[1] Samuɛl y'a fɔ Saul ye ko: «Matigi de ye ne ci ka i mun ka kɛ Israɛl bɔnsɔn ka masakɛ ye. Ayiwa sisan i tulo majɔ Matigi ka kuma la.
[2] Kɛlɛbolow Matigi ko: ‹Amalɛk bɔnsɔn ye min kɛ Israɛl bɔnsɔn na, ne hakili bɛ o la. Israɛl natɔ ka bɔ Misira, Amalɛk bɔnsɔn ye u kɛlɛ.
[3] Ayiwa taa sa ka Amalɛk bɔnsɔn gosi ka u ka fɛnw bɛɛ halaki ka u ban. I kana makari u la. I ka u cɛw ni u musow ani denmisɛnw ni sinminnaw ani misiw ni sagaw niɲaamɛw ani faliw bɛɛ faga.›»
[4] Saul ye mɔgɔw wele ka u dan Telaim. U kɛra cɛ waa kɛmɛ fila ye. Juda bɔnsɔn tun ye cɛ waa tan ye.
[5] O kɔ, Saul taara ni u ye fo Amalɛk ka dugu kɔrɔ ka u dogo jɛkɛnɛ la.
[6] A tun y'a fɔ Keni siya ye ko: «Aw ka taa ka bɔ Amalɛk bɔnsɔn cɛma walisa ne kana na aw halaki u fɛ, k'a masɔrɔ aw ye ko ɲuman kɛ Israɛl bɔnsɔn bɛɛ ye u bɔ tuma la Misira jamana la.» O tuma la Keni siya bɔra Amalɛk bɔnsɔn cɛma.
[7] Saul ye Amalɛk bɔnsɔn gosi ka bɔ Havila fo ka taa se Sur. O bɛ Misira jamana kuntilenna la.
[8] A ye Amalɛk bɔnsɔn ka masakɛ Agag ɲɛnama minɛ ka u tɔw bɛɛ faga ni npan ye ka u halaki.
[9] Nka Saul ni mɔgɔw ye Agag ɲɛnama to ani saga ɲumanw ni misi ɲumanw ani bagan kunbaw ni bagan tɔlɔlenw ni sagadenw ani fɛnɲumanw bɛɛ. U tun t'a fɛ ka olu halaki. Nafa tɛ min na ani min manɲi, u ye olu dɔrɔn de halaki.
[10] O tuma la Matigi ka kuma sera Samuɛl ma ko:
[11] «Ne nimisara Saul kɛli la masakɛ ye katuguni a murutira ne ma, a ma ne ka kuma lamɛn.» Samuɛl diminna, a ye su bɛɛ kɛ ka Matigi deli.
[12] Samuɛl solila ka wuli ka taa Saul kunbɛn. A fɔra Samuɛl ye ko Saul sera Karmɛl ka samasen jɔ ka a kɛ hakilijigin fɛn ye a yɛrɛ ko la. O kɔ, a ye sira minɛ ka taa Gilgal.
[13] Samuɛl sera Saul yɔrɔ. Saul y'a fɔ a ye ko: «Matigi ka duba i ye. Ne ye Matigi ka ci kɛ k'a ban.»
[14] Samuɛl y'a ɲininka ko: «Nin saga kasikanw ani nin misi kasikan minw bɛ don ne tulo rɔ, o ye mun ye?»
[15] Saul ko: «Mɔgɔw nana n'u ye ka bɔ Amalɛk bɔnsɔn yɔrɔ la, k'a masɔrɔ mɔgɔw ye o sagaw ni misiw laɲumanw mara walisa ka olu kɛ saraka ye Matigi, i ka Ala ye. An y'a tɔw bɛɛ faga.»
[16] Samuɛl y'a fɔ Saul ye ko: «O b'a bɔ. Matigi ye min fɔ ne ye su la, ne na o fɔ i ye.» Saul ko: «A fɔ.»
[17] Samuɛl ko: «Ka i denmisɛnma to, i tun tɛ i yɛrɛ jate fɛn ye tuma min na, i ma kɛ Israɛl bɔnsɔn bɛɛ ka masakɛ ye wa? Matigi ye i mun ka kɛ Israɛl bɔnsɔn ka masakɛ ye.
[18] Matigi ye i ci ko i ka taa ka o kojugukɛlaw Amalɛk bɔnsɔn halaki ka u ban, ko i ka u faga fo ka u si tunun ka bɔ dugukolo kan.
