko a ye ci min di ne ma ka ne bila ko min na, mɔgɔ si kana o dɔn. Ne ye yɔrɔ dɔ fɔ ne ka mɔgɔw ye ko u ka ne kunbɛn yen.
[3] Ayiwa sisan, mun bɛ i bolo? I ka buurukun duuru di ne ma wala i bɛ se ka min sɔrɔ.»
[4] Sarakalasebaa y'a jaabi ko: «Buuru gwansan tɛ ne bolo yan fɔ Ala ka buuru senuma, nka ne bɛ se ka o di i ma ni i fɛ mɔgɔ si ni muso ma jɛ.»
[5] Dawuda y'a jaabi ko: «Kabini ne bɔra, bi ye o tile saba ye, ne taamaɲɔgɔnw fana jɛlen don. Ko si ma tɛmɛn an ni muso si cɛ. Ni ko nɔgɔlen don, siga t'a la, o na saniya bi a kɛbaa fɛ.»
[6] O tuma la sarakalasebaa ye o buuru senuma di Dawuda ma, k'a masɔrɔ buuru wɛrɛ tun tɛ yen o buuru senuma kɔ, o min bɔra Matigi ɲɛ kɔrɔ, ka buuru kura bila o nɔ na.
[7] O don yɛrɛ la Saul ka baaraden dɔ tun bɛ yen, o tun taara ci dɔ la Matigi ɲɛ kɔrɔ. O tɔgɔ ko Doɛg, Edɔmka don, Saul ka saga gɛnnaw kuntigi tun don.
[8] Dawuda y'a fɔ Akimelɛk ye ko: «Tama dɔ wala npan dɔ tɛ i bolo yan wa? Ne ma ne ka npan wala ne ka kɛlɛkɛ minan si ta, sabu masakɛ ka ci tun ka tɛli.»
[9] Sarakalasebaa ko: «I ye Filisitika Goliati min faga Ela jɛkɛnɛ la, o ka npan filɛ nin ye. Fini melekelen bɛ a la, a bɛ efɔd kɔ fɛ. N'i b'a fɛ ka o ta, i ka o ta katuguni dɔ wɛrɛ tɛ yan.» Dawuda ko: «O npan ɲɔgɔn si tɛ. O di ne ma.»
[10] O tuma la Dawuda wulila ka boli Saul ɲɛ ka taa Gat masakɛ Akis sɛgɛrɛ.
[11] Masakɛ Akis ka baaradenw y'a fɔ Akis ye ko: «I m'a dɔn ko jamana masakɛ Dawuda bɛ yan wa? U dɔn kɛtɔ tun bɛ min jamu da dɔnkili la, i ma o dɔn wa? U ko: ‹Saul ye mɔgɔ waa caman faga, Dawuda ye mɔgɔ waa tan caman faga.›»
[12] O kuma tora Dawuda kɔnɔ. A siranna Gat masakɛ Akis ɲɛ.
[13] A y'a yɛrɛ kɛ fatɔ ye o ɲɛ na. A tun bɛ dondala konw nkaaninkaani ka daji yɔɔlɔ a bonbonsi kan.
[14] O tuma la masakɛ Akis y'a fɔ a ka baaradenw ye ko: «Aw ɲɛ b'a la ko fa bɛ nin cɛ la. Mun y'a to aw nana n'a ye ne yɔrɔ?
[15] Yala fatɔ caman tɛ ne fɛ yan wa, fo aw bɛ na ni nin cɛ ye ne yɔrɔ, a ka nin fatɔya kow kɛ ne kɔrɔ yan? Ninɲɔgɔn mɔgɔ bɛ se ka don ne ka so kɔnɔ wa?»