[1] Kirjat-Jearim cɛw taara Matigi ka wagande ta ka taa n'a ye Abinadab ka so tintin kan ka a denkɛ Eleazar sigi ka kɛ Matigi ka wagande kɔlɔsibaa ye.
[2] Matigi ka wagande ye waati jan kɛ Kirjat-Jearim. A ye san mugan kɛ yen. Israɛl bɔnsɔn bɛɛ ye Matigi deli ka a tɔgɔ wele.
[3] O tuma la Samuɛl kumana Israɛl bɔnsɔn bɛɛ fɛ ko: «Ni aw seginna Matigi ma ni aw dusukun bɛɛ ye, aw ka jamana wɛrɛ bato fɛnw ni Astarte boliw bɔ aw cɛma ka nɔrɔ Matigi la ni aw dusukun bɛɛ ye ka baara kɛ a kelenpe ye, ale na aw tila ka bɔ Filisitikaw bolo.
[4] O tuma la Israɛl bɔnsɔn ye bato fɛn Baal ni Astarte boliw bɔ u cɛma ka baara kɛ Matigi kelenpe ye.»
[5] O kɔ, Samuɛl ko: «Israɛl bɔnsɔn bɛɛ kaɲɔgɔn lajɛ Mizpa, ne na Matigi deli aw ye.» U y'u lajɛ Mizpa,
[6] ka ji bɔ ka o bɔn Matigi ɲɛ kɔrɔ. U ye sun don o don na k'a fɔ ko: «An ye jurumu kɛ ka Matigi hakɛ ta.» Samuɛl ye Israɛl bɔnsɔn ka kiri tigɛ Mizpa.
[7] Filisitikaw y'a mɛn ko Israɛl bɛɛ ye ɲɔgɔn lajɛ Mizpa, u ka kuntigiw taara Israɛl bɔnsɔn kama. Israɛl bɔnsɔn ye o kibaru mɛn minkɛ, u siranna Filisitikaw ɲɛ.
[8] U y'a fɔ Samuɛl ye ko: «I kana Matigi an ka Ala tɔgɔ weleli dabila an ye walisa a ka an tila Filisitikaw la.»
[9] Samuɛl ye sagaden sinminna minɛ ka o kɛ saraka jenita ye Matigi ye. O kɔ, a ye Matigi deli Israɛl bɔnsɔn ye. Matigi y'a jaabi.
[10] Ka Samuɛl to saraka jenita laseli la, Filisitikaw y'u madon ko u bɛ Israɛl bɔnsɔn kɛlɛ, nka Matigi ye sanpɛrɛnba kɛ Filisitikaw kama o don na. A ye u ja tigɛ. Israɛl bɔnsɔn ye u tiɲɛn kosɛbɛ.
[11] Israɛl cɛw bɔra Mizpa ka Filisitikaw nɔgɛn ka u gosi fo ka taa se Bɛt-Kar kɛrɛ fɛ.
[12] O tuma la Samuɛl ye kabakurun dɔ ta ka o jɔ Mizpa ni Sen furancɛ la ka o tɔgɔ da ko Ebɛn-Ezɛr k'a fɔ ko: «Katuguni Matigi ye an dɛmɛ fo ka se yan.»
[13] Filisitikaw majiginna, u ma se ka don Israɛl bɔnsɔn ka yɔrɔ la tun. Matigi bolo digira Filisitikaw la Samuɛl si bɛɛ la.
[14] Filisitikaw tun ye Israɛl bɔnsɔn ka dugu minw minɛ, olu seginna Israɛl bɔnsɔn ma, ka bɔ Ekirɔn fo ka taa se Gat. Israɛl ye u ka dugukolo bɛɛ minɛ Filisitikaw la. Hɛrɛ donna Israɛl bɔnsɔn ni Amɔr siya cɛ.
[15] Samuɛl kɛra Israɛl bɔnsɔn ka kiritigɛla ye a si bɛɛ la.
[16] A tun bɛ taa ka segin kɛ Bɛtɛl ni Gilgal ani Mizpa cɛ san o san ka Israɛl bɔnsɔn ka kiri kow ɲɛnabɔ o duguw bɛɛ la.
[17] O kɔ, a tun bɛ kɔsegin Rama, a ka so tun bɛ yen. A tun bɛ Israɛl bɔnsɔn ka kiri kow ɲɛnabɔ yen fana. A ye saraka bɔlan jɔ Matigi ye yen.