[1] O kɔ, Samuɛl sara. Israɛl bɔnsɔn bɛɛ ye ɲɔgɔn lajɛ k'a su kasi. U y'a su don a yɛrɛ ka dugu kɔnɔ Rama. O kɔ, Dawuda wulila ka taa Paran kungokolon kɔnɔ.
[2] Cɛ dɔ tun bɛ Maon dugu kɔnɔ, a bolo fɛn dɔw tun bɛ Karmɛl dugu kɔnɔ. Fɛntigiba tun don, saga waa saba ni ba waa kelen tun b'a fɛ. A tun bɛ a ka saga si kan Karmɛl.
[3] O cɛ tɔgɔ ko Nabal, a muso tɔgɔ ko Abigail. O muso tun ye mɔgɔ sɛbɛ ye, a cɛ tun ka ɲi, nka a cɛ tun ye mɔgɔ gɛlɛn juguman ye. Kalɛb bɔnsɔn dɔ don.
[4] Dawuda y'a mɛn kungokolon kɔnɔ ko Nabal bɛ a ka saga si kanni la minkɛ,
[5] a y'a fɛ kamalen tan ci k'a fɔ olu ye ko: «Aw ka yɛlɛn ka taa Karmɛl ka taa Nabal sɛgɛrɛ ka ne ka foli fɔ a ye,
[6] k'a fɔ a ye fana ko, a ka san foli don. Hɛrɛ ka kɛ a ni a ka so ye, a bolo fɛnw ka to hɛrɛ la.
[7] Ne y'a mɛn ko a ka baaradenw bɛ saga si kanni la sisan. Ka a ka saga gɛnnaw to an kɛrɛ fɛ, an ma ko jugu si kɛ u la, u ka fɛn si ma tunun o waati si la ka u to Karmɛl kulu kan.
[8] Ko a ka a ka baaradenw ɲininka, u yɛrɛw na o fɔ a ye. O de kosɔn ne ka kamalenw ka hɛrɛ sɔrɔ a fɛ, sabu an nana ka seli donɲɛnajɛ kɛ. Ne b'a deli ko min bɛ a bolo, a ka o dɔ di a ka baaradenw ni a denkɛ Dawuda ma.»
[9] Dawuda ka cidenw sera Nabal yɔrɔ ka Dawuda ka kumaw fɔ a ye, o kɔ, u ye makɔnɔli kɛ.
[10] Nka Nabal ye Dawuda ka cidenw jaabi ko: «Dawuda ye jɔn ye? Isayi denkɛ ye jɔn ye? Baaraden caman bɛ boli ka bɔ u makɛ ka baara la sisan.
[11] Ne ye buuru ni ji ni sogo min labɛn ne ka saga si kanbaaw ye, ne ka o di mɔgɔw ma k'a sɔrɔ ne tɛ u bɔ yɔrɔ dɔn wa?»
[12] Dawuda ka cidenw kɔseginna ka sira minɛ ka taa. U selen yen, u ye o kuma bɛɛ fɔ Dawuda ye.
[13] O tuma la Dawuda y'a fɔ a fɛ cɛw ye ko: «Aw bɛɛ ka aw cɛ siri ni aw ka npan ye.» U bɛɛ y'a kɛ ten. Dawuda fana ye a ka npan siri a cɛ la. Cɛ kɛmɛ naaniɲɔgɔn tugulen tun bɛ Dawuda la. Cɛ kɛmɛ filaɲɔgɔn tora minanw kɔrɔ.
[14] Nabal ka baaraden dɔ y'a fɔ Nabal muso Abigail ye ko: «Dawuda ye ciden dɔw ci ka taa an kuntigi fo kungo kɔnɔ, nka Nabal y'u mafiɲɛya.
[15] O bɛɛ n'a ta o cɛw tun ka ɲi an ma. An ma tɔɔrɔ si sɔrɔ, an ka fɛn si ma tiɲɛn ka an to u kɛrɛ fɛ kungo kɔnɔ.
[16] U kɛra an lamini kogo ye su fara tile kan ka an to saga gɛn na u kɛrɛ fɛ.
[17] Ayiwa i ka i miiri sisan, min ka ɲi, i ka o kɛ sabu ko jugu latigɛra an makɛ ni a ka so kama. Nabal ka jugu, mɔgɔ si tɛ se ka fɛn fɔ a ye.»
[18] O tuma la Abigail y'i tɛliya ka buurukun kɛmɛ fila ani diwɛn foroko fila ni saga sogo labɛnnen duuru ni sumankisɛ jirannen mureɲɛ duuru ani rezɛn tusuu jalen kɛmɛ ani toro mɔlen den kɛmɛ fila ta ka u da faliw la
[19] k'a fɔ a ka baaradenw ye ko: «A' ye taa neɲɛ, ne bɛ aw kɔ.» Nka a ma foyi fɔ a cɛ Nabal ye.
[20] Ka Abigail to fali kan ka taa kulu sira fɛ, Dawuda ni a nɔfɛ cɛw fana jigintɔ tun don a fan fɛ, u bɛnna.
[21] O y'a sɔrɔ Dawuda tun y'a fɔ ko: «An ye o cɛ ka fɛnw kɔlɔsi kungo kɔnɔ kosɛbɛ, fɛn si ma tunun u la, o bɛɛ kɛra fuu. A ye ne ka ko ɲuman sara ni ko jugu ye.
[22] Ala ka Dawuda juguw sara ni tɔɔrɔ bɛɛ la juguman ye. Sani sini cɛ, ne tɛna den cɛma siɲɛnama to Nabal ka so mɔgɔw la.»