[19] Mun na i ma Matigi ka ci fɔlen kɛ? Mun y'a to i girinna nafolo kan ka ko jugu kɛ Matigi ɲɛ kɔrɔ?»
[20] Saul y'a fɔ Samuɛl ye ko: «O bɛɛ n'a ta ne ye Matigi kan minɛ. Matigi ye ne bila ci min na, ne ye o kɛ. Ne ye Amalɛk bɔnsɔn tɔw halaki ka u ban ka na ni Amalɛk bɔnsɔn ka masakɛ Agag ye.
[21] Nka mɔgɔw ye sagaw ni misi ɲumanw ɲɛnatɔmɔ fɛn cɛlenw na walisa ka olu kɛ saraka ye Matigi, i ka Ala ye Gilgal.»
[22] Samuɛl y'a fɔ a ye ko: «Saraka jenitaw ni saraka fagataw ko ka di Matigi ye ka tɛmɛn Matigi kan minɛli kan wa? Tiɲɛ la, kan minɛli ka fisa ni saraka ye, yɛrɛ majiginlenya ka fisa ni sagajigi kɛn ye.
[23] Murutili ni filɛli kɛ jurumu, olu bɛɛ ka kan, tulo gɛlɛya ni boli batoli ni terafim, olu bɛɛ ka kan. K'a sɔrɔ i banna Matigi ka kuma fɔlen ma, Matigi fana na ban i la, i tɛna kɛ masakɛ ye tun.»
[24] Saul y'a fɔ Samuɛl ye ko: «Ne ye jurumu kɛ. Ne banna Matigi ka ci ani i ka kalan ma, katuguni ne siranna mɔgɔw ɲɛ ka u kan minɛ.
[25] Ne b'i deli sisan, i ka ne ka hakɛ yafa ne ma ka kɔsegin ne ma. Ne na biri Matigi kɔrɔ k'a bato.»
[26] Samuɛl y'a fɔ Saul ye ko: «Ne tɛna kɔsegin i ma tun, katuguni i banna Matigi ka kuma ma. Matigi fana y'i fili walisa i kana kɛ Israɛl bɔnsɔn ka masakɛ ye tun.»
[27] Samuɛl y'i kɔ don, ko a bɛ taa tuma min na, Saul ye Samuɛl ka dulɔkiba senkɔrɔlan minɛ. A farala.
[28] Samuɛl y'a fɔ a ye ko: «Matigi ye Israɛl bɔnsɔn ka masaya bɔsi i la bi ka a di i tɔɲɔgɔn dɔ ma min ka fisa ni i ye.
[29] Israɛl ka Ala nɔɔrɔma tɛna nkalon tigɛ, a tɛ nimisa fana, k'a masɔrɔ a tɛ mɔgɔ ye ko a bɛ nimisa.»
[30] Saul ko: «Ne ye jurumu kɛ. Ne bɛ i deli, i ka sɔn ne ma nin sen in na ne ka mɔgɔw ka cɛkɔrɔbaw ani Israɛl bɔnsɔnɲɛ na. I ka segin ne ma, ne na ne biri Matigi, i ka Ala ɲɛ kɔrɔ.»
[31] O tuma la Samuɛl kɔseginna Saul fɛ Gilgal. Saul y'i biri Matigi ɲɛ kɔrɔ yen.
[32] O kɔ, Samuɛl ko: «I ka na ni Amalɛk bɔnsɔn ka masakɛ Agag ye ne fɛ yan.» Agag gɛrɛla a la niɲagali ye, k'a masɔrɔ a tun bɛ miiri ko saya kunaya mabɔra a la.
[33] Samuɛl ko: «I ka npan ye musow bɔnɛ u denw la cogo min na, i ba fana na kɛ muso denntan ye musow cɛma.» O tuma la Samuɛl ye Agag tigɛtigɛ Matigi ɲɛ kɔrɔ Gilgal.
[34] O kɔ, Samuɛl taara Rama, Saul seginna ka taa so Gibea.
[35] Samuɛl ma taa Saul sɛgɛrɛ tun fo ka taa se a sa don ma, k'a masɔrɔ a ɲɛnasisilen tun don Saul ko la, sabu Matigi nimisara Saul sigili ko la ka kɛ Israɛl bɔnsɔn ka masakɛ ye.