[23] Abigail ni Dawuda bɛnna tuma min na, Abigail y'i tɛliya ka jigin ka bɔ a ka fali kan ka i bi duguma ka a ɲɛ biri duguma Dawudaɲɛ kɔrɔ.
[24] A y'i bi a sen kɔrɔ k'a bonya. A ko: «Ne matigi, ne nɔ don. A to i ka jɔnmuso ka kuma i ɲɛ kɔrɔ, i ka i tulo majɔ i ka jɔnmuso ka kuma la.
[25] I kana o cɛ Nabal ka juguya jate, k'a masɔrɔ o tɔgɔ bɛnna a ma, o kɔrɔ ko nalonma. Nka ne, i ka jɔnmuso, ne ma i ka cidenw ye.
[26] Nka sisan, Matigi ɲɛnama kosɔn ka i ɲɛnama to, Matigi y'i bali walisa i kana joli bɔn ka i mɔnɛ bɔ ni i yɛrɛ bolo ye. I juguw ani minw b'a fɛ ka ko jugu kɛ i la, olu bɛɛ ka kɛ i ko Nabal.
[27] Sisan i ka jɔnmuso nana ni bonyali fɛn minw ye ka di i ma, olu filɛ, walisa i ka olu minɛ ka u di i fɛ cɛw ma.
[28] Ne b'i deli i ka yafa i ka jɔnmuso ma, siga t'a la Matigi na so jɔ i ka gwa ye badaa, sabu i bɛ kɛlɛ kɛ Matigi ye. Ko jugu si tɛna i sɔrɔ i si kɔnɔ.
[29] Ni mɔgɔ dɔ wulila ka tugu i nɔ fɛ ko a bɛ i faga, Matigi, i ka Ala na i ni mara i ko mɔgɔ bɛ fɛn sɔngɔ gɛlɛn mara cogo min na. Nka Ala na i juguw niw fili i ko mɔgɔ bɛ kabakurun kerun ntanfura la cogo min na.
[30] Ni Matigi ye a ka layidu dafa ka i ka fɛnɲumanw di i ma tuma min na, ni i sigira ka kɛ Israɛl bɔnsɔn kuntigi ye,
[31] i tɛnaɲɛnasisi ka dusu kasi ko i ye i yɛrɛ mɔnɛ bɔ ka joli bɔn. Ni Matigi ye ko ɲuman kɛ i ye, i ka i hakili to i ka jɔnmuso la.»
[32] Dawuda ye Abigail jaabi ko: «Matigi, Israɛl ka Ala ka tanu, o min ye i ci ka na ne kunbɛn bi.
[33] Ne bɛ Ala tanu i ka hakilitigiya kosɔn, e min ye ne bali ne kana joli bɔn bi ka ne yɛrɛ mɔnɛ bɔ ni ne bolo ye.
[34] Matigi, Israɛl ka Ala ɲɛnama tɔgɔ kosɔn, o min ye ne bali, ne kana ko jugu kɛ i la, ni i tun ma na ne kunbɛn, siga t'a la hali den cɛma kelen tun tɛna to Nabal ka so kɔnɔ sani dugu ka jɛ.»
[35] O muso nana fɛn minw di Dawuda ma, a ye olu bɛɛ minɛ k'a fɔ a ye ko: «I ka taa so hɛrɛ la. A filɛ, ne ye i kan minɛ, ne na ko ɲuman kɛ i ye.»
[36] Abigail kɔseginna ka na Nabal yɔrɔ la tuma min na, u ye ɲɛnajɛba kɛ ka dumuniba labɛn a ka so kɔnɔ, i n'a fɔ masakɛ ka dumuni. Nabal nisɔndiyalenba tun don, a falen tun bɛ dɔlɔ la, o de kosɔn Abigail ma ko sɛbɛ si fɔ a ye fo ka taa dugu jɛ.
[37] Nka sɔgɔma da fɛ, dɔlɔ ye Nabal bila tuma min na, a muso ye o kow bɛɛ ɲɛ fɔ a ye minkɛ, denkuru y'a minɛ, a kɛra i ko kabakurun.
[38] Tile tanɲɔgɔn tɛmɛnnen kɔ, Matigi ye Nabal gosi, a sara.
[39] Dawuda y'a mɛn ko Nabal sara tuma min na, a ko: «Matigi ka fo. Nabal ye ne mafiɲɛya, Matigi ye o koɲɛnabɔ ka a ka jɔnkɛ bali ko jugu kɛli la. Matigi ye Nabal ka ko jugu lase a yɛrɛ ma.» O kɔ, Dawuda ye ci bila k'a fɔ Abigail ye ko a b'a fɛ ka a furu.
[40] Dawuda ka baaradenw taara Abigail nɔ fɛ Karmɛl k'a fɔ a ye ko: «Dawuda ye an bila ka na i sɛgɛrɛ, sabu a b'a fɛ i ka kɛ a muso ye.»
[41] Abigail wulila k'i bi k'a ɲɛ biri duguma k'a fɔ ko: «A ka jɔnmuso filɛ ne ye, ne na a ka baaradenw sen ko.»
[42] O kɔ, a wulila ka bɔ duguma ka yɛlɛn a ka fali kan ani a ka baarakɛ muso duuru, ka taa Dawuda ka cidenw nɔ fɛ. A kɛra Dawuda muso ye.
[43] Dawuda tun ye Akinoam fana furu ka bɔ Jizreɛl. Olu fila kɛra a musow ye.
[44] Ayiwa Saul tun ye a denmuso Mikal, Dawuda muso, di Lais denkɛ Paliti ma. O tun ye Galimka ye